Hidingizdan… Habibim
Payg‘ambarimiz sollallohu alayhi vasallamning muborak ravzalarini ziyorat qilayotgan kishining dimog‘iga juda yoqimli hid urildi. U ziyoratdan chiqib do‘konga bordi va attorga: «Menga muborak ravzada dimog‘imga urilgan atirdan bering», dedi. Sotuvchi hayron bo‘lib, xaridorga qaradi va: «Siz Payg‘ambarimiz sollallohu alayhi vasallamni yaxshi tanimas ekansiz. Dimog‘ingizga urilgan hid biror do‘konda sotiladigan atir hidi emas. U hid Rasululloh sollallohu alayhi vasallamning qabrlaridan chiqadi. Alloh taolo o‘sha hidni olamlarga rahmat qilib yuborgan Payg‘ambarining muborak badanidan taraladigan qilib qo‘ygan. Hayotlik chog‘larida qaysi ko‘chadan o‘tsalar, o‘sha ko‘chada hidlari qolar, kimning boshini silasalar, o‘sha kishining boshidan ancha vaqtgacha o‘sha ifor taralib turardi. Mana, vafotlariga necha asrlar bo‘lganiga qaramay, o‘sha hid qabrlaridan taralib turibdi» deb javob berdi.
Allohumma solli va sallim va baarik ala Muhammad va ala olihi va as'habihi ajma’iyn.
Nozimjon Iminjonov tayyorladi.
O‘MI matbuot xizmati
Xorazmda imomlar o‘rtasida "Zakovat" va sport musobaqalari o‘tkazildi
O‘zbekiston Respublikasi Davlat mustaqilligining 35 yilligi munosabati bilan O‘zbekiston musulmonlari idorasi Xorazm viloyati vakilligi tomonidan imom-xatib va imom-noiblar o‘rtasida «Zakovat» intellektual bellashuvi hamda stol tennisi bo‘yicha sport musobaqasi tashkil etildi.
Diniy soha xodimlarining intellektual va jismoniy salohiyatini oshirish, sog‘lom turmush tarzini targ‘ib qilish va o‘zaro hamjihatlikni mustahkamlash maqsadida o‘tkazilgan tadbirlar qizg‘in bahslarga boy bo‘ldi.
Musobaqalar yakuniga ko‘ra g‘olib va sovrindorlar aniqlandi:
«Zakovat» bellashuvida:
-
1-o‘rin — Urganch shahri jamoasi;
-
2-o‘rin — Bog‘ot, Tuproqqal’a va Gurlan tumanlari jamoalari;
-
3-o‘rin — Yangiariq va Shovot tumanlari jamoalari.
Stol tennisi turnirida:
-
1-o‘rin — Jumamurodov Jumamurod (Urganch shahri «Oxun bobo» masjidi imom-noibi);
-
2-o‘rin — Otajonov Davronjon (Qo‘shko‘pir tumani «Shayx Abdulla» masjidi imom-xatibi);
-
3-o‘rin — Rahmatullayev Ziyovuddin (Bog‘ot tumani «Bejganik bobo» masjidi imom-noibi).
G‘olib va sovrindorlar tashkilotchilar tomonidan diplom, esdalik sovg‘alari hamda qimmatbaho tuhfalar bilan munosib rag‘batlantirildi.
Alloh taolo yurtimiz tinchligi va xalqimiz farovonligi yo‘lida xizmat qilayotgan diniy soha xodimlarining ezgu sa’y-harakatlariga muvaffaqiyatlar ato etsin.
O‘zbekiston musulmonlari idorasi
Xorazm viloyati vakilligi
Matbuot xizmati
