63-Malayziya Halqaro Qur'on musobaqasida erkak va ayol-qizlar ishtirokida ikki toifadagi eng yaxshi g'oliblarni taqdim etish bilan yakunlandi.
Kuala-Lumpurdagi Jahon savdo markazida (WTCKL) Malayziyada 63-xalqaro Qur'on o'qish va yodlash musobaqasi bo'lib o'tdi, deb yozadi IQNA sayti “BERNAMA” matbuot xizmatiga tayanib.

Ushbu tanlov 19 avgust kuni Jahon savdo markazida boshlandi va 24 avgust kuni eng yaxshi g'oliblarni taqdim etish bilan poyoniga etdi.

Erkaklar o'rtasida mujavvidlik yo'nalishida malayziyalik qori Muhammad Qayyum Nizar Sarimi birinchi o'rinni egalladi. Ikkinchi o'rin eronlik Ali Rizo Bijaniyga, uchinchi o'rin esa bruneylik Muhammad Zul Hafiz Avang Tangaga nasib etdi.

Marokashlik qori Sara Balmamun ayollar o'rtasida mujavvid (chiroyli o'qish) yo'nalishida birinchi o'rinni egalladi, keyingi o'rinlarni indoneziyalik Rosa Sufyan Nur va filippinlik Sabah Batu Salek egalladi.

Erkaklar o'rtasida Qur'oni karimni yoddan o'qib berish yo'nalishida gvineyalik Umar Ture birinchi, keyingi o'rinlarni yamanlik Ma'mun Ahmad va chadlik Ali Atiye egalladi.

Jazoirlik Tibani Shima Anfal ayollar o'rtasida Qur'oni karimni yoddan o'qib berish yo'nalishida birinchi o'rinni egallagan bo'lsa, undan keyingi o'rinlarni senegallik Nadi Sinabo Najum va mavritaniyalik Seyedi Al-Muxtor Hadijito egalladi.

Birinchi o'rinni qo'lga kiritgan malayziyalik ko'zi ojiz qori Muhammad Qayyum bunday dedi: “Allohga shukr, Qur'oni karimni brayl alifbosida o'qish mahoratini o'zlashtirishdagi 16 yillik mehnatim nihoyat ushbu tanlovda o'z samarasini berdi”.

O'zbekiston musulmonlari idorasi
Matbuot xizmati