O‘zbekiston musulmonlari idorasi raisi, muftiy Usmonxon Alimov hazratlari xalqaro anjumanda ishtirok etish uchun Bishkek shahrida bo‘lib turganlari haqida ma’lum qilgan edik.

Muftiy hazratlarining tashriflari qirg‘izistonlik musulmonlarning qalblarini quvonchga to‘ldirdi. Buni Qirg‘iziston musulmonlari idorasi raisi Maqsadbek To‘xtamishev Usmonxon Alimovga ikki tomonlama uchrashuv vaqtida ma’lum qildi. Qirg‘iziston muftiysi O‘sh viloyati musulmonlari muftiy Usmonxon Alimov hazratlari bilan uchrashishga mushtoq ekanliklarini ham qayd etib o‘tdi. Yoshi ulug‘ oqsoqollar uchrashish uchun Bishkekka kela olishmaganini, imkoniyat paydo bo‘lganda O‘shga tashrif buyurishlarini taklif qilishgani aytildi.

Muftiy hazratlari Qirg‘iziston muftiysiga ko‘rsatilgan ehtirom, yuqori saviyada o‘tkazilgan xalqaro anjuman uchun minnatdorlik bildirdilar.

Bundan tashqari, O‘MI Xalqaro aloqalar bo‘limi mudiri M.A.Shokirovning ma’lum qilishicha, Rossiya musulmonlari diniy idorasi raisi Ravil Gaynutdin bilan o‘tgan uchrashuv so‘nggida Muftiy Usmonxon Alimov hazratlarini joriy yilning dekabr oyi birinchi o‘n kunligida Fransiyada o‘tkaziladigan konferensiyaga taklifnoma taqdim etilgan.

Rossiya muftiysi yevropalik musulmonlar Markaziy Osiyo, Rossiya, Ozarbayjon musulmonlari bir birlari bilan inoqlikda, ahil yashashlariga yuqori baho berishini bildirganlarini hamda bu to‘g‘risida Yevropa minbarlarida ma’ruza qilishlari lozim ekanini aytib o‘tdi. Bunga qanday erishilganini bilishga qiziqayotganliklarini ta’kidladi.

Mamlakatlarimiz orasida hamkorlik yangi yil taqvimlarini bamaslahat, Hayit va Ramazon oyi sanalarining birgalikda tuzilganida va boshqa ko‘plab uchrashuvlarda namoyon bo‘ladi.

Joriy yildagi Haj mavsumida Minoda ozarbayjon, qozoq, qirg‘iz, o‘zbek, tojik haj delegatsiyalarining uchrashib bir-birlarini tabriklaganliklari, suhbatlar tashkil etilgani ham bu hamkorlikning yaqqol dalili ekani ta’kidlandi.

Uchrashuvda ziyorat turizmini ommalashtirish masalasiga ham to‘xtalib o‘tildi. Qirg‘izistonliklarning ziyorat maqsadida kelayotganliklari sohadagi ishlar yaxshi yo‘lga qo‘yilgani anglatadi.

Muftiylar o‘zaro hadyalar almashishdi.

O‘MI Matbuot xizmati