O'zbekiston sayyohlik salohiyati Indoneziyaning Jakarta shahrida tashkil etilgan «Halal Fair Jakarta» turizm yarmarkasida namoyish etilmoqda, deb xabar bermoqda «Dunyo» AA muxbiri.

Turizmni rivojlantirish davlat qo'mitasi ma'lumotiga ko'ra, tadbirda butun musulmon dunyosi mamlakatlaridan yirik kompaniya vakillari ishtirok etayapti.
Halqaro yarmarka kunlarida delegatsiyamiz a'zolari tomonidan ko'plab yangi va qiziqarli turistik mahsulotlar taqdimoti namoyish etildi. Asosiy e'tibor nafaqat an'anaviy turizm yo'nalishlari, balki mamlakatning gastronomik va ziyorat turizmi salohiyatining targ'ibotiga ham qaratilmoqda. Shuningdek, stendimizga tashrif buyuruvchilar sevimli milliy taomimiz – palovning tayyorlanishi va dasturxonga tortilishini o'z ko'zlari bilan ko'rish imkoniga ega bo'layaptilar.

Yarmarka davomida, shuningdek, tadbirga tashrif buyurgan Indoneziyanig turizm va kreativ iqtisodiyot vaziri Sandiaga Salahuddin Uno bilan ham uchrashuv tashkil etilib, unda ikki davlat o'rtasidagi turizmni rivojlantirish bo'yicha muzokoralar olib borildi.

«Ushbu tadbirda O'zbekistonning ishtiroki muhim ahamiyatga ega. Sababi mamlakatingiz Islom taraqqiyoti yo'lida beqiyos xizmat ko'rsatgan. Boshqa mamlakatlarda bo'lgani kabi indoneziyaliklar ham Al-Buxoriy, At-Termiziy, Naqshbandiy, Motrudiy kabi allomalar etishib chiqqan yurtni borib ko'rishni va ziyorat qilishni juda xohlaydi. Indonez xalqining sifatli dam olishini tashkil etish maqsadida O'zbekiston tomoni bilan manfaatli hamkorlik istiqbollariga egamiz», - dedi Sandiaga Salahuddin Uno.

Ikki tomonlama o'tkazilgan muloqot jarayonida Indoneziya aholisi uchun qiziq bo'lgan O'zbekistonning qishki turizm salohiyati to'g'risida ham batafsil ma'lumot berildi.

«Halal Fair Jakarta» turizm yarmarkasi bugun o'z ishini yakunlaydi.

O'zbekiston musulmonlari idorasi
Matbuot xizmati