Fotoreportaj: “Shayx Muhammad Sodiq Muhammad Yusuf” jome masjidida xatmona
Ibn Abbos roziyallohu anhu bunday deganlar: “Men Rasululloh sollallohu alayhi vasallamning: “Agar ummatlarim Ramazondagi fazilatlarni bilganlarida edi, yilning hammasi Ramazon bo‘lishini orzu qilardilar”, deganlarini eshitdim”. Chunki Ramazondagi toatlar maqbul, duolar mustajob, gunohlar esa mag‘firat qilinadi. Jannat esa ro‘zadorlarga mushtoq bo‘ladi.
Ha, bugun biz endi his etyapmiz Rasulullohning so‘zlarini. Kunduzlari ro‘zador bo‘lib taqvoga yaqinlik, iymon halovati, kechalari tarovihlarda Qur’oni karim mo‘jizasi, tasbihlar, tafsir, hadis, shonli tarix haqidagi mo‘tabar suhbatlar… Nahot bularning hammasi tugab boryapti. Buncha tez o‘tmasa Ramazon…. Yana bir yil umid bilan, duo bilan sog‘inamiz endi bu muborak oyni…
Kuni kecha Ramazonga katta tuhfalardan biri bo‘lib ochilgan “Shayx Muhammad Sodiq Muhammad Yusuf” jome masjidida ham xatmi Qur’on yakunlandi.
Aytish lozimki ushbu muazzam majmua muhtaram yurtboshimiz tashabbuslari bilan islom olamidagi ulug‘ alloma, fvzilatli shayx Muhammad Sodiq Muhammad Yusuf rohmatullohi alayhning islom ravnaqi, xalqlar do‘stligi, ummatning birligi yo‘lida qilgan sharafli mehnatlari munosib e’tirofi sifatida shayx hazratlari o‘zlari hayotlik chog‘larida hissalari qo‘shilgan keyinchalik tugallanmay qolgan masjid maydoni o‘rnida bunyod etilgan. Hazratning salobatlari, ulug‘vorliklariga hamohang bu mo‘tabar maskandan ziyoratchilar, namozxonlar arimaydi. Alloh taolo o‘zining solih bandasiga buyuk fazl ko‘rsatib, masjidda qilinayotgan ibodatlar, xatmi Qur’onlarning savobi bilan ne’matlantirib turibdi.
Xatmona kechasi masjid va uning atrof ko‘chalari ixlos egalari bo‘lgan namozxonlar bilan to‘lib toshdi. Ulamolar, ustoz imom domlalarning munavvar suhbatlari, qalbdan chiqqan duolari ibodat uyini jannat izdihomiga aylantirdi.
Xatmi Qur’onni shayx hazratlarining shogirdlari hozirda ko‘plab qorilarga ustoz sanalgan Bahodir qori Rahmatullayev, Hamidulloh qori Aripovlar 23 kun davomida husni tajvid, go‘zal savt bilan ado etib berishdi.
Qori Qur’onning so‘nggi suralarini o‘qir ekan, har tomondan yig‘i ovozlari eshitilar, muqtadiylar o‘zlarini yig‘idan to‘xtata olmas edilar. Axir ular yigirma bir kun mobaynida zavqlanib tinglagan, o‘rganib qolgan Qur’onlari tugab bormoqda… Robbilari bilan diydor yana uzoqlashmoqda…. Albatta, bu diydor har kuni besh vaqtda keladi, biroq O‘zi ulug‘lab qo‘ygan Ramazondagi ibodatning qalbga olib keluvchi farog‘ati o‘zgacha. Shu bois xatmi Qur’on keyin duolar, munojotlar uzoq davom etdi. Qorining lafzidan go‘zal duolar terilib kelar, ko‘zlarda shashqator yoshlar istig‘fordan to‘kilar edi….
Xatmi Qur’on savobi Shayx hazratlariga bag‘ishlandi. Shuningdek, yurtimizda din yo‘lida xizmat qilib o‘tgan ko‘plab ulamolar, marhum ustozlar eslandi. Bu majmuani bunyod etib bergan muhtaram yurtboshimiz haqlariga duolar qilindi, u kishining ota-onalari ruhoniyatlariga savoblar bag‘ishlandi. Qorilarni shunday martabaga yetkazgan ota-onalari, ustozlari haqqlariga duolar qilindi. Ularning bu mehnatlari evaziga jannatda izzat tojini kiydirishlik nasib bo‘lishini so‘rab duolar qilindi.
O‘zbekiston musulmonlari idorasi Masjidlar bo‘limi
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati
