Ramazon bu
Oylar sarvari bo‘lgan,
Ramazon bu, Ramazon.
Qalblar gavhari bo‘lgan -
Ramazon bu, Ramazon!
Go‘zal mohitobondur,
Bir oygina mehmondur.
Poklanishga imkondur,
Ramazon bu, Ramazon!
Avvali rahmat erur,
Mag‘firatga yuz burur.
Do‘zaxdan najot berur,
Ramazon bu, Ramazon!
Chin banda qadrin bilar,
Silayi rahm qilar,
Saxovatdan nur ilar,
Ramazon bu, Ramazon!
Qilib iymon shukrini,
Haq din — Islom fikrini.
Qo‘ymas tildan zikrini,
Ramazon bu, Ramazon!
Ko‘ngillarni eritgan,
Kalomlarni dur etgan.
Chehralarni nur etgan -
Ramazon bu, Ramazon!
Duolarni aylab soy,
Iymonga bo‘lamiz boy.
Qur’on nozil bo‘lgan oy -
Ramazon bu, Ramazon!
Haq rizosi ko‘chida,
Toat kunduz-kechida.
Qadr bordir ichida -
Ramazon bu, Ramazon!
Ro‘zamizdur qanoat,
Mo‘jizayu, sinoat.
Rabb oldida shafoat,
Ramazon bu, Ramazon!
G‘animatdur har dami,
Ixloslilar bayrami.
Allohning keng karami,
Ramazon bu, Ramazon!
Oylar sarvari bo‘lgan,
Ramazon bu, Ramazon.
Qalblar gavhari bo‘lgan -
Ramazon bu, Ramazon!
Malayziyalik talabalar O‘zbekiston haqida mediakontent yaratdi
Malayziyaning Universiti Teknologi MARA universiteti san’at, dizayn va media fakulteti talaba hamda o‘qituvchilaridan iborat guruh O‘zbekiston bo‘ylab ijodiy safarini yakunlab, o‘z yurtiga qaytdi. Malakali suratkash va dizaynerlardan iborat 18 kishilik guruh 17–31 avgust kunlari mamlakatning boy tarixiy merosi va zamonaviy qiyofasini aks ettiruvchi “storytelling” uslubidagi professional foto va video kontent tayyorladi.
Safarning yakuniy va eng keng ko‘lamli qismi Toshkentda o‘tdi. Guruh faoliyatining markazida Islom sivilizatsiyasi markazi turdi: mehmonlar bu yerda maxsus ta’lim dasturi, media-festival, "Muzeydagi tun" ekskursiyasi va multimediali mapping-shou dasturlarida ishtirok etib, boy foto va video material tayyorladi.
Poytaxtda talabalar Hazrati Imom majmuasi — Baroqxon madrasasi va Qaffol Shoshiy maqbarasida hamda Zarqaynar hunarmandchilik ko‘chasida bo‘lib, milliy hunarmandchilik va an’analarni o‘z kontentlarida aks ettirdi.
Guruh, shuningdek, Amaliy san’at muzeyi, Amir Temur muzeyi, O‘zbekiston tarixi davlat muzeyi va Zamonaviy san’at muzeyiga tashrif buyurdi; Alisher Navoiy nomidagi opera va balet teatri, "Navro‘z" etnografik bog‘i hamda "Magic City" va "Tashkent City" kabi zamonaviy majmualarni suratga olib, Toshkentning tarixiy va zamonaviy qiyofasini yaxlit tarzda taqdim etdi.
Ma’lumot o‘rnida, mehmonlar safarini Xivadan boshlab, Buxoro va Samarqand shaharlarida ham bo‘ldi. Ular “Ichan qal’a” davlat muzey-qo‘riqxonasi, Bahouddin Naqshband yodgorlik majmuasi, Poyi Kalon, Registon maydoni, Shohi Zinda yodgorlik majmuasi hamda “Konigil” sayyohlik qishlog‘i kabi maskanlarni suratga oldi.
Safar doirasida tayyorlangan materiallar “Instagram”, “Facebook”, “TikTok” va “YouTube” ijtimoiy tarmoqlariga joylashtirilib, O‘zbekistonning boy madaniy-tarixiy merosi va turistik salohiyatini xorijiy auditoriyaga zamonaviy media formatlarda tanishtirishga xizmat qiladi.
Loyiha, ayni vaqtda, O‘zbekiston va Malayziya o‘rtasidagi madaniy-gumanitar hamkorlikni mustahkamlashga ham hissa qo‘shdi.
O‘zbekiston musulmonlari idorasi Matbuot xizmati
