Qadimiy ilm maskanida ta’lim boshlandi
Nafaqat yurtimiz balki xorijiy mamlakat aholisining diniy ehtiyojini qondirgan, ilm ma’rifat ulashgan ziyo maskani bo‘lmish Mir Arab madrasasi o‘zining ta’limu-tadris jarayonini boshladi. O‘zbekiston Musulmonlari idorasi tasarrufidagi diniy ta’lim muassasalari qatori shonli tarixga ega bilim o‘chog‘i 5-sentyabr kuni erta tongda bilimlar kunini qarshi oldi. Unda bilim yurtining barcha ishchi-xodimlari, o‘qituvchilar va talabalar ishtirok etishdi.
Bilim yurti ma’naviyat va ma’rifat ishlari bo‘yicha mudir muovini A. Najmiddinov ochib berar ekan, avvalo barchani yangi 2018-2019 o‘quv yilining kirib kelishi munosabati bilan tabrikladi. An’anaga muvofiq tadbir avvalida O‘zbekiston Respublikasining madhiyasi yangradi. Shundan so‘ng bilim yurti 4 kurs talabasi A.Axmadjonov Kuroni Karimdan tilovat kildi va duoyi-xayr qilindi. Bilim yurti mudiri J.Elov yangi o‘quv yilida qilinishi lozim bo‘lgan ishlar, ta’lim samaradorligini yanada oshirish uchun ko‘zlangan maqsadlar hamda talabalarni ta’lim-tarbiya olishlari uchun yaratilgan sharoitlar haqida batafsil gapirdi. Istiqlol yillarida erishilgan yutuqlar, O‘zbekiston musulmonlari idorasi tasarrufidagi ta’lim muassasalari o‘quv jarayonlaridagi ijobiy o‘zgarishlar hamda yoshlarni milliy g‘urur, vatanparvarlik, milliy birdamlik, halollik, mehnatsevarlik asosida kamol toptirish uchun tavsiyalari tinglandi.
So‘ng tadbirga tashrif buyurgan ta’lim fidoyilari Bahouddin Naqshband jome’ masjidi imom xatibi A. Razzoqov, BDU filologiya fanlari nomzodi, dots.nt, faxriy mudarris N. Shukrulloyev hamda bilim yurti katta mudarrisi Q. Siddiqovlar talabalarga o‘zlarining ko‘p yillik tajribalaridan kelib chiqib nasihat qildilar. bu bilim dargohida ta’lim-tarbiya jarayonlari, o‘tgan ulamolarimizning o‘gitlari hamda dinimizdagi ilm va olimning fazilati haqidagi ko‘rsatmalarini oyat va hadislardan misollar bilan tushuntirib berdilar. Birinchi qo‘ng‘iroq sadolari ostida talabalar “Mustaqillik darsi”ga kirdilar.
Bilim yurtida tahsil olish uchun barcha shart-sharoitlar yaratilgan bo‘lib, uzoq viloyatlardan kelgan talabalarga shinam yotoqxonalar bilan ta’minlandi. Talabalarga har kuni ikki mahal issiq ovqat yangi bino qilingan, barcha qulayliklarga ega oshxonada berila boshladi.
Tolibi ilmlarga toat-ibodatlarini mukammal qilishlari uchun homiylar orqali keng va zamonaviy tahoratxona ishga tushirilgan. O‘quv kunining avvali mana shunday qulay taassurotlar bilan boshlandi.
Ma’naviyat va ma’rifat ishlari
bo‘yicha mudir muovini: A. Najmiddinov
Malayziya telekanalida O‘zbekistonning ziyorat turizmi imkoniyatlari keng yoritildi
Malayziyaning “Berita RTM” telekanalida O‘zbekistonda ziyorat turizmi sohasida amalga oshirilayotgan islohotlarga bag‘ishlangan maxsus dastur namoyish etildi, deb xabar bermoqda “Dunyo” AA.
Mamlakatimiz mustaqilligining 35 yilligi arafasida efirga uzatilgan ushbu ko‘rsatuvda malayziyalik professorlar – Badrul Isa va Norfadilah Kamaruddin tomonidan ishlab chiqilgan “O‘zbekiston–Malayziya: kreativ turizm” nomli loyiha taqdim etildi.
Olimlar tashabbusi bilan yaratilgan mazkur loyiha mamlakatimizning Malayziyadagi elchixonasi, Turizm qo‘mitasi va Islom sivilizatsiyasi markazi hamkorligida amalga oshirildi.
Tashabbus O‘zbekistonning turizm imkoniyatlari haqida “Visual storytelling” formatida professional raqamli kontent yaratishni nazarda tutadi.
Loyihaga ko‘ra, 17–31 avgust kunlari Malayziya UiTM texnologiya universitetining professional fotograflari va dizaynerlaridan iborat ijodiy jamoa Toshkent, Samarqand, Buxoro va Xorazmda suratga olish ishlarini olib boradi.
Malayziyalik ijodkorlar yurtimiz haqida tayyorlagan foto va videomateriallar “Instagram”, “Facebook”, “TikTok”, “YouTube” kabi internet platformalarda joylashtirilishi rejalashtirilgan. Loyihada yurtimiz oliy o‘quv yurtlarining dizayn, san’at, turizm va mehmonxona biznesi yo‘nalishidagi talabalari ham ishtirok etadi. Bu akademik, turizm va ijodiy sohalarda tajriba almashishni tashkil etish imkonini beradi.
Dasturda fikr bildirgan Badrul Isa loyiha ASЕAN mamlakatlari va musulmon olamida O‘zbekistonni yanada kengroq tanitishga xizmat qilishini ta’kidladi. Uning fikricha, raqamli platformalar orqali mamlakatimiz tarixiy merosi, ziyorat turizmi va amalga oshirilayotgan so‘nggi o‘zgarishlari keng yoritiladi.
“Biz boy tarixiy meros, yuksak madaniyat va mehmondo‘st xalqqa ega bo‘lgan O‘zbekistonni ASЕAN mintaqasi aholisi tomonidan qayta kashf etilishini istaymiz”, – dedi professor.
Shuningdek, u O‘zbekiston xalqini mustaqillikning 35 yilligi bilan tabriklab, loyiha natijalari ushbu sanaga munosib sovg‘a bo‘lishini qayd etdi.
Ushbu tashabbus O‘zbekistonning ziyorat turizmini ommalashtirish va ASЕAN mamlakatlaridan ko‘proq sayyohlarni jalb qilishga xizmat qilishi kutilmoqda.
O‘zbekiston musulmonlari idorasi Matbuot xizmati
