KONSEPSIYA
Dunyo darvozalari yanada kengroq ochilib, xorijiy davlatlar fuqarolarining yurtimizga kelib-ketishlariga qulay sharoitlar yaratilmoqda. Jumladan, 39 ta davlat fuqarolariga turistik vizalarni rasmiylashtirish tartibi soddalashtirildi, O‘zbekiston bilan vizasiz davlatlar soni ko‘paydi.
Shuning barobarida bizning yurtdoshlarimizning ham xorijiy davlatlarga chiqishi ortmoqda.
Odatda, chet elga, umuman, yo‘lga chiqayotgan har qanday yo‘lovchiga oldindan yo‘lovchilik mashaqqatini tortgan, bu borada boy tajriba to‘plagan kishilar; kitob ko‘rgan olimu ulamolar yo‘l-yo‘riqlar ko‘rsatib, pandu nais'hatlar qilishgan. Zero, notanish manzillar sari safarga otlangan kishilarga bunday tavsiyayu nasihatlarning ahamiyati juda ham katta.
Binobarin, xorijga chiqayotgan mo‘min-musulmonlar ushbu safarida davlatning qonunlariga amal qilgani kabi shariatimiz ko‘rsatmalariga ham amal qilmog‘i nihoyatda muhimdir.
Masalaning ana shu jihatlari e’tiborga olinib, muslim.uz Internet portalida “Muhojir vatandoshlar” loyihasi ish boshladi. Ushbu loyiha doirasida yangi rukn ochilib “Xorijdagi yurtdoshim” nomlandi.
Ushbu ruknda:
- xorijda ta’lim olayotgan, mehnat qilayotgan, uzoq muddatga davolanishga ketgan vatandoshlarimiz to‘g‘risida hayotiy maqolalar;
- yo‘lga chiquvchilarga tavsiyalar, maslahatlar;
- uzoq muddatli safarlarning ijtimoiy hayotga, oilaviy masalalarga ta’siri va boshqa dolzarb muammolarga doir savol-javoblar dasturiy ravishda yoritiladi;
- Internet saytda e’lon qilingan maqolaning audio formati ham tavsiya qilinadi.
Ushbu materiallar oyat, hadis va ulamolarimizning ilmiy meroslariga asoslangan holda yoritiladi.
Ota-onani hurmatlash odoblari
Ota-onaning roziligini olishga intilish fazilati barcha fazilatlarning negizi, borliqdagi har qanday haq-huquqlarning kelib chiqadigan asosidir.
Ota-onalar, bola tarbiyasi bilan shug‘ullanayotgan tarbiyachilar farzandlarga quyidagi odatlarni singdirishlari maqsadga muvofiq:
Gunohga sabab bo‘lmasa, otaonaning buyurganlarini albatta bajarish; ota-onaga muloyim so‘zlash; uyga kirganlarida, hurmatlari uchun o‘rnidan turish; har tong salom berish, uyqudan oldin xayrli tun tilash; mol-mulklarini saqlash; so‘ragan narsalarini berish; ulardan maslahat so‘rash; ota-ona haqiga duo va istig‘for aytish; ular mehmon kutishsa, yonlarida muntazir bo‘lib turish; ularning aytishlarini kutmay, ularni xursand qiladigan ishlarni bajarish; ularning huzurlarida ovozni baland ko‘tarmaslik; gaplarini bo‘lmaslik; izn berishmagan joyga bormaslik; uxlayotganlarida bezovta qilmaslik; ahli ayoli, farzandlarini ulardan ustun qo‘ymaslik; ota-ona xatoga yo‘l qo‘ysalar, bilmaslikka olish, darhol kechirib, unutish; kulgili gap bo‘lsa ham, ularning huzurlarida o‘zini tutish; ular yaxshi ko‘radigan taomni ilinish; ulardan oldin taomga qo‘l cho‘zmaslik; ularning oldilarida cho‘zilib yotmaslik, oyoq uzatmaslik; uyga ulardan oldin kirmaslik, oldilariga tushib yurmaslik; chaqirganlarida tezlik bilan javob berish; ularning hayotliklarida ham, vafot etganlaridan keyin ham do‘stlarini hurmat qilish; ota-onasining hurmatini qilmaydiganlar bilan do‘stlashmaslik; ularning haqlariga duo qilish; vafotlaridan keyin Allohning quyidagi kalomini ko‘p aytish: «Ey, Rabbim! Meni ular go‘daklik chog‘imda tarbiyalaganlaridek, Sen ham ularga rahm qilgin!» (Isro surasi, 24-oyat).
Ibrohimjon INOMOV tayyorladi.
“Islom nuri” gazetasining 2026 yil 10-sonidan
http://hidoyatuz.taplink.ws
