Minnatdorlik hissi
O‘z uyingni o‘zing asra...
Toshkent shahar Yunusobod tumani “Minor” mahallasida uch yarim ming nafardan ortiq aholi istiqomat qiladi. Yurtboshimiz farmoniga binoan, mahallalarda xotin-qizlar bilan alohida ishlovchi bitta mutaxassis faoliyat ko‘rsatishi ta’kidlab o‘tildi. Bu farmonda agar mahallada ayollar soni 2000dan ortiq bo‘lsa, ikkita mutaxassis ishlashi nazarda tutilgan. Bu farmon ijrosi bo‘yicha mahallamizda rejalar ishlab chiqilmoqda.
Ish rejamizga binoan bir safar xotin-qizlar bilan ishlash va oilada ma’naviy-axloqiy qadriyatlarni mustahkamlash mutaxassisi Gulnora Shakirjonova bilan navbatdagi oiladan xabar olish uchun bordik.
Uy sohibasi Hakima opa (ismlari o‘zgartirildi) yoshlari ulug‘, katta oilaning nuroniy maslahatgo‘yi ekanlar. Hikoyalarini qisqacha keltiraman:
“To‘g‘risini aytay, darvoza qo‘ng‘irog‘i chalinsa, bezovta bo‘ladigan bo‘lib qoldim, negaki, yana “Sizlar diniy oqimga kirganlar ro‘yxatida turasizlar” degan gap miyamga tok kabi uriladi. U oqimga kirish u yoqda tursin, o‘sha maxsus ro‘yxatda turish men uchun ulkan qo‘rquv. Eshik jiringlasa, nafaqat o‘zim, kelin va nevaralarim ham jovdirab menga termiladigan xuddi qachongacha bunday xavotirda yashaymiz, deyayotgandek bo‘lardi...
Shu taxlit ancha yillar o‘tdi. To‘g‘risi qo‘ni-qo‘shni, tanish-bilishlar oldida xijolat chekadigan, yig‘in-davralarga qo‘shilolmaydigan bo‘lib qoldik...”
Onaxonning hikoyasi anchayin og‘ir bo‘lib, uning ko‘zlarida o‘sha kunlarning og‘ir izlari, ovozida esa qandaydir o‘kinch-dard zohir edi. U jondan aziz nevaralarining onasi bo‘lgan kelinlari uchun kuyinardi.
Onaxon to‘rt o‘g‘il farzandlarini oliy ma’lumotli qilib, 15 nevara 10 evaraning buvijonisi ekanlar, ammo...
– Mana, onaxon, muhtaram Prezidentimiz tashabbuslari bilan shunday ulug‘ kunlarga yetishdingiz, endi nimalar haqida o‘ylayapsiz?
– Avvalo, ming rahmat shu odil yurtboshimizga! Biz kabi onalarning ohini eshitdilar, adolatni qaror toptirdilar. Uzoq yillar kutubxonada ishladim. Xalqqa kitoblar orqali ziyo ulashdim. Ikkala kelinim ham mehnatkash, xalq xizmatida. Ro‘zg‘orlari tinch, hayotlari yana o‘z iziga tushdi. Chehralari yorishib, har kun adolatli qaror uchun davlatimizdan minnatdor bo‘lib, duoda yashayapmiz.
Biz bu oila ostonasidan uzoqlashar ekanmiz, bilib-bilmay qilgan gunohlari afv qilingan yoxud qandaydir adashuv natijasi o‘laroq “aybdor” bo‘lib qolgan hamyurtlarimiz boshidan qora bulut arigani rostligiga quvondik.
Dilorom KARIMOVA
O‘MI matbuot xizmati
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »