Ezgulik ziyorati
Joriy yilning 5-6 aprel kunlari ko‘rish, eshitish va nutqida imkoni cheklanganlar bilan Buxoro viloyatiga MUSLIM TOUR tomonidan ziyorat uyushtirildi.
Buxoroda ziyoratchilarni MUSLIM TOUR xodimlari gidlar bilan birgalikda kutib olishdi. Buxoro shahridagi “Mir arab” madrasasi, “Masjidi Kalon” masjidi, Labi hovuz, “Bahouddin Naqshband”, “Sayyid Mir Kulol” ziyoratgohlariga sayohat uyushtirildi.
Ziyorat davomida ko‘zi ojiz insonlarimizga eshitish va nutqida imkoniyati cheklanganlar ixlos bilan yordam berishdi. Ikkita jamiyat a’zolarini bir-birlarini qo‘llab-quvvatlashlari atrofdagi insonlarning ko‘z yoshlariga sabab bo‘ldi.
Avtobusda ziyoratgohlarga ketayotgan vaqtda ko‘zi ojizlar tomonidan aytilgan go‘zal nashidlarga kar-soqovlarimiz ixlos bilan, o‘z harakatlari bilan birgalikda qo‘shilib jo‘r bo‘ldilar.
Ziyoratdan go‘zal taassurotlar bilan qaytar ekanmiz, ko‘zi ojiz Abdurahim xoji otaning so‘zlari yuraklarga muhrlandi: “Ziyoratni tashkil qilganlar, homiy bo‘lganlar, bizlarga ziyorat vaqtida yordam bergan yaqinlarimizga chin qalbimizdan minnatdorchilik bildiramiz. Alhamdulillah, ilm markazi bo‘lib kelgan Buxoroga borishdek orzuimni ushalishi meni behad quvontirdi”
Ziyoratni tashkil qilishda imkoniyati cheklanganlardan ikkita jamiyat a’zolarini birga olib ketish bir oz qiyinchilik tug‘dirishi mumkinligini o‘ylagan edik. Ammo aksincha, ular imkoniyati cheklangan bo‘lishiga qaramasdan bir-birlariga chin yurakdan yordam berishlarini ko‘rib xursand bo‘ldik.
Imkoniyati cheklanganlar MUSLIM TOUR rahbari B.Toshpo‘latov va barcha xodimlarga, “Vaqf” xayriya jamoat fondiga, homiylarga o‘z minnatdorchiliklarini izhor qilishdi.
Alloh taolo ularga ko‘ngli yarim insonlarning ko‘nglini olib, Ka’bani obod qilganlik savoblarini nasib etsin!
Munira ABUBAKIROVA
O‘zbekiston musulmonlari idorasi mutaxassisi
Siz orzu qilasizmi yoki maqsadmi...?
Bismillahir Rohmanir Rohiym
Agar maqsad va orzularingiz yozilgan kundaligingizni ko‘rsatsangiz, men sizga besh yildan keyin qayerda bo‘lishingizni yoki nima bilan shug‘ullanishingizni aytib bera olmayman. Ammo kundalik odatlaringizni ko‘rsatsangiz, besh yildan keyin qanday insonga aylanishingizni taxmin qila olaman.
Unutmang! Kelajak faqat maqsadlar bilan qurilmaydi. U har kuni takrorlanadigan kichik odatlar ipidan to‘qiladi.
Xulosa shuki, agar kelajagingizni bilmoqchi bo‘lsangiz, maqsadlaringizga emas, kundalik odatlaringizga e’tibor bering.
Har bir insonning o‘z maqsadlari bor. Kimdir 10 million so‘m topishni, kimdir 10 kilogramm vazn tashlashni, yana kimdir esa YouTubeda mashhur bo‘lishni orzu qiladi…
Biroq maqsadning o‘zi yo‘lni belgilamaydi. Yo‘lni kundalik odatlar belgilaydi. Masalan, 10 kilogramm ozishni istagan inson bunga faqat sog‘lom ovqatlanish va muntazam mashq qilishni odatga aylantirsagina erisha oladi.
Aksariyat odamlar esa bir necha kun tartibga amal qiladilar, keyin yana eski odatlariga qaytib ketadilar. Natijada, ularning maqsadlari devorga ilingan chiroyli rasmdek qolib ketadi. Chunki maqsad odatga aylanmadi.
Maqsad qo‘yish oson. Ammo odatni shakllantirish sabr, intizom va mehnat talab qiladi.
Odat bu – muntazam takrorlanadigan, vaqt o‘tishi bilan inson tabiatining bir qismiga aylanadigan xatti-harakatdir. Shunday darajaga yetadiki, uni deyarli o‘ylamasdan bajarasiz.
Aynan kundalik odatlar odamlar o‘rtasidagi eng katta farqni yuzaga keltiradi. Agar odatlaringizni yaxshilasangiz, maqsadlaringizga yaqinlashasiz.
Demak, har kuni odatlarimizni oz bo‘lsa-da, yaxshilashga intilishimiz kerak. Ana shu kichik, ammo barqaror qadamlar hayotimizda katta o‘zgarishlarni boshlaydi.
Biz har kuni yaxshiroq bo‘lishni tanlasak, kelajagimiz ham shunga yarasha go‘zal bo‘ladi.
Oisha roziyallohu anhodan rivoyat qilinadi: «Rasululloh sollallohu alayhi vasallamdan “Qanday amal Alloh uchun eng mahbubdir?”, deb so‘raldi. U zot alayhissalom: “Oz bo‘lsa ham, davomlisi”, dedilar» (Imom Termiziy rivoyati).
Sizning qanday maqsadlaringiz bor? So‘nggi kunlarda qaysi maqsadlaringizga erishish uchun harakat qilyapsiz?
Davron NURMUHAMMAD
