Muborak Ramazon oyida Jannatga 122 eshik
Muborak Ramazon oyida Jannatga 122 eshik
- Har bir amalni faqat Alloh taoloning roziligini ko‘zlab bajarish. (Ixlosli bo‘lish).
- Alloh taologa tavba qilish.
- Yangi chiqqan oyni ko‘rganda duo qilish.
- Iymon va savob umidida ro‘za tutish.
- Iymon va savob umidida kechalarini bedor o‘tkazish.
- Iymon va savob umidida qadr kechasida bedor bo‘lish.
- Oxirgi o‘n kunida yanada jiddu jahd qilish.
- Umra qilish.
- E’tikofda o‘tirish.
- Ro‘zadorga iftorlik qilib berish.
- Qur’oni karimni tilovat qilish.
- Qur’oni karimni o‘rganish va o‘rgatish.
- Alloh taoloni zikr qilish.
- Istig‘for aytish.
- Tahoratni mukammal ado etish.
- Tahorat olgandan keyin shahodat kalimasini aytish.
- Doimiy tahoratli bo‘lib yurish.
- Musvok ishlatish.
- Tahorat olgandan keyin ikki rakat namoz o‘qish.
- Azon eshitandan keyin uning duosini o‘qib qo‘yish.
- Azon va iqomat orasida duo qilish.
- Doimiy besh vaqt namozni ado etish.
- Namozlarni o‘z vaqtida ado etish.
- Xususan bomdod va asr namozlarining vaqtiga yanada rioya qilish.
- Juma namozini doimiy ado etish.
- Juma kuni duolar ijobat bo‘ladigan lahzalarni o‘rganib, shu vaqtlarda duo qilish.
- Juma kuni “Kahf” surasini o‘qish.
- Masjidga borish.
- Haram masjidida va Nabaviy masjidida namoz o‘qish.
- Qubo masjidida namoz o‘qish.
- Doimo jamoat bilan namoz o‘qishga rioya qilish.
- Birinchi safda namoz o‘qishga intilish.
- Doimo “Zuho” namozini ado etish.
- Kundalik o‘qilib boriladigan sunnat namozlarini qoldirmaslik.
- Nafl namozlarni uyda ado etish.
- Ko‘p sajda qilish.
- Masjidda bomdod namozini o‘qib bo‘lgandan keyin o‘z joyida quyosh chiqquncha zikr qilib o‘tirish.
- Janoza namozi va dafn marosimiga qatnashish.
- Yosh farzandlarni namoz o‘qishga o‘rgatish.
- Yoshlarni ro‘za tutishga o‘rgatish.
- Har bir farz namozidan keyin Alloh taoloni zikr qilish.
- Ro‘zador og‘iz ochishini kechiktirmasligi.
- Og‘iz ochish amalini shom namozidan avval bajarish.
- Agar topilsa, xurmo bilan og‘iz ochish.
- Doimo iftorlik duosini o‘qishga rioya qilish.
- Iftorlik paytida duo qilish.
- Boshqa paytlarda ham ko‘proq duo qilish.
- Saharlik qilish.
- Ovqat yeb, ichimlik ichib bo‘lgandan keyin Alloh taologa hamd aytish.
- Zakotni ado etish.
- Alloh yo‘lida infoq-ehson qilish.
- Sadaqa berish.
- Birovlarga oshkora qilmay sadaqa berish.
- Masjidlar qurilishiga moddiy yoki ma’naviy ko‘mak berish.
- Salomni keng yoyish va miskinu faqirlarga taom yedirish.
- Yo‘ldan odamlarga aziyat beradigan narsalarni olib tashlash.
- Ota-onaga yaxshilik qilish va ularga itoat etish.
- Ayol kishi eriga itoat etishi.
- Haloldan kasb qilish.
- Doimo ahli-oila nafaqasidan xabardor bo‘lish.
- Yetim-yesirlarga va miskinu bechoralar nafaqasidan xabardor bo‘lish.
- Yetimni o‘z kafilligiga olib, uning nafaqasiga qarash.
- Yetimning boshidan silab, unga mehr-shafqat ko‘rsatish.
- Do‘stu birodarlarning ehtiyojlarini ravo qilish.
- Alloh yo‘lidagi do‘stlardan hol-ahvol so‘rab ko‘rgani borib turish.
- Kasallarni holidan xabar olish.
- Qarindosh-urug‘lar garchi, aloqalarni uzgan bo‘lsalar-da, ular bilan bordi-keldi qilish.
- Musulmon ko‘nglini ko‘tarib, xursand qiladigan ishlarni amalga oshirish.
- Qiynalib qolgan kishining ishini yengillatish.
- Zaifhol kishilarga nisbatan rahm-shafqatli bo‘lish.
- O‘zaro nizo chiqqan, bir-biri bilan yuzko‘rmas bo‘lib ketgan insonlarning orasini isloh qilish.
- Go‘zal xulqli bo‘lish.
- Hayoli bo‘lish.
- Rostgo‘y bo‘lish.
- Bosiq, kechirimli, muloyim bo‘lish.
- Ko‘rishganda qo‘l berib salomlashish.
- Ochiq yuzli bo‘lish.
- Savdoda bag‘rikeng bo‘lish.
- Alloh taolo harom qilgan narsalardan ko‘zni tiyish.
- Yaxshilikka chaqirib, yomonlikning oldini olish.
- Solihlar, yaxshi insonlar bilan birga bo‘lish.
- Til va boshqa a’zolarni nomaqbul ishlardan saqlash.
- Payg‘ambar alayhissalom ko‘p salovot aytish.
- Yaxshilik qilish va ezgu ishlarga dalolat qilish.
- Insonlar Alloh taoloni tanishiga sababchi bo‘lish.
- Insonlarning ayblarini berkitish.
- Sabrli bo‘lish.
- Biror bir gunoh ish sodir etganda, ikki rakat namoz o‘qib tavba qilish.
- Hayvonu jonzotlarga ham shafqatli bo‘lish.
- Insonlardan ta’ma qilmaslik.
- Ko‘p tahlil (ya’ni, “Laa ilaaha illalloh”) va tasbeh aytish.
- Sadaqayi joriya qilish.
- Savdo-sotiqda rostgo‘y bo‘lish.
- Musulmonlar g‘am-tashvishini aritish.
- Musulmon va boshqalarga ziyon bermaslik.
- O‘zgalarga yordam qo‘lini cho‘zish.
- Ota-onaning do‘stlari bilan ham bordi-keldi qilib aloqani uzmaslik.
- Shirin so‘zli bo‘lish.
- Qo‘l ostidagi ishchi-xodimlarga shafqatli bo‘lish.
- Bir solih amalni oz-oz bo‘lsa-da, bardavomlik ila bajarish.
- Qo‘ni-qo‘shnilarga yaxshi munosabatda bo‘lish.
- Mehmonlarni izzat-ikrom qilish.
- Ota-onaning haqqiga duo qilish.
- Do‘stu birodarining haqqiga g‘oyibona duo qilish.
- Musulmonlarning haqqiga duo qilish va Alloh taolodan ularning gunohlarini kechirishini so‘rash.
- Masjidlarni tozaligiga hissa qo‘shish.
- Turmush o‘rtog‘i bilan yaxshi munosabatda bo‘lish.
- O‘z ahli-oilasiga ta’lim-tarbiya berish.
- Biror kishiga jabr qilgan bo‘lsa, undan rozilik olish va zimmasidagi o‘zgalarning moddiy va ma’naviy haqlarini ado etish.
- Yomonlik ketidan uni yuvib yuboradigan yaxshilik qilish.
- Omonatga xiyonat qilmaslik va ahdga vafo qilish.
- Kattani hurmat, kichikni izzat qilish.
- O‘zgalarning g‘am-qayg‘usi va dardiga sherik bo‘lish.
- Tilni yomon so‘zlardan saqlab faqat yaxshi so‘zlarni aytish.
- Musulmonlar obro‘sini saqlash.
- Qalbni baxillik va hasaddan pok tutish.
- Insonlar orasida adolat bilan hukm qilish.
- Musulmonlarga yaxshi ishlarda ko‘maklashish.
- Boshiga kulfat yog‘ilgan kishiga yordam berish.
- Yaxshilikka chaqirayotgan kishining chaqirig‘iga labbay deyish.
- Yaxshi ish qilgan kishiga minnatdorchilik bildirish va munosib mukofotlash.
- Shavvol oyidan olti kun ro‘za tutish.
Ko‘kaldosh o‘rta maxsus islom bilim yurti mudarrisi BARATOV G‘iyosiddin manbalar asosida tayyorladi
Ulug‘ allomalarning munosib izdoshlari
Yagona Vatan, yagona xalq bo‘lib, yangi hayot va kelajak yaratamiz!
Bugungi tahlikali dunyoda xalqimiz, ayniqsa, yoshlarga islom mohiyatini to‘g‘ri tushuntirib berish, jaholatga qarshi ma’rifat bilan kurashish har qachongidan dolzarb ahamiyat kasb etmoqda. Shu bois, yurtimizda diniy ta’lim sifatini yanada oshirish bo‘yicha tizimli ishlar amalga oshirilmoqda.
Shavkat MIRZIYOЕV,
O‘zbekiston Respublikasi Prezidenti
Imom Buxoriy nomidagi Toshkent islom instituti ilk magistrlari tahsilni tamomladi
Donishmandlarning “Agar sizning rejangiz bir yillik bo‘lsa — sholi eking. O‘n yillik bo‘lsa — daraxt o‘tqazing. Agar bir asrlik bo‘lsa — farzandlaringizga ta’lim-tarbiya bering” degan hikmatli gapi bor.
Jamiyat ravnaqiga, Vatan taraqqiyotiga, xalq farovonligiga ta’lim-tarbiyachalik xizmat qiladigan boshqa biror fenomen bo‘lmasa kerak. Har bir davrning o‘ziga yarasha sarmoyadorlari, tujjorlari bo‘lgan. Lekin ularning nomlari tarix sahifalarida juda kam uchraydi, ayrimlari izsiz yo‘q bo‘lib ketgan. Lekin umrini sivilizatsiyalar taraqqiyotiga bag‘ishlagan mutafakkirlar, qomusiy allomalar, ma’rifat chirog‘i ostida elini buyuk orzular, nurafshon kunlar sari yetaklagan millat oydinlari, ulamolarning nomlari asrlar osha barhayotdir.
Prezidentimiz lavozimiga saylanishi bilanoq barcha sohalar qatori diniy-ma’rifiy yo‘nalishda ham ulkan islohotlarni boshlab berdi. Bu borada davlatimiz rahbarining 2018 yil 16 apreldagi “Diniy-ma’rifiy soha faoliyatini tubdan takomillashtirish chora-tadbirlari to‘g‘risida”gi farmoni muhim huquqiy asos bo‘ldi. Ushbu hujjatda qator ustuvor yo‘nalishlar, xususan, Imom Buxoriy nomidagi Toshkent islom instituti va boshqa diniy ta’lim muassasalari hamda ilmiy-tadqiqot markazlari faoliyatini yaxshilash, moddiy-texnik bazasini mustahkamlash, diniy ta’lim muassasalari huzurida fuqarolarga Qur’oni karimni o‘rgatish bo‘yicha maxsus kurslar tashkil etish belgilangan.
Son emas, sifat muhim
Ilm dargohining ulug‘vorligi uning binolari yoki talabalari soni bilan emas, balki u yerdan yetishib chiqadigan ilmli, odobli, Vatani va millatiga sidqidildan xizmat qiladigan yetuk va salohiyatli kadrlar bilan o‘lchanadi. Yuzlab uchqunlar birgina quyoshning ziyosini to‘sa olmagani singari chinakam qadr-qiymat sonda emas, sifatdadir. Yangi O‘zbekistonda oliy va o‘rta maxsus islom ta’lim muassasalari faoliyatida ham asosiy mezon ta’lim sifati, ilmiy salohiyat, ma’naviy tarbiya va jamiyatga munosib xizmat qiladigan mutaxassislarni voyaga yetkazishda.
Mustaqillikning dastlabki chorak asrida O‘zbekiston musulmonlari idorasi tizimida 9 ta o‘rta maxsus islom ta’lim muassasasi va Toshkent islom instituti faoliyat yuritgan bo‘lsa, Prezidentimiz tashabbusi bilan 2017 yilda Buxoro shahrida Mir Arab oliy madrasasi, 2018 yilda Samarqand viloyatida Hadis ilmi maktabi, 2020 yilda Termiz shahrida Imom Termiziy o‘rta maxsus islom ta’lim muassasasi, 2024 yilda Imom Termiziy nomidagi islom instituti tashkil etildi.
Bugungi kunda O‘zbekiston musulmonlari idorasi tizimida 4 ta oliy, 10 ta o‘rta maxsus islom ta’lim muassasasi (shundan ikkitasi ayol-qizlarga ixtisoslashgan) faoliyat ko‘rsatmoqda. Ularda tahsil olayotgan ikki yarim mingdan ziyod talabaga 500 ga yaqin professor-o‘qituvchi saboq berib kelmoqda.
Diniy soha xodimlarining asosiy qismini tashkil etadigan imom-xatiblarning bilim va malakalarini yanada oshirish, o‘rta maxsus diniy ma’lumotga ega imom-xatiblarni oliy diniy ma’lumotli kadrlar bilan almashtirish maqsadida 2019 yilda Toshkent islom institutida modul ta’lim tizimi joriy qilindi. Mazkur ta’lim tizimida 5 yillik mehnat stajiga ega bo‘lgan imom-xatiblar tanlov asosida o‘qishga qabul qilinib, ishdan ajralmagan holda 3 yil davomida tahsil oladi. Bugungi kunga qadar bu ta’lim yo‘nalishi bo‘yicha 600 dan ziyod imom-xatib oliy ma’lumotga ega bo‘ldi.
Prezidentimizning 2023 yil iyun oyida Surxondaryo viloyatiga tashrifi chog‘ida bergan topshirig‘i ijrosi yuzasidan 2024-2025 o‘quv yilida ta’limning uzviyligi va uzluksizligini ta’minlash, tor yo‘nalishlar bo‘yicha yetuk kadrlarni tayyorlash maqsadida Imom Buxoriy nomidagi Toshkent islom institutida magistratura mutaxassisligi tashkil etilgan edi.
Joriy yilda ilk 10 bitiruvchi “Islom ilohiyoti, falsafasi va moturidiylik ta’limoti” va “Hadis ilmlari” yo‘nalishi bo‘yicha magistratura mutaxassisligini muvaffaqiyatli tamomladi. Yaqinda O‘zbekiston musulmonlari idorasining katta majlislar zalida magistrlarga tantanali ravishda diplom topshirish marosimi bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiqjon Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, vazirlik va idoralar vakillari, taniqli ulamolar, imom-xatiblar, soha faxriylari, pedagog-o‘qituvchi va talabalar hamda OAV vakillari ishtirok etdi.
Prezident maslahatchisi Muzaffar Komilov ilk bitiruvchilarni samimiy qutlab, tegishli pul mukofoti sertifikatlarini har bir magistrga tantanali ravishda topshirdi. Muftiy Shayx Nuriddin Xoliqnazar hazratlari bitiruvchilarni o‘qishini muvaffaqiyatli tamomlagani bilan muborakbod etib, katta tarixiy voqea bo‘lganini alohida ta’kidladi. Muftiy hazratlari ilk magistrlarning oylik ish haqiga O‘zbekiston musulmonlari idorasi tizimida 20 foiz miqdorida ustama haq to‘lab berilishini e’lon qildi. Bitiruvchi magistrlar O‘zbekiston musulmonlari idorasining markaziy apparati, Imom Termiziy ilmiy-tadqiqot markazi, oliy va o‘rta maxsus islom ta’lim muassasalariga ishga taqsimot qilindi.
Tarix takrorlanib turadi
O‘zbekiston qadimdan buyuk allomalar, ulug‘ mutafakkirlar yurti sifatida e’zozlanadi, qadrlanadi. Tarixda yurtimiz allomalari butun dunyoga ustozlik qilgan, jahon ilm-fani rivojiga beqiyos hissa qo‘shgan.
2024 yil 15-16 oktyabr kunlari Toshkent va Xiva shaharlarida “Islom — tinchlik va ezgulik dini” mavzusida o‘tkazilgan xalqaro konferensiyada ishtirok etgan Shayx Muhammad Avvoma hafizahulloh “Yurtingizning har qadamida ulug‘ allomalarning xoki bor. Bu zamin ilm va ulamolar yurtidir. Endi sizlarning vazifangiz ana shu buyuk merosni qayta tiriltirish va dunyoga tanitishdir”, degan edi. Haqiqatan, Birinchi va Ikkinchi Renessans davrida butun dunyo O‘zbekistonga, Imom Buxoriy, Imom Termiziy, Abu Rayhon Beruniy, Muhammad al-Xorazmiy, Abu Nasr Forobiy, Abu Ali ibn Sino, Mirzo Ulug‘bek, Alisher Navoiylarga qanday talpingan bo‘lsa, bugun ham Uchinchi Renessans poydevori qo‘yilayotgan yurtimizga dunyo afkor ommasining qiziqishi tobora ortib boryapti.
Xalqimizda “Tarix takrorlanib turadi”, “Oqqan daryo oqaveradi” kabi ajoyib maqollar, naqllar bor. Chindan ham IX-XII hamda XIV-XV asrlarda yuksak aqlu zakovati, teran tafakkuri, boy ma’naviy-ma’rifiy salohiyati bilan butun dunyoni zabt etgan buyuk ajdodlarimiz singari bugun yangi O‘zbekistonda tahsil olayotgan yoshlar ham bobolarimizning munosib izdoshi sifatida tarixni takrorlashga astoydil kirishgan. Ular orasida Imom Buxoriy nomidagi Toshkent islom instituti magistratura yo‘nalishini tamomlagan o‘n nafar iqtidorli bitiruvchi ham bor. Ularni O‘zbekistonning yetuk mutaxassislari, Prezident kadrlari deya baralla ayta olamiz. Kelgusidagi faoliyatlariga Alloh taolodan ulkan muvaffaqiyatlar tilaymiz.
Salohiddin ShЕRXONOV,
O‘zbekiston musulmonlari idorasi bo‘lim boshlig‘i
"Yangi O‘zbekiston" gazetasining 2026 yil 6 avgust sonidan
