Joriy yilning 12-15 sentyabr' kunlari Malayziya poytaxtida joylashgan xalqaro savdo va ko'rgazmalar markazida bo'lib o'tayotgan “MIHAS-2023” Halqaro halol mahsulotlari ko'rgazmasida O'zbekiston elchixonasi ko'magida respublikamizning mahalliy korxonalari vakillari ishtirok etmoqda, deb xabar beradi “Dunyo” AA muxbiri.

Halqaro halol mahsulotlari ko'rgazmasi (Malaysia International Halal Showcase – MIHAS-2023) halol mahsulotlar sanoatida dunyodagi eng yirik tadbir bo'lib, 2004 yildan beri har yili Malayziya poytaxtida o'tkazib kelinadi. Ushbu ko'rgazma tashkilotchisi – Malayziya savdo va sanoat vazirligi huzuridagi Halqaro savdoni rivojlantirish korporatsiyasi (MATRADE).

Ushbu tadbirda har yili 40 dan ortiq mamlakatlardan 1000 ga yaqin kompaniyalar, 80 dan ortiq mamlakatlardan 25 ming kishi ishtirok etadi. Mazkur yilda ko'rgazmada 43 mamlakatdan 549 ta kompaniya va 64 mamlakatdan 16,5 ming kishi ishtirok etmoqda.

“MIHAS-2023” ochilish marosimida Malayziya Bosh vaziri Anvar Ibrohim ishtirok etdi. Tadbir davomida ishtirokchilar “halol” sanoatidagi yangi yo'nalishlar va tendentsiyalar bilan tanishdilar.

Tadbir ishtirokchilariga mamlakatimizning eksport salohiyati, mahalliy mahsulotlarni xorijiy mamlakatlar bozorlariga chiqarish bo'yicha amalga oshirilayotgan chora-tadbirlar va mahsulotlar tannarxini tushirish bo'yicha foydalanilayotgan xalqaro transport koridorlari bo'yicha batafsil ma'lumotlar berildi.

Tadbir davomida O'zbekistondan tashrif buyurgan “Eclair”, “Elice” va “Asia Premium Deluxe” kompaniyasi vakillari Malayziyaning bir qancha ishlab chiqaruvchilari, shu jumladan “Imedikel Pharma Holding Berhad”, “RCAB food ventures Sdn. Bhd.”, “Eramas Group”, “Mahkota”, “Quanterm Logistics Sdn Bhd”, “The Vida World Sdn Bhd” va “Matase Sutera” kompaniyalari bilan muzokaralar olib bordilar. Unda mamlakatimizda ishlab chiqarilayotgan mahsulotlarni Malayziya bozoriga eksport qilish va Malayziya ishlab chiqaruvchi kompaniyalarini respublikamizda investitsion loyihalarni amalga oshirish istiqbollari muhokama qilindi.

Ko'rgazmada ishtirok etayotgan Malayziyaning “Imedikel Pharma Holding Berhad”, “RCAB food ventures Sdn. Bhd.”, “Makhota Detergent” va “The Vida World Sdn Bhd” kompaniyalari O'zbekistonda qo'shma loyihalarni amalga oshirish imkoniyatlarini ko'rib chiqishga qiziqish bildirdilar.

O'zbekiston musulmonlari idorasi
Matbuot xizmati