Masjid imomi kutubxona qurdi
Bugungi kunda ilmu ziyo tarqatish, xalqimizni, xususan, beg‘ubor yoshlarimizni kitob o‘qishga qiziqtirish masalasi davlat siyosati darajasiga ko‘tarildi.
Uzoq qishloqdagi yoshlarning ham mutolaaga bo‘lgan muhabbatini ziyoda qilish, ularga buning uchun sharoit yaratish maqsadida butun boshli kutubxona barpo etish esa naqadar go‘zal amal. Shunday maskanlardan biri kuni kecha Qashqadaryo viloyatining Kitob tumanidagi Varganza qishlog‘ida tashkil etildi.
Kitob tumanidagi “Vahdat” masjidi imomi Ne’matulloh Muxtorov va uning akasi Rahmatulloh Muxtorovlar o‘zlari istiqomat qiladigan qishloq aholisi uchun kutubxona sovg‘a qildilar.
Ushbu kutubxona zamonaviy axborot vositalari va internet tarmog‘iga ulangani uning imkoniyatlarini yanada kengaytiradi. Bu singari ezgu ishlar yoshlarning ilmini oshirishi, bo‘sh vaqtidan unumli foydalanishiga qulay sharoit yaratadi.
O‘MI Matbuot xizmati
"Islom giyohvandlikka qarshi" mavzusida seminar o‘tkazildi
#Seminar
#Giyohvandlikka_qarshimiz
Islom dinida aqlni xiralashtiradigan, sog‘liqqa zarar yetkazadigan va insonni o‘z-o‘zini halokatga boshlaydigan har qanday zararli odatlar, xususan, giyohvandlik qat’iy qoralangan va harom qilingan.
Payg‘ambarimiz Muhammad sollallohu alayhi va sallam har qanday mast qiluvchi va badanni bo‘shashtiruvchi, sog‘liqqa zarar beruvchi moddalarni iste’mol qilishdan qaytarganlar.
Binobarin, giyohvandlikka qarshi kurashish, yoshlarni bu ofatdan asrash va sog‘lom turmush tarzini targ‘ib qilish har bir musulmonning burchidir.
2026 yil 2 iyul kuni Toshkent shahridagi muhtasham "Shayx Muhammad Sodiq Muhammad Yusuf" jome masjidining majlislar zalida o‘zgacha bir fayz va ilmu ma’rifat shukuhi hukmron bo‘ldi.
O‘zbekiston musulmonlari idorasi Toshkent shahar vakilligining "Islom giyohvandlikka qarshi" deb nomlangan ilmiy-amaliy seminari yuqori kayfiyatda va ko‘tarinki ruhda o‘tkazildi.
Uchrashuvda diniy-ma’rifiy sohaning zabardast vakillari, davlat va jamoat tashkilotlari mutasaddilari hamda poytaxtimizning tuman bosh imom-xatiblari va otinoyilari jam bo‘lishdi.
Qur’on tilovatidan so‘ng Toshkent shahar bosh imom-xatibi, yig‘ilish raisi Abduqahhor domla Yunusov tadbirni ochib berdilar.
So‘ngra Din ishlari bo‘yicha qo‘mita bo‘lim boshlig‘i Muhiddin Hakimov, Toshkent shahar hokimining jamoat va diniy tashkilotlar bilan aloqalar bo‘yicha o‘rinbosari, kotibiyat mudiri Abdumannon Karimov, Ko‘kaldosh o‘rta maxsus islom bilim yurti rahbari Ma’murjon domla Erkayevlar ishtirok etib, kun tartibidagi muhim masalalar yuzasidan o‘z fikr-mulohazalari va qimmatli tavsiyalarini aytib o‘tdilar.
Aytish joizki, ma’rifat va iymon birlashgan joyda baraka, tinchlik va taraqqiyot bo‘ladi. Poytaxtimiz imom-xatiblari bugun xalqimizga mana shu ziyoni yetkazishda eng oldingi saflarda xizmat qilmoqdalar.
Suratlar orqali mazkur yig‘ilishning eng hayajonli va fayzli daqiqalari hamda seminarning dolzarb ahamiyatini ko‘rish mumkin.
MuslimShosh.uz
