O‘zbekiston Respublikasi Birinchi Prezidenti Islom Abdug‘aniyevich Karimov butun umrini jonajon O‘zbekistonimiz uchun, uning ozodligi va buyuk kelajagi uchun bag‘ishlagan. O‘zbekistonda ulkan ishlarni amalga oshirgan, tarixiy o‘zgarishlarning tashabbuskori, O‘zbekiston mustaqilligining asoschisi va buyuk davlat arbobidir.

I.A.Karimov o‘zining serqirra siyosiy faoliyati, oliyjanob insoniy fazilatlari bilan Vatanimizning ko‘p asrlik tarixida o‘chmas iz qoldirdi. U nafaqat O‘zbekiston, balki jahon miqyosida katta hurmat va obro‘-e’tiborga sazovor bo‘lgan ulkan shaxs va arbob sifatida tanildi. Shu bilan bir qatorda O‘zbekiston nomini dunyoda mashhur qildi. Bugungi kunda butun jahon xavas bilan qarayotgan O‘zbekistonning shu darajaga erishishida I.Karimovning o‘rni va xizmatlari beqiyosdir.

2017 yil 27 noyabr kuni imzolangan “O‘zbekiston Respublikasining Birinchi Prezidenti, buyuk davlat va siyosat arbobi Islom Abdug‘aniyevich Karimov tavalludining 80 yilligini nishonlash to‘g‘risida”gi Qaror ijrosi yuzasidan bugun I.Karimovning xotirasini, uning mamlakatimiz mustaqilligini qo‘lga kiritishga qo‘shgan ulkan hissasi va shuningdek, uning me’rosini ommalashtirish maqsadida davlat tashkilotlari, idoralar va ta’lim muassasalarida turli uchrashuvlar, davra suhbatlari, hamda I.Karimovning asarlariga bag‘ishlangan ko‘rgazmalar bo‘lib o‘tmoqda.

Shunga asosan, bugun Imom Buxoriy nomidagi Toshkent islom institutida ham I.Karimovning asarlariga bag‘ishlangan ko‘rgazma bo‘lib o‘tmoqda. Ko‘rgazmada TII Axborot-resurs markazi xodimlari ustoz va talabalarga O‘zbekiston Respublikasi Birinchi Prezidenti I.A.Karimovning 23 jildlik asarlari to‘plami, “Islom Karimov – O‘zbekiston Respublikasi Prezidenti” nomli albomlar, ularda O‘zbekiston bosib o‘tgan 16 yillik, 21 yillik taraqqiyot yo‘li fotosuratlar orqali tasvirlab berilgan. Shuningdek, “O‘zbekiston buyuk kelajak sari”, “O‘zbekiston XXI asr bo‘sag‘asida”, “Yuksak ma’naviyat – yengilmas kuch”, “O‘zbekiston mustaqillikka erishish ostonasida” va “Ona yurtimiz baxtu iqboli va buyuk kelajagi yo‘lida xizmat qilish – eng oliy saodatdir” kabi jami 61 nomdagi 103 ta asarlari namoyish qilinmoqda, deb xabar beradi Toshkent islom instituti Axborot-resurs markazi mudiri Kamoliddin Mahkamov.

O‘MI Matbuot xizmati