O‘zbekiston musulmonlari idorasi Matbuot xizmati
Muftiy hazrat ommaviy axborot vositalari xodimlarini bayram bilan qutladi
27.06.2019
5637
2 min.
27 iyun kuni O‘zbekiston musulmonlari idorasi raisi, muftiy Usmonxon Alimov hazratlari “Matbuot va ommaviy axborot vosita-lari xodimlari kuni” munosabati bilan barcha ijodkorlarni muborakbod etdilar.
Ushbu bayram tadbirida televideniya, radio, bosma va elektron nashrlar xodimlari, jurnalistlar, sayt yurituvchilari, bloggerlar va tahlilchi-sharhlovchilar ishtirok etdi.
Muftiy Usmonxon Alimov hazratlari mana shunday ijod ahlini bir joyga jam qilib, Islom dini ma’rifatini keng yoyish va ijobiy o‘zgarishlarni xalqimizga yetkazishda mo‘min-musulmonlar manfaati, din g‘ami va Vatan taqdirini yuragidan o‘tkazib ishlaydigan ijod ahlining da’vatkor so‘zi, ibratli faoliyati tahsinlarga loyiq ekanini alohida qayd etdilar.
Bugungi tezkor zamonda bloggerlar voqea-hodisalarni yoritishda juda ham tezkor bo‘layotganlari uchun tashakkur aytib, ular jarayonlarni yoritishda xolislikni asos qilib, xabarlarni chiroyli uslubda yortishni va berilgan imkoniyatlardan keng foydalanishni muftiy hazratlari tavsiya etdilar.
Hozirgi murakkab zamonda xalqimizni ro‘yi-rost ma’lumot bilan ta’minlashda bloggerlarning o‘rni va mas’uliyati har qachongidan ham ortib borayotgani, ayniqsa, jurnalist va bloggerlarning jamiyatimizdagi diniy-ma’rifiy voqealarning ahamiyatini ochib berish, taraqqiyotimiz yo‘lida to‘siq bo‘lib turgan muammolarni dadil ko‘tarish, mavzuga xolisona va haqqoniy yondashish kabi milliy matbuotimizning asosiy mezonlariga doimo amal qilish lozimligi ta’kidlandi.
Muftiy Usmonxon Alimov hazratlari qalam ahlining mehnatini naqadar mashaqqatli ekanini to‘la anglagan holda, ularning sa’y-harakatlarini doimo qo‘llab-quvvatlashga tayyor ekanlari, ularni eng yaqin yordamchi, deb bilishlari, shuningdek, barcha ijodkorlarga, jumladan, tanqidiy-tahliliy yo‘nalishda mehnat qiladigan mualliflarga ham alohida e’tibor qartishlarini hamda Diniy idora har qanday masalada yaqindan hamkorlik qilishga tayyor ekanini ma’lum qiladilar.
Bayram tadbirida turli yo‘nalishlar bo‘yicha o‘tkazilgan tanlovlar yakunlari bo‘yicha bir guruh ijodkorlar taqdinlandi.
Boshqa maqolalar
Muhimi qalbdagi narsa, cho‘ntakdagi emas
27.06.2025
2969
3 min.
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Bir kishi Nabiy sollallohu alayhi vasallamga kelib: «Men qiynalgan kishiman», dedi. Ya’ni, och ekanini bildirdi.
Nabiy sollallohu alayhi vasallam xotinlaridan biriga ovqat so‘rab odam yubordilar. «U zotni haq ila jo‘natgan zotga qasam ichib aytamanki, uyimda suvdan boshqa hech narsa yo‘q!» dedi u.
Xuddi shunday qilib barcha xotinlariga ovqat so‘rab odam jo‘natdilar. Ularning bari yuqoridagidek javob berdi. Shunda Rasululloh sollallohu alayhi vasallam: «Bu kecha bu odamni kim mehmon qiladi, Alloh unga rahm qilsin», dedilar. Shunda ansorlardan bir kishi turib: «Yo Allohning Rasuli! Uni men mehmon qilaman», dedi. So‘ngra uni uyiga olib ketdi. Borib xotiniga bunday dedi:
— Bu odam Rasululloh sollallohu alayhi vasallamning mehmonlari. Unga taom hozirla!
Xotin dedi:
— Bolalarimizning ovqatidan boshqa ovqat yo‘q.
Er dedi:
Bolalaringni uxlatib ovqatni olib kel. Mehmon ovqatga qo‘l uzatganida chiroqni o‘chirib qo‘y. Biz qorong‘ida o‘zimizni ovqat yeyayotgandek ko‘rsatamiz. Ammo yemaymiz. Mehmon shunda ozgina ovqatga to‘yadi.
Ular shunday qilib och uxlashdi. Mehmon to‘ydi. Ertalab ular Rasululloh sollallohu alayhi vasallamning huzurlariga borishgach, u zot dedilar:
— Alloh taolo sizning ishingizdan ajablandi. Siz haqingizda Qur’on nozil qildi:
«Garchi o‘zlarining hojatlari bo‘lsa ham (boshqalarni) o‘zlaridan ustun ko‘radilar. Kim o‘z nafsining baxilligidan saqlansa, unday kishilar ha, ana o‘shalar najot topguvchilardir» (Hashr surasi, 9-oyat).
Dunyo charxpalakdir. Zamon aylanib turadi. Bugun puling bor. Ertaga yo‘q, ishing orqaga ketadi. Bugun faqirsan, ammo ertaga boyib ketishing mumkin. Faqirlik ayb emas, boylik fazilat emas.
Muhimi qalbdagi narsadir, cho‘ntakdagi emas. Muhimi insonning boylik va faqirlik paytidagi axloqidir.
Tasavvur qilyapsizmi, Rasululloh sollallohu alayhi vasallamning hech bir ayollari uyidan ovqat topilmayapti! U kishi Allohning Rasuli bo‘lish bilan birga davlat rahbari ham edilar. Uylarida suvdan boshqa hech vaqo yo‘g‘-a?!
Faqirlikni uqubat, boylikni esa mukofot deb o‘ylashdan ehtiyot bo‘ling. Dunyo bor-yo‘g‘i imtihon, xolos. Imtihon savollari qanchalar qiyin bo‘lmasin, o‘tirib qolmang.
Aqlli inson boshqalarning hojatini chiqarishga harakat qiladi. Ularni qiyin ahvolda qoldirmaydi. Kishilarga ehson qilganingizda ular o‘zini aybdor va nuqsonli sanashmasin!
Bemor kishining faqirligini bilib qolsangiz, u so‘rashidan oldin ahvolidan xabar olishingiz oqilona ishdir. Ba’zilarning iffati so‘rashdan to‘sadi. In’omning eng afzali insonlarning iffatni ehtirom qilib, obro‘larini muhofaza qilib berilgan in’omdir!
Ehson qilishning ham odoblari bor. Bir kishiga hammaning oldida sadaqa yoki ehson bersangiz, uni xijolatga qo‘yasiz, iffatini jarohatlaysiz, ojizligini yuziga solgandek bo‘lasiz... Bunaqa sadaqa-ehson qilgandan ko‘ra, qilmaganing afzaldir!
Yuqorida keltirilgan ansoriyning odobiga boqing. Ovqati ozligi uchun xotiniga chiroqni o‘chirishni buyurdi. Maqsadi mehmonni xijolat qilmaslik edi. Chiroq yonib turganida mehmon ovqatning kamligini ko‘rib, uyalib, ovqat barchaga yetishi uchun ehtimol to‘yib yeya olmasdi.
Kishilardan noqulaylikni ketkazish ham ularni xotirjam qilishdir. Xotirjam qilish esa, ibodatdir!
«Nabaviy tarbiya» kitobi asosida tayyorlandi