Bu yilgi ramazon oyi, yurtimizda ayni dehqonchilik ishlari avji pallasiga to‘g‘ri keldi. Ammo, zahmatkash dehqonlarimiz karantin davriga qaramay, ro‘zador holda, zamin ne’matlari bilan ta’minlash maqsadida tinmay mehnat qilmoqda.
Navbatdagi maktub muallifi ham Surxondaryo viloyati, Denov tumanidan mehnatkash dehqon, bog‘bon, chorvador Abdurahmon bobo Abdualimov.
Allohga behisob shukrlar bo‘lsin, bizlarni yana ramazonga yetkazdi. Garchi bu yilgi ro‘za oyi bahor fasliga, ayni dehqonlar va yer bilan ishlaydigan kasb egalarining ishi qizg‘in pallaga to‘g‘ri kelgan bo‘lsada, ro‘za tutishimizga zarracha salbiy ta’sir ko‘rsatayotgani yo‘q.
Otam rahmatli ham dehqon bo‘lganlar. Ular bizga doimo rizqni Alloh beradi, sen sababini qilib urug‘ni yerga qadaysan xolos. Uni undirib, o‘stirib bizga mo‘l-ko‘l hosil qilib berguvchi Yaratganning O‘zi. Shuning uchun doimo Allohga itoat va ibodat qilib, undan dehqonchilikka baraka so‘rab duo qilish lozim der edilar. Men ana shu nasihatlar ila ulg‘ayganman.
Bu yil ham ro‘zani oilaviy ilhaqlik va mehr bilan kutib oldik. Barchamiz ro‘zadormiz. Saharlikdan so‘ng biroz Imom G‘azzoliydan o‘qiyman. Namozi bomdoddan so‘ng dala tomon yo‘l olaman. Piyoz va kartoshka yetilib turibdi. Shularni qozyapmiz. Xalqimizga tortiq etamiz insha Alloh. Peshinda daladan qaytamiz. Biroz dam olib, hovlidagi bog‘ga kirman. U yerda 70 tupdan ortiq mevali darahtlar bor. Shira tushganini dorilayman. Tagiga qulupnay ekkanmiz uni parvarishlaymiz. Shu bilan namozi asr bo‘lib qoladi.
Asrdan so‘ng farzandlarim bilan chorvaga qaraymiz. Bir necha bosh qora mol va qo‘ylarimiz bor. Sut qatiq deganday ne’matlar bizlarda serob. Shu bilan shom vaqti bo‘lib qoladi. Iftorlik vaqtida oila jamul-jam bo‘lamiz. O‘rtancha o‘g‘lim qori. To tarobeh vaqtigacha bizga Qur’onda keltirilgan voqe’alardan, payg‘ambarlar tarixidan gapirib beradi. Menga yusuf alayhissalom qissasi juda ham yoqadi. Har safar o‘zgacha ibrat bilan eshitaman.
Xuftondan so‘ng, oilaviy tarobeh namozini o‘qiymiz. Hovlimiz katta, farzandlarim bilan yaxshigina bir jamoa bo‘lamiz. Allohga behisob bo‘lsinki bu yil tarobeh namozida o‘g‘lim xatmul Qur’on qilyaptii. Qori farzandning ortida iqtido qilib 30 pora Qur’onni ramazon oyida tinglash... Bundan ortiq baxt bo‘lmasa kerak bu dunyoda.
Alloh taolodan vatanimizdagi barcha dehqonlarga, xalqimizga fayzu baraka, xotirjamlik tilab qolaman. Ramazon muborak!
Saidabror Umarov suhbatlashdi
Sabrsizlik musulmonlar orasida turli ixtiloflar, urush-janjallar kelib chiqishiga sabab bo‘ladi. Alloh Taolo sabr qiluvchilar bilan bo‘ladi. Ularni turli yomonliklardan asraydi. Sabr qilmay, chidamsiz bo‘lganlar esa, ixtilof girdobiga duchor bo‘ladilar.
Oyati karimaning oxirida Alloh taolo: “Va sabr qiling. Albatta, Alloh sabr qiluvchilar bilandir”, deb marhamat qilgan.
Shuningdek, Alloh taolo “Rum” surasi 31-32 oyatlarda mo‘min-musulmonlarga quyidagi xitobni qiladi: “...Va mushriklardan bo‘lmang. Dinlarida tafriqaga tushgan, guruh-guruh bo‘lib olib, har bir jamoa o‘z oldidagi narsadan shod bo‘lganlardan bo‘lmang”.
Demak, dinda tafriqaga tushish mushriklarning ishi bo‘lib tanilgan ekan. Guruh-guruh bo‘lib olib, ixtilof chiqarish, talashib-tortishish ham mushriklarning ishi ekan. Har bir jamoa o‘z oldidagi narsadan shod bo‘lib, boshqalarni past sanashi ham mushriklarning ishi ekan.
Alloh taolo “An’om” surasi 109-oyatda Payg‘ambarimiz sollallohu alayhi vasallamga xitob qilib: “Dinlarini tafriqa qilib, o‘zlari guruhbozlik qilganlar bilan hech bir aloqang yo‘q. Albatta, ularning ishi Allohning O‘ziga havola. So‘ngra qilgan ishlarining xabarini berur”, degan.
Ushbu oyati karimada Alloh taolo tafriqa va guruhbozlikka olib boradigan nizo hamda ixtiloflarni Payg‘ambarimiz sollallohu alayhi vasallamning yo‘llaridan boshqa, ul hidoyat yo‘liga teskari yo‘l hisoblamoqda. Alloh taolo bu oyatda tafriqa va guruhbozlik Payg‘ambarimizning ummatlariga munosib emasligini qattiq ta’kidlamoqda.
Alloh taolo “Oli Imron” surasida siz bilan biz musulmonlarga xitob qilib: “O‘zlariga ochiq bayonotlar kelganidan keyin bo‘linib, tafriqaga tushganlarga o‘xshash bo‘lmanglar! Ana o‘shalarga ulug‘ azob bordir”, degan.
Tafriqaga tushib bir-birimiz ila tortishish nizolar urchib, fayzu baraka ko‘tarilishiga sabab bo‘ladi.
Yangiqo‘rg‘on tumani "Sayid bobo Termiziy" jome masjidi
imom-xatibi Abduvali Mahmudxonov
@SOFTALIMOTLAR