Bismillahir Rohmanir Rohiym
Farg‘ona viloyati Qo‘qon shahrida bo‘lib turgan O‘zbekiston musulmonlari idorasi raisi, muftiy Shayx Nuriddin Xoliqnazar hazratlari boshchiliklardagi bir guruh ulamolar aholi vakillari bilan muloqotlar, namozxonlar bilan uchrashuvlar va jome masjidlarda mav’izalar qilmoqdalar. Bugun, Muftiy hazratlari Qo‘qon shahridagi “Zaynul Obidin” masjidiga borib, xufton namozi avvalida mo‘min-musulmonlarga mav’iza qilib berdilar.
Shayx Nuriddin Xoliqnazar hazratlari jamoatga yurtimizda diniy sohada olib borilayotgan islohotlar, yangi ochilayotgan masjid-madrasalar, Qur’oni karim kurslari faoliyati, haj-umra qiluvchilarga keng yo‘l berilayotganiga shukrona keltirish kerakligi haqida so‘zlash barobarida Alloh taoloni rozi qiladigan va norozi qiladigan amallar haqida ma’ruza qilib berdilar.
Shuningdek, O‘zbekiston musulmonlari idorasi raisi o‘rinbosari Zayniddin domla Eshonqulov va bir guruh taniqli ulamolar Qo‘qon shahridagi markaziy masjidlarda peshin va xufton namozlarida jamoatga mazmunli suhbat qilib berdilar.
Qo‘qon safari davom etadi.
O‘zbekiston musulmonlari idorasi Matbuot xizmati
Savol: O‘qilgan namozimdan ko‘nglim to‘lmadi. Shu namozni qayta o‘qishim kerakmi?
Javob: Bismillahir Rohmanir Rohiym. Bu masalaning biroz tafsiloti bo‘lib, unga ko‘ra namoz quyidagi holatlarda qayta o‘qilishi lozim:
• Namozda biror farz amal bajarilmay qolib ketgan bo‘lsa;
• Namozda biror vojib amal qasddan bajarilmay qolib ketsa;
• Namozda biror vojib amal unutib bajarilmasa va namoz oxirida sajdai sahv ham qilinmay tugatilgan bo‘lsa.
Agar namozda sunnat amallar tark qilingan bo‘lsa yoki namoz makruhlik bilan o‘qilgan bo‘lsa, u holda namozni qayta o‘qish vojib emas, balki mustahab (chiroyli sanalgan) ish hisoblanadi. Ushbu holatda qaytadan o‘qimasa ham gunohkor sanalmaydi.
Savolda so‘ralgan holatga kelsak, ko‘ngil to‘lmasligi yuqorida sanab o‘tilgan farz yoki vojib amal tark qilingan holatlar sababli bo‘lsa, namoz qayta o‘qilishi kerak. Ammo haqiqatda sobit bo‘lmagan shubha-gumonlar, vasvasalar sababli ko‘ngil to‘lmayotgandek bo‘lsa, u holda namozni qayta o‘qilmaydi. Chunki ko‘p hollarda “ko‘nglim to‘lmayapti”, deb namozni qayta-qayta o‘qiyverish insonni o‘ziga bo‘lgan ishonchini yo‘qotadi va vasvasa kasaliga chalinishiga olib keladi.
Shunday ekan, namozda bajariladigan farz, vojib, sunnat amallar haqida yaxshi o‘rganish, eng asosiysi turli xayollarga chalg‘imasdan namozni e’tibor bilan ado etish lozim bo‘ladi. Vallohu a’lam.
O‘zbekiston musulmonlari idorasi
Fatvo markazi.