Temirchi usta va Bishr o‘rtasidagi suhbat
Bishr Hofiy rahimahulloh avvallari otalaridan qolgan molu davlatni sarflab, kayfu safo qilib yurdilar. Keyin bir taqvodor temirchiga shogird tushib, uning nasihatlarini tinglaganlaridan so‘ng qilgan xatolarini anglab, tavba qildilar va ulug‘ olimlardan biri bo‘ldilar. Quyida ana shu temirchi bilan Bishr o‘rtasidagi suhbatni e’tiboringizga havola etamiz.
- Yaxshi, qo‘ling tez kelishdi. Bolg‘ani o‘z vaqtida ur! Oldin yoki keyin urmagin! Bir xil ohangda va ehtiyot bo‘lib ur! Qara, Bishr, ko‘ryapsanmi? Temir ham yupqalashdi. Ana shunday. Asta-sekin yumshab, boshqacha shaklga kiradi.
- Ha, usta. Haqiqatan chiroyli shaklga kirdi. Qaniydi men ham shunga o‘xshab o‘zgarsam.
- Yongan o‘zgaradi. (Ya’ni nafs tarbiyasi bilan mashg‘ul bo‘lib, o‘zini tuzatib, oxirat uchun harakat qilgan, Allohning aytganini qilib, qaytarganidan qaytgan, Allohni sevgan kishi o‘zgaradi).
- Yongan?
- Ha. Yonish kerak!
- Yonmoq istayman! Yonishim kerak! Yonish! Menga yonishni o‘rgating, usta!
- Bu juda qiyin ish!
- Chidayman!
- Har lahza tavba qilish kerak!
- Tavba qildim!
- Harom luqma yema!
- Yemayman!
- Harom joyga borma!
- Bormayman!
- Zino qilma!
- Qilmayman!
- Kibrlanma!
- Yana!
- Haq bo‘lsang ham janjallashma!
- Yana!
- Omonatga xiyonat qilma!
- Yana!
- Birovning dilini og‘ritma!
- Yana!
- Birovning haqqini yema!
- Tavba qildim! Harom yemayman! Yolg‘on gapirmayman! Birovning dilini og‘ritmayman! Hech kim bilan janjal qilmayman! Birovning omonatiga xiyonat qilmayman! Kibrlanmayman!
- Olov temirni qizdirgani kabi Alloh sening gunohlaringni yoqib, kulga aylantirsin!
Nozimjon Iminjonov tayyorladi
Turkiy davlatlar muftiylari 10 ga yaqin muhim bayonot va fatvolarni imzoladilar
Xabar berganimizdek, Ozarbayjon poytaxti Boku shahrida Turkiy davlatlar muftiylari kengashining navbatdagi VII yig‘ilishi bo‘lib o‘tdi.
Yig‘ilish yakunida O‘zbekiston, Turkiya, Ozarbayjon, Qozog‘iston va Qirg‘iziston muftiylari muhim yo‘nalishlarda 3 ta bayonot va zamonaviy masalalarga oid 6 ta yirik fatvoni imzolashdi.
Jumladan, «Islomning ilm-fan va texnologiyaga yondashuvi» mavzusidagi bayonotda Islom dinida insoniyat farovonligiga xizmat qiluvchi barcha ilmiy va texnologik yutuqlar qo‘llab-quvvatlanishi bilan birga, ular yuksak axloqiy mezonlar, adolat va mas’uliyat tamoyillari asosida rivojlanishi shartligi ta’kidlandi.
«Musulmonligi ma’lum bo‘lgan shaxsni kofirga chiqarishning hukmi» to‘g‘risidagi bayonotda Islom ta’limotiga ko‘ra, kalimai shahodat keltirib, qibla ahlidan bo‘lgan har qanday shaxs musulmon hisoblanishi hamda qilgan gunohi yoki amaldagi nuqsoni tufayli uni kufrda ayblash (takfir qilish) qat’iyan man etilishi aytildi. Shuningdek, Turkiy davlatlar ulamolari ushbu bayonotda jamiyatda fitna, qon to‘kilishi va nizolarga sabab bo‘luvchi takfirchilik oqimlariga qarshi ilmiy-ma’rifiy kurashni kuchaytirish, ummat birdamligini mustahkamlash zarurligiga e’tibor qaratishdi.
«Oila qurishga targ‘ib qilish, uni muhofaza qilish va mustahkamlashga doir umumiy mas’uliyat» bayonotida Islom ta’limotiga ko‘ra, oila nikoh asosiga quriladigan, sog‘lom avlod va jamiyat davomiyligini ta’minlovchi, insonga ruhiy xotirjamlik hamda axloqiy tarbiya beruvchi muqaddas muassasa ekaniga urg‘u qaratildi. Muftiylar oila institutini himoya qilish, yoshlarni oilaga tayyorlash va milliy-ma’naviy qadriyatlarni mustahkamlashda birdamlikka chaqirdilar.
Shuningdek, muftiylar tomonidan «Bitta qabrga birdan ortiq mayyitni dafn etishning hukmi», «Ijaraga berilgan dehqonchilik yerlarining ushri», «Fatvo so‘rash va fatvo berishda sun’iy idrokdan foydalanish masalasi», «Juma namozi durust bo‘lishining shartlari», hijriy oy boshlanishini aniqlash mezonlari va takfir masalasiga doir 6 ta fatvo matni imzolandi.
O‘zbekiston musulmonlari idorasi Matbuot xizmati
