O‘zi bilib qilgunicha uravering
Ota o‘g‘lini uylantirmoqchi bo‘lib, uning ko‘ngliga qo‘l solib ko‘rdi. O‘g‘il uyalganidan yerga qaragancha:
– Ota, bir shartim bor! Shunga xo‘p desangiz, uylanishga roziman, – dedi.
– Xo‘sh, qanaqa shart ekan?
– Meni guzar va bozorlarga olib chiqib uraverasiz, so‘raganlarga: “Aytganimni qiladi”, deysiz. Men esa munosib kelinni o‘zim tanlab olaman. Ota kelishilganidek, guzar, bozor va boshqa joylarda o‘g‘liga baqirib, urar, so‘raganlarga: “Aytganimni qiladi”, deb javob berardi. Odamlar esa otaning ishidan hayron bo‘lib: “Aytganingizni qilsa, yaxshi-ku!” deyishardi. Ota yana bir kuni o‘g‘lini urib turganida, bir qiz so‘rab qoldi:
– Ota, o‘g‘lingizni nima uchun urayapsiz?
– Aytganimni qiladi-da, qizim!
– O‘zi bilib qilgunicha, uravering, – dedi qiz.
Shunda o‘g‘il:
– Ota! Mana shu qizga uylanaman, – dedi.
Azizlar! Birovning ko‘rsatmasi bilan ish qiladigan, aqlini ishlatib, biror narsa qilolmaydigan odam hayotda hech narsaga erisholmaydi. Shu bois har bir rahbar, xonadon sohibi va farzandlar birovning aytishini kutmasdan o‘z aqlini ishlatib, ish yuritadigan bo‘lsa, bunday insonlarni xalqqa, vatanga katta yordami tegadi. Shuning uchun o‘zingiz ishingizni bilib qilishni o‘rganing.
“Qasamini buzgan qiz” kitobidan olindi
Sayyid Yahyo Bokuviy merosiga bag‘ishlangan xalqaro konferensiya bo‘lib o‘tmoqda
Boku shahrida Turkiy davlatlar muftiylari yig‘ilishi doirasida ulug‘ mutafakkir, tasavvuf olimi Sayyid Yahyo Bokuviy merosiga bag‘ishlangan xalqaro konferensiya o‘z ishini boshladi.
Ushbu nufuzli tadbirda Turkiy davlatlar tashkiloti, Butunjahon musulmon donishmandlar kengashi, IRCICA, ICESCO, Al-Azhar ulamolar kengashi vakillari hamda yetuk sharqshunos va islomshunos olimlar ishtirok etmoqda.
Anjumanda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ma’ruza qildilar.
Muftiy hazratlari Sayyid Yahyo Bokuviyning tasavvuf tarixidagi maqomi va uning ta’limoti haqida to‘xtaldilar. Shuningdek, nutqda alloma nafaqat tasavvuf, balki diniy ilmlar, tabiiy va aniq fanlarni egallagan qomusiy olim bo‘lgani, o‘ttizga yaqin asarlari inson nafsini tarbiyalashda muhim qo‘llanma ekani ta’kidlandi.
Shayx Nuriddin Xoliqnazar hazratlari Qur’oni karim va hadisi shariflarga tayangan holda qalb salomatligi va pokligi inson hayotining bosh mezoni ekanini bayon etib, turkiy xalqlarni bog‘lab turgan umumma’naviy ildizlarga alohida urg‘u berdilar:
«Hazrat Ahmad Yassaviy, Bahouddin Naqshband va Sayyid Yahyo Bokuviy kabi buyuk zotlar ilgari surgan nafs tarbiyasi, insonparvarlik va yuksak axloq g‘oyalari bugun ham qardosh xalqlarimizni birlashtirib turuvchi mustahkam ma’naviy ko‘prikdir. Bunday ulug‘ siymolar merosini hamkorlikda o‘rganish xalqlarimizning ma’naviy birligini mustahkamlash va yoshlarimizni sog‘lom e’tiqod ruhida tarbiyalashga xizmat qiladi».
Uch kunlik anjuman davomida O‘zbekiston ilmiy jamoatchiligi ham ma’ruzalar bilan ishtirok etadi.
O‘zbekiston musulmonlari idorasi Matbuot xizmati
