Ma’lumki, har yili an’anaviy tarzda O‘zbekiston musulmonlari idorasi tizimida faoliyat ko‘rsatib borayotgan imom-xatiblar o‘rtasida “Yil imomi” ko‘rik tanlovi o‘tkazib kelinar edi. Joriy yildan esa mazkur tanlov “Eng ma’rifatli imom” nomi ostida yangi Nizom asosisida o‘tkazib kelinmoqda.

Tanlovning maqsadi – bugungi taraqqiyot talablariga javob beradigan, kuchli ilmiy salohiyatga ega, tashabbuskor, ilg‘or fikrli, zamonaviy axborot texnologiyalaridan yetarlicha foydalana oladigan va keng xalq ommasiga o‘z fikrini yetkazib bera oladigan, iqtidorli, faol imom-xatiblarni aniqlashdir.

Uch bosqichda o‘tkazilishi rejalashtirilgan tanlovning birinchi shahar-tuman bosqichida g‘oliblikni egallagan ishtirokchilar 10 oktyabr kuni Quvasoy shahridagi “Islom” jome’ masjidida viloyat bosqichida ishtirok etdilar.

Viloyat bosqichini tantanali ravishda ochib bergan viloyat bosh imom-xatibi Salimjon qori Qodirov:

- Bu yilgi tanlov har yilgidan o‘zgacha tarzda o‘tkazilmoqda. Bu esa yurtimizda diniy-ma’rifiy sohaga, xususan, ilm ahliga ko‘rsatilayotgan e’tibor namunasidir. Shuningdek, barcha imom-xatiblar, imom-noiblari, hatto muazzin va qorovullar ham o‘z ustida muntazam ish olib borishi kerak degani. Zero bugungi tadbirda g‘oliblar qatori masjidlarda jonkuyarlik bilan xizmat qilib kelayotgan bir guruh xodimlar ham taqdirlanadi, - deya barcha ishtirokchilarga omad va muvaffaqiyatlar tiladi.

O‘zbekiston musulmonlari idorasi bo‘lim mudiri Islomiddin Zuhriddinov ham tanlov kuzatib borar ekan:

- Haqiqatan mazkur tanlovga Farg‘ona viloyatida katta tayyorgarlik ko‘rilganini ta’kidladi. Bugungi imkoniyatdan foydalanib, har bir imom-xatib o‘z bilim va salohiyati, din rivoji va xalq farovonligi yo‘lida olib borajak xizmatlari ila ana shunday e’tibor va e’tirofga munosib bo‘lmoqqa intilishi kerak”, - deya qayd etdi.

Qur’on tilovati bilan boshlangan tanlovda ishtirokchilarning chiqishlari hakamlar hay’ati tomonidan baholanib borildi hamda tanlov so‘ngida natijalar e’lon qilindi:

“Eng ma’rifatli imom – 2018” tanlovining Farg‘ona viloyat bosqichi g‘oliblari:

I-o‘rin: Abduvohid Ahmadaliyev (Marg‘ilon shahridagi “Xudoyorhoji” masjidi imom-noibi)

II-o‘rin: Abdujabbor Madrahimov (Toshloq tumanidagi “Abu Hanifa” masjidi imom-noib)

II-o‘rin: Davronbek Usmonov (Farg‘ona tumani “Huvaydo” masjidi imom-xatibi)

III-o‘rin: Jaloliddin Mamatqulov (Uchko‘prik tuman “Shoh muqaddam” masjidi imom-xatibi)

III-o‘rin: Sherzod Ahmedov (Dang‘ara tumani “Muhammadsayyidxo‘ja” masjidi imom-xatibi)

Tanlov yakunida O‘zbekiston musulmonlari idorasi viloyat vakilligi tomonidan barcha g‘oliblarga diplom va esdalik sovg‘alari taqdim etildi.

Masjid xodimlari faoliyatini yanada jonlantirish, o‘z ishlariga yanada ko‘p mehr bilan yondoshib, ular bajarayotgan ish samaradorligini oshirish maqsadida tanlovga hamohang ravishda turli nominatsiyalar bo‘yicha mukofotlar topshirildi:

"Eng targ‘ibotchi imom"

- Abdumajid domla Isaqov (Qo‘qon shahar bosh imom xatibi)

“Eng ko‘p obuna uyushtirgan imom”

- Ahmedov Sohibjon (Bag‘dod tumani bosh imom-xatibi)

“Eng ko‘p maqola nashr etgan imom”

- Jalilov Rahmatillo (Qo‘shtepa tumani bosh imom-xatibi)

 “Eng obod masjid”

- Quvasoy shahar Ahmadali bobo masjidi (masjid imom-xatibi Abdujamilov Asliddin)

"Eng targ‘ibotchi imom"

- Abdumajid domla Isaqov (Qo‘qon shahar bosh imom xatibi)

“Eng ta’sirli ijodiy ish”

- Rahmatullo Fayzullayev (Marg‘ilon shahar “Robiyahoji ona” masjidi imom-xatibi, “Marg‘ilon allomalari” rukni ostida chop etilayotgan adabiyotlari uchun)

“Eng xushovoz muazzin”

- Mirahmedov Adaxamjon (Oltiariq tuman “Shoh Tolib” masjidi muazzini)

“Eng ishbilarmon mutavalli”

- Mamasaidxonov Salohiddin (Rishton tumani Ho‘ja ilg‘or masjidi mutavallisi)

“Eng mirishkor bog‘bon”

- Ahmadaliyev Mansurjon (Beshariq tumani  Umar ibn Abdulaziz masjidi bog‘boni)

“Eng namunali tahoratxona”

- Farg‘ona shahar “Toyyiba” masjidi  tahoratxonasi (masjid imom-xatibi Baxramov Azizxon)

“Eng zamonaviy qorovulxona” 

– Marg‘ilon shahar «Shirmonpazlik» masjidi qorovulxonasi (masjid imom-xatibi Toshxo‘jayev Fazlulloh)

“Eng boy kutubxona”

- Qo‘qon shahar “Shayxul-islom” masjidi kutubxonasi (masjid imom-xatibi Fazliddin Salimov)

Shuningdek, O‘zbekiston, Uchko‘prik, Dang‘ara, Furqat, Buvayda, Toshloq, Quva, Farg‘ona, Yozyovon tumanlari  imom-xatiblari viloyat vakillikning tashakkurnomalari bilan taqdirlandilar.

Farg‘ona viloyat vakillik matbuot xizmati │ fargonaziyo.uz