Tojikiston milliy banki mamlakatning ilk islomiy banki – “Tavhidbank”ka milliy va xorijiy valyutada islomiy banking xizmatlarini ko‘rsatishi uchun litsenzitsiya (https://azon.uz/content/views/tojikistonning-ilk-islomiy-bankiga-licen) berdi.

Joriy yilning 1 iyulida “Sohibkorbank”ning nomi “Tavhidbank” deb o‘zgartirilgan edi. “Sohibkorbank”ning o‘zgarish jarayonini o‘tgan yilning bahorida boshlagan. Bu borada Xususiy sektorni rivojlantirish bo‘yicha Islom korporatsiyasi (Islom taraqqiyot banki tarkibiga kiradi) mutaxassislari yordam berdi. “Sohibkorbank” vakillari islomiy banking orqali aholining bank tizimiga bo‘lgan ishonchini qaytarishga umid qilmoqda.

Tojikistonda islomiy bankingni joriy etish haqida 2010 yilda aytilgan edi. 2014 yilning yozida “Islomiy bank faoliyati to‘g‘risida”gi qonun qabul qilindi. Shundan so‘ng Qatar Tojikistondagi ilk islomiy bankingni ochishda qatnashish istagini bildirdi. Biroq 2015 yilda respublikada boshlangan moliyaviy inqiroz tufayli loyihalar to‘xtab qolgandi.

Markaziy Osiyoda islomiy banklar Qozog‘istonda va Qirg‘izistonda ham faoliyat ko‘rsatib kelmoqda.

O‘zbekiston musulmonlari idorasi Matbuot xizmati