“India Narrative” axborot-tahliliy portalida hindistonlik taniqli xalqaro sharhlovchi Aditi Bhadurining O'zbekiston xalqaro islom akademiyasi dotsenti Bektosh Berdiyev bilan suhbati e'lon qilindi, deb xabar bermoqda “Dunyo” AA muxbiri.

Materialda O'zbekistonda diniy erkinlik uchun yaratilgan sharoitlar, o'zbekistonliklar hayotida dinning tutgan o'rni, konfessiyalararo totuvlik, jamiyatning radikallashuviga qarshi olib borilayotgan izchil chora-tadbirlar haqida so'z yuritilgan.

O'zbekiston boy ma'naviy-ma'rifiy merosga ega. Buxoro, Samarqand va boshqa shaharlar azaldan yirik ta'lim markazlari sifatida mashhur bo'lgan, deyiladi interv'yuda.

Suhbatda mazkur yo'nalishda ilmiy izlanishlar olib borayotgan, mamlakatimizda islom dini va merosi haqidagi bilimlarni tarqatayotgan islom oliy ta'lim muassasalari, jumladan, O'zbekiston xalqaro islom akademiyasi faoliyati haqida ma'lumotlar taqdim etilgan.

O'zbek olimining “Biz jamiyatda bag'rikenglikni rivojlantiruvchi va targ'ib qiluvchi mutaxassislarni tayyorlaymiz, chunki O'zbekistonda islom azaldan shunday mazmun kasb etgan. Biz asrlar davomida turli madaniyatlar va g'oyalar ta'sirida bo'lgan Ipak yo'li chorrahasida joylashganmiz. Akademiyamizning asosiy maqsadlaridan biri ham jamiyatda bag'rikenglikni, turli din vakillari tinch-totuv yashashini mustahkamlashga hissa qo'shishdan iboratdir”, degan so'zlari keltirilgan.

Materialda O'zbekistonning yangilangan Konstitutsiyasida mamlakat dunyoviy davlat deb e'lon qilingani ta'kidlangan.
«Mamlakatimizda 130 millat va 16 turdagi diniy konfessiya vakillari bir oila bo'lib istiqomat qiladi. Ularning huquqlarini birdek himoya qilishimiz kerak. Biz demokratiya sharoitida yashashni xohlaymiz”, deydi Bektosh Berdiyev.

Interv'yu O'zbekiston xalqi Asosiy qonunga taklif etilgan ushbu tuzatishlarni referendumda qo'llab-quvvatlagani haqidagi so'zlar bilan yakunlangan.


O'zbekiston musulmonlari idorasi
Matbuot xizmati