O‘tgan ulug‘larimiz Ramazon oyida namozda ham, namozdan boshqa paytlarda ham Qur’onni tilovat qilar edilar. 

***** 

Ro‘za uch xildir:

Birinchisi ruhning ro‘zasi, bu orzuni qisqa qilishdir.

Ikkinchisi aqlning ro‘zasi, bu havoni nafsga xilof qilishdir.

Uchinchisi a’zolarning ro‘zasi, bu taomdan, ichimlikdan va jimo’dan tiyilishdir. 

***** 

Ro‘za nima? Ro‘za – Alloh taolo sening tilingga, qulog‘ingga, ko‘zingga, farjingga va qorningga parda urib qo‘yishidir. Sen shuni tushunib yetishing kerak. Alloh taolo ro‘za sababli seni do‘zaxdan to‘sadi.

*****

Bir keksa kishiga: “Siz qari odamsiz. Bu ro‘za sizni zaif qilib qo‘yadi-ku” deyishdi. Shunda u kishi: “Men bu ro‘zani uzoq safar uchun tayyorlayapman. Alloh taoloning toatiga sabr qilish Uning azobiga sabr qilishdan osonroqdir” deb javob berdilar.

*****

Bishr rahimahullohga: “Shunday odamlar borki, faqat Ramazon oyida ibodatga qattiq beriladilar” deyildi Shunda Bishr hazratlari: “Ular Alloh taoloning haqqini faqat Ramazonda taniydigan naqadar yomon kishilar ekan. Albatta, solih kishi yilning hammasida qattiq ibodat qiladi” dedilar.

*****

Solihlardan biridan “Rajab oyi afzalmi yoki sha’bon oyimi?” deb so‘radi. Shunda u zot: “Sen sha’boniy emas, rabboniy bo‘l” deya javob berdilar. Ya’ni faqat sha’bon oyida ibodat qilib, nafl ro‘za tutuvchi emas, balki butun umr davomida Allohning toatida bo‘lgin” dedilar.

*****

Bir kishi solihlarning biridan cho‘ri sotib oldi. Yangi xo‘jayin ramazon oyi yaqinlashganda taomlar, ichimliklarni zaxira qila boshladi. Joriya undan buning sababini so‘radi. Xo‘jayini “Ramazon yaqinlashyapti. Shunga tayyorgarlik ko‘ryapmiz” deb javob berdi. Bu gapni eshitgan joriya: “Sizlar faqat Ramazon oyida ro‘za tutasizlarmi? Mening avvalgi xo‘jayinimning barcha kunlari Ramazondek edi. Meni o‘sha kishiga qaytarib bering” dedi.

O‘MI Matbuot xizmati