Sayt test holatida ishlamoqda!
15 Avgust, 2025   |   21 Safar, 1447
search icon
Avvalgi sayt
ЎЗ РУ EN AR

Toshkent shahri
Tong
04:04
Quyosh
05:32
Peshin
12:33
Asr
17:20
Shom
19:26
Xufton
20:47
Bismillah
15 Avgust, 2025, 21 Safar, 1447
Avvalgi sayt
#search
 YouTube

Silai rahm umrni uzaytiradi

02.03.2018   14683   2 min.
Silai rahm umrni uzaytiradi

Abu Hurayra roziyallohu anhudan rivoyat qilinadi: “Rasululloh sollallohu alayhi va sallam bunday marhamat qildilar: “Alloh taolo rizqini keng qilishi va ajalini kechiktirishi kimni quvontirsa, u silai rahm qilsin” (Buxoriy va Termiziy).

Silai rahm deyilganida, qarindoshlik aloqalarini mustahkamlash tushuniladi. Soddaroq ifodalasak, qavm-qarindosh, yoru birodarlar bilan o‘zaro bordi-keldini uzib qo‘ymaslik, doimo qondoshlar, ayniqsa, ular orasidagi betoblari va hojatmandlari holidan xabar olish, qo‘ldan kelganicha ularning og‘irini yengil qilish kabi ulug‘ insoniy fazilatlarga silai rahm deyiladi.

Mo‘tabar aqida kitoblarimizda, jumladan, “Aqoidi Nasafiy”da bunday deyiladi: “Ajal bittadir”.

Shunday ekan, umrni uzaytirishni qanday tushunish kerak?

Ba’zi ulamolar bunday javob berganlar: “Amallarda barakot va tavfiq hosil bo‘lishi umrning bekorga o‘tmasligidir. Bu xuddi uning uzayganiga o‘xshaydi”.

Ayrim ulamolar, silai rahm o‘lganidan keyin yaxshilik bilan yodlanishiga sababdir, bu umrning ma’nan uzayishidir, deyishgan.

Ba’zi hadis olimlariga ko‘ra, ajalning kechikishi deyilganida umrning ortishi emas, balki Alloh silai rahm qiluvchining naslidan xayrli zurriyot chiqarishi tushuniladi. Abu Dardo roziyallohu anhudan rivoyat qilinishicha, “Rasululloh sollallohu alayhi vasallamning huzurida “Kim silai rahm qilsa, ajali kechiktiriladi”, deyilganida, u zot bunday marhamat qildilar: “Umr uzaymaydi. Alloh taolo: “Bas, qachon ularga ajallari kelsa, uni biron soatga orqaga ham, oldinga ham sura olmaydilar” (A’rof, 34), deya ogohlantirgan. Ammo kishi silai rahm qilsa, uning ortidan duo qiladigan xayrli zurriyoti bo‘ladi” (Tabaroniy rivoyati).

Bu masalaga Ibn Hajar Asqaloniy bunday sharh keltirgan: “Umrning uzayishi deyilsa, bandani toatga yo‘llash va oxirat uchun foydali amallarni bajarishga ishtiyoq berish, vaqtini bekorga o‘tkazishdan saqlash orqali umrini barakotli qilib qo‘yish tushuniladi. Payg‘ambarimiz alayhissalom ummatlarining umri boshqa ummatlarga nisbatan juda qisqaligini aytib, duo qilganlarida, Qadr kechasi berilgan. Zero, kim ushbu kechaga yetishib, uni toat-ibodat bilan o‘tkazsa, sakson uch yil ibodat qilganning savobini olishi haqida hadislar bor.

Xullas, silai rahm toatning ortishi va gunohlarning kamayishiga sababdir, u orqali banda o‘zidan yaxshi xotira qoldiradi va o‘lganidan so‘ng ham unga savob yozilib turaveradi. Mo‘minga asqatadigan narsalar ichida o‘zidan keyin foydalaniladigan ilm, sadaqai joriya va solih farzanddir”.

“Kutubi sitta” asosida

Sodiq NOSIR

tayyorladi.

O‘MI Matbuot xizmati

 

Hadisi sharif
Boshqa maqolalar

Kimki bu salavotni 41 marta o‘qisa: Saloti noriya

15.08.2025   640   2 min.
Kimki bu salavotni 41 marta o‘qisa: Saloti noriya

Bismillahir Rohmanir Rohiym

Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.

 

اللّهُمَّ صَل صَلَوةً كَامِلَةً وَ سَلَّمْ سَلَاماً تَامَّا عَلَى سَيِّدِنَا مُحَمَّد الَّذِى تَنْحَل بِهِ الْعُقَدُ وَ تَنْفَرِجُ بِهِ الْكُرَبُ وَ تُقْضَى بِهِ الْحَوَائِجُ وَ تُنَالُ بِهِ الرَّغَائِبُ وَ حُسْنُ الْخَوَاتِمِ وَ يُسْتَسْقَى الْغَمَامُ بِوَجْهِهِ الْكَرِيمِ وَ عَلى آلِهِ وَصَحْبِهِ فِي كُلِّ لَمْحَةٍ وَ نَفَسٍ بِعَدَدِ كُلِّ مَعْلُومٍ لَكَ.

Allohumma solli solatan kamilatan, vasallim salaman tamman ’ala sayyidina Muhammadinillaziy tanhallu bihil ’uqodu va tanfariju bihil kurobu va tuqzo bihil havaiju va tunalu bihir-rog‘oibu va husnul-xavotimi va yustasqol-g‘amomu bi-vajhihil kariymi, va ’ala alihi va sohbihi fi kulli lamhatin va nafasin bi ’adadi kulli ma’lumin lak.

Ma’nosi: Allohim, hazrati Muhammadga va ul zotning oilalari (ahli)ga har nafas va har lahzada O‘zingga ma’lum bo‘lgan sanoqlar miqdoricha komil salavot va mukammal salom yuborgin, chunki ul zotning vositasida (har qanday) tugunlar yechiladi, qiyinchiliklar ketadi, mashaqqatlar bartaraf bo‘ladi, hojatlar ravo bo‘ladi, orzularga va yaxshi-go‘zal oqibatlarga erishiladi hamda ul zotning go‘zal-karamli yuzlari hurmatidan yomg‘irlar so‘raladi. («Al-ad’iyatul-voridatu fil-ayatil karimati val ahodisish sharifax», 64-s).

Bu salavotni har bir namoz ortidan o‘n bir marta o‘qiladi. Biror hojat yoki mushkulotning hal bo‘lishi uchun avval 114 marta Fotiha surasi o‘qilib, keyin bu salavot mukammal 4444 (to‘rt ming to‘rt yuz qirq to‘rt) marta o‘qilsa, ortidan Anfol surasining 60-64-oyatlari tilovat qilinsa, murodga erishilishi tajribalarda sinalgan. Ushbu salavot «As-siyatul komila» yoki tez ijobat bo‘lgani uchun «An-noriya» deb nomlangan.

Bir rivoyatga ko‘ra, Sayyid Ahmad at-Toziyga nisbatan «At-Toziya» yoki «At-Tafrijiyya» deb ham ataladi.

Imom Qurtubiy rahimahulloh aytadilar: “Kimki bu salavotni har kuni qirq bir marta yoki yuz marta yoki undan ziyoda o‘qisa, Alloh taolo uning g‘am-tashvishlarini aritadi va qiyinchiliklarini ketkazadi, ishlarini yengillashtiradi, qalbini nurga to‘ldiradi, martabasini ko‘taradi, holatini chiroyli qiladi, rizqini keng qiladi, unga yaxshilik eshiklarini ochib qo‘yadi, so‘zini o‘tadigan qilib qo‘yadi, zamonning turli hodisalaridan va och-faqirlik falokatlaridan omonda saqlaydi va bundan boshqa fazilatlar bilan siylaydi”.

 

“Eng go‘zal salavotlar” risolasidan