Qur'on hofizining kashf etilish tarixi
Misrlik ko'zi ojiz va mashhur qori shayx Mamduh O'mir bolaligidayoq Qur'on o'qishni bilgani va u Qur'oni karimni 5 yoshida yod olish qobiliyatini kashf etgani haqidagi hikoyaga to'xtalib, bu ilohiy in'omni saqlash va rivojlantirishda iste'dod va doimiy amaliyotni topish muhimligini ta'kidladi.
IQNA saytining “Alyavm-7” nashriga tayanib xabar berishicha, misrlik taniqli qori shayx Mamduh O'mir “Masa” tungi teledasturga bergan intervyusida o'zining Qur'on yodlashdagi iste'dodini kashf etishgani haqida so'zlab berdi.
Uning so'zlariga ko'ra, yoshligida bolalar bilan o'ynab yurgan chog'larida Misrning Buhaya viloyatidagi “Al-Halavaja” qishlog'idagi hofizlardan biri va Qur'oni karim o'qituvchisi shayx Abu Zayd al-Basyuniy uni ko'rgan, ko'zi ojiz bo'lishiga qaramay, xotirasi juda yaxshi bo'lgan bolaga Qur'on o'rgata boshlagan. Ko'zi ojiz qorining so'zlariga ko'ra, u besh yoshida va to'rt oy ichida butun Qur'onni yod olishga muvaffaq bo'lgan.
Shayx Mamduh O'mir yana bunday dedi: “Iqtidorlarni rivojlantirish va qobiliyatlarni saqlab qolish uchun ko'proq mashq va harakat qilish kerak”.
O'zbekiston musulmonlari idorasi xodimi
Ilyos AHMYeDOV tayyorladi.
Bashakshehirda imomlar yurtdoshlarimizning islom diniga oid savollariga javob berishdi
O‘zbekiston Bosh konsulxonasi diplomatlari Istanbul shahrining Bashakshehir tumanida hamyurtlarimizning murojaatlarini tinglash va ularning masalalariga amaliy ko‘mak ko‘rsatish maqsadida sayyor qabul o‘tkazdi, deb xabar bermoqda “Dunyo” AA.
Tashrifdan asosiy maqsad ushbu hududda yashab, faoliyat yuritayotgan vatandoshlarimizga zarur konsullik-huquqiy maslahatlar berish va ularni qiziqtirgan savollar yuzasidan amaliy ko‘mak ko‘rsatishdan iborat bo‘ldi.
Safar davomida diplomatlarga O‘zbekiston Musulmonlari idorasi vakillari ham hamrohlik qildi. Ular yurtdoshlarimizning islom diniga oid savollariga javob berdi va turli taqiqlangan hamda aqidaviy jihatdan noto‘g‘ri yo‘nalishdagi tashkilotlarga aldanib qolmaslik uchun zarur maslahatlar berdi.
Hamyurtlarimizning Turkiya hududida qonuniy yashashiga oid masalalar, ularning huquqiy holati, hujjatlari hamda konsullik yordami ko‘rsatish imkoniyatlari yuzasidan fikr almashildi.
Bosh konsulxona vakillari zarur hollarda O‘zbekiston fuqarolariga hujjatlarni rasmiylashtirish hamda vatanga qaytish bilan bog‘liq masalalarda amaliy ko‘mak berishga tayyor ekanini bildirdi.
O‘zbekiston musulmonlari idorasi Matbuot xizmati
