“Jahon halol sammiti – 2023” Istanbulda o'tkaziladi
Jahon halol sammiti 2023 yilning 23-25 noyabr' kunlari Istanbul ko'rgazma markazida (IFM) bo'lib o'tadi.
“IQNA” saytining “Islam today” ga tayanib xabar berishicha, mazkur sammitning “Discover Events” kompaniyasi tomonidan Islom hamkorlik tashkiloti (IHT) vakolatli muassasasi Islom mamlakatlari standartlari va metrologiyasi instituti (SMIIC) bilan hamkorlikda o'tkazilishi reja qilingan.
Butunjahon halol sammiti tashrif buyuruvchilarni halol sanoati sohasidagi so'nggi ishlanma va yangiliklar bilan tanishtiruvchi dunyodagi eng yirik tadbir bo'lib, xalqaro olimlar va dunyoning turli burchaklaridan kelgan fiqh mutaxassislari ishtirokida o'tkaziladi.
Bu yilgi sammit “Global halol iqtisodiyotga kirish eshigi: potentsialni ochish” mavzusiga bag'ishlangan. Sammit halol sanoatning turli sohalarida ishtirokchi, tadqiqotchi va ekspertlar o'rtasida bilim va malaka almashish va hamkorlik qilish uchun qulay muhit yaratishga qaratilgan.
O'zbekiston musulmonlari idorasi
Matbuot xizmati
Indoneziya Haj va Umra vaziri Buxoroga tashrif buyurdi
7–8 sentabr kunlari Indoneziya Haj va Umra vaziri Muhammad Irfon Yusuf boshchiligidagi delegatsiya Buxoro viloyatiga tashrif buyurdi.
Mehmonlarni temir yo‘l vokzalida viloyat hokimi o‘rinbosari B.Shahriyorov, A.Qalandarovlar boshchiligidagi mutasaddilar kutib oldi.
Hokim o‘rinbosari B.Shahriyorov, A.Qalandarov , turizm boshqarmasi boshlig‘i A.Rajabov va bosh imom-xatib J.Elov ishtirokidagi uchrashuvda Buxoroning islom sivilizatsiyasi tarixidagi o‘rni, muqaddas qadamjolar va allomalar merosini targ‘ib qilish, ziyoratchilar oqimini oshirish hamda yangi ziyorat turizmi yo‘nalishlarini shakllantirish masalalari muhokama qilindi.
Jakarta–Buxoro yo‘nalishida charter va to‘g‘ridan to‘g‘ri aviaqatnovlar yo‘lga qo‘yish imkoniyatlari ham ko‘rib chiqildi.
Imom al-Buxoriy, Abduxoliq G‘ijduvoniy va Bahouddin Naqshband merosini Indoneziyada targ‘ib qilish maqsadida Jakartadagi oliy ta’lim muassasalari va turistik kompaniyalarda ma’ruza hamda targ‘ibot tadbirlarini tashkil etish taklif qilindi.
Delegatsiya Bahouddin Naqshband majmuasi va Buxoroning tarixiy markazlari bilan tanishib, shaharning ziyorat turizmi salohiyati haqida ma’lumot oldi.
Tashrif — Buxoro va Indoneziya o‘rtasidagi ziyorat turizmi, diniy-ma’rifiy hamda madaniy aloqalarni yangi bosqichga olib chiqish yo‘lidagi muhim qadam bo‘ldi.
O‘zbekiston musulmonlari idorasi Matbuot xizmati
