Bir hadis tasdig‘i
Bir kishi baliq konserva zavodida ishlardi. Bir kuni u ish tugaganidan keyin muzlatgich ichiga kirib atrofni ko‘zdan kechirayotganda to‘satdan muzlatgich eshigi yopilib qoldi. Endi unga kim yordam beradi? U bor kuchi bilan eshikni tepar, ovozini boricha baqirar edi. Lekin… Bari befoyda. Shu alfozda besh soat muzlatgich ichida qoldi. Dunyo bilan xayrlashishi aniq bo‘lib qoldi. To‘satdan bir kishi eshikni ochib ichkariga kirdi. Qarasa, bir kishi o‘lim bilan olishib yotardi. Unga tezda yordam ko‘rsatildi. Kishi dunyoga qaytadan keldi. Yordam qo‘lini cho‘zgan kishi shu zavodning qorovuli edi. Undan so‘radilar: “Muzlatgich ichida odam borligini qayerdan bildingiz?”
– Men bu yerda o‘ttiz besh yildan beri ishlayman. Xizmatchilar orasida bir kishi men bilan ertalab tabassum ila salomlashar, qaytayotib yana shu alfozda xayrlashar edi. Shu kuni ish tugaganidan so‘ng o‘sha kishini ko‘rmadim. Ko‘nglimda nima bo‘ldi ekan degan savol paydo bo‘ldi. Uni izlay boshladim. Nihoyat uni muzlatgich ichidan topdim.
Suyukli Payg‘ambarimiz sollallohu alayhi vasallam aytadilar:
«Birodaring yuziga tabassum qilishing SADAQADIR»
Mana sizga hadisga amal qilishni mukofoti. Mana sizga tabassumning ta’siri.
O‘MI Matbuot xizmati
Futbol muxlislariga nasihat
#maqola #futbol
Qadrli tomoshabin do‘stlar! Bir-biringizga muloyim bo‘ling. Bu koptok degan narsa o‘tadi ketadi. Uni deb o‘zimizni pastkash qilishimizga arzimaydi. Uni deb atrofdagilarning dilini og‘ritish kerak emas. Payg‘ambarimiz sollallohu alayhi va sallam aytganlar: “O‘zaro hasad qilmang, o‘zaro adovat qilmang, bir-biringizdan yuz o‘girib ketmang. Allohning aka-uka bandalari bo‘ling”.
Baliq daryodan chiqishi bilan o‘lganidek, futbol ham maydondan chiqishi bilan tugashi kerak. Futboldagi raqobat o‘sha yerda qolsin. Musobaqa bo‘lsin, lekin yomon ko‘rish bo‘lmasin. Jo‘shib keting, ammo adovat qilmang. Futbolchilarni ruhlantirib turing, biroq haqorat qilmang. Kuzating, lekin taassub qilmang. Tadbirlarga qatnashing, ammo qo‘pol bo‘lmang. Tahlil qiling, lekin so‘kmang. Mag‘lubiyat bo‘lsa azoblanmang.
Tomoshabin janoblari! Umringizni ko‘r muxlislik, o‘yinchilarning hayotiy ma’lumotlari, chempionatlarni qayta-qayta ko‘rish, xavfli vaziyatlarni tahlil qilaverish bilan o‘tkazib yubormang.
U bugun va kelajagingizdir. Umringiz oxiratingizni hal qiladigan sarmoyangizdir.
Jamoangiz birinchilikdan golsiz chiqsa ichingizni yeb bitirasizu, ammo butun boshli hayotingiz maqsadsiz, golsiz o‘tayotganini eslab ham qo‘ymaysiz.
Muhim narsalarni tartiblab oling. Ishqibozlik asosiy g‘amingiz bo‘lmasin. Bu ketishda sevimli guruhingiz sizni muvaffaqiyatdan to‘sib qo‘yishi muqarrar. Jamoangiz sizni cho‘kishdan qutqarib qola olmaydi. Uyg‘oning.
Namozlarni ham tark etib, maydonga (ekranga) ertachi kelib olmang. Futbol ko‘raman deb namozlarni qazo qilmang. Zimmangizdagi majburiyatlaringizga o‘yin deb loqayd qaramang. Hakamlar chiqargan qarorlarga aralashermang. Birovning sharafi, sha’nini yerga urmang. Futbolni deb savoblaringizni kulga aylantirmang. Futbol ortidan aloqalarni uzib, birov bilan adovatga bormang. Oilangiz oldidagi vazifalarni tashlab qo‘ymang. Futbolni deb bolalaringizga zarda qilmang, ularga baqirmang. Avvalo, o‘zingizni isloh qiling.
Ësir ibn Badrning “Siz izlagan yechim” kitobidan
Hadis ilmi maktabi o‘qituvchisi
Abdulbosit Abdulvohid o‘g‘li tarjimasi
