Qashqadaryo viloyat hokimligi hamda O‘zbekiston musulmonlari idorasining viloyatdagi vakilligi hamkorligida 24 iyul kuni Qashqadaryodan muborak hajga ketayotgan ziyoratchilarning 150 nafari safar oldidan Buxoroi sharif shahriga ziyoratga borishdi.

Ziyoratchilar kecha erta tongda Qarshi shahridagi “Xo‘jai Jarroh” majmuasida yig‘ilib, O‘zbekiston musulmonlari idorasi bepul tashkil etgan maxsus avtobuslarda Buxoro shahriga yo‘l oldilar. Ziyoratchilarga hajga guruh rahbari bo‘lib ketayotgan ellikboshilaridan uch nafari hamda viloyat hokimligi va OAV vakillari hamrohlik qilishdi.

Ziyoratchilar Buxorodagi “Mir Kulol” ziyoratgohi, “Bahouddin Naqshband” majmuasi, “Abu Hafs Kabir” va “Chor Bakr” majmualarini ziyorat qilib, bu xayrli tadbirlarni tashkil etgan mutasaddilarga minnatdorchiliklarini izhor etib, jonajon O‘zbekistonimiz tinch, osmonimiz doimo musaffo bo‘lishini Alloh taolodan so‘rab duolar qilishdi, deb xabar beradi Qashqadaryo viloyati vakilligi Matbuot xizmati.

O‘MI Matbuot xizmati