Mazhablar birdamlik ramzi
Imom Ali ibn Abdulloh Samhudiy rohimahulloh bunday deganlar: “Bilingki, ushbu to'rt mazhabdan birini ushlashda katta foyda bor. Undan yuz o'girishda esa katta muammo va ixtiloflar bor. Bir mazhabda yurishdagi foydalardan biri – sahoba va tobeinlarning shariat ilmini o'rganishdagi odatlariga ergashishdir. Chunki tobeinlar shariat ishida bir-birlariga yoki sahobalarga ergashar edi. Sahobalar esa Rasulullohga yoki bir-birlariga ergashganlar”.
“Iqdul farid fi ahkomit-taqlid” kitobidan
Alloh ularni yaxshi ko‘radi
"Ular yengillikda ham, og‘irlikda ham nafaqa qiladiganlar, g‘azabini yutadiganlar va odamlarni afv qiladiganlardir. Alloh yaxshilik qiluvchilarni yoqtiradir" (Oli Imron surasi, 134-oyat).
Rasululloh sollallohu alayhi vasallam aytadilar: "Kim jannatda binolar qurilishini va darajalari ko‘tarilishini xohlasa, zulm qilganni afv etsin, bermaganga bersin va orani uzganga silai rahm qilsin" (Imom Hokim rivoyati).
Boshqa hadisda Nabiy alayhissalom: "Qiyomat kuni bir jarchi, odamlarni afv qilganlar qani? "Robbingiz huzuriga mukofotingizni olgani keling", deb chaqiradi. Afv qilgan har bir musulmon jannatga kirishga haqlidir", deganlar.