Islomni qabul qilib xotirjam bo‘lgan Rizo
Finlandiyalik yosh pedagog qanday qilib Islomni qabul qilgani haqida so‘zlab berdi. Islomni yangi qabul qilgan va o‘ziga Rizo nomini olgan musulmon yigit avval Islomga qiziqmasdi va dinini o‘zgartirish haqida o‘ylamasdi.
«Men Islomni juda yuzaki tushunardim, u haqida kam narsa bilardim, – deydi u. – Kasbim o‘qituvchi va o‘quvchilarim orasida turli din vakllari bor. Maktabimdagi diniy rang-baranglik Islomni tushunishimga yo‘l ochib berdi. Avvaliga bu dinga alohida muhabbat qo‘ymadim, ammo uning asoslari bilan tanishganimdan so‘ng qiziqish tufayli barcha savollarimga javob topish istagida uni o‘rganishni boshladim».
Rizoning so‘zlariga ko‘ra, u Qur’onning o‘z ona tiliga o‘girilganini o‘qiganida, ruhiy kashfiyotning teranligidan lol qoldi, deb xabar beradi IslamNews sayti Abna24 ga tayanib.
«Endi juda xotirjam va sokinman, din haqida yanada ko‘proq narsalar o‘rganishga harakat qilaman, kitoblar va maqolalar o‘qiyapman, atoqli musulmon rahnamolarining ta’limotlari bilan tanishmoqdaman».
Rizo vatandoshlariga ham Islom haqida ko‘p narsalarni aytib berish niyatida.
O‘MI Matbuot xizmati
Dohada «Uzbekistan: Heritage in Motion» ko‘rgazmasi ochiladi
2026-yil 3-sentabr kuni Dohadagi Islom san’ati muzeyida O‘zbekiston tarixi va madaniy merosiga bag‘ishlangan «Uzbekistan: Heritage in Motion» ko‘rgazmasi ochiladi. Ekspozitsiya Markaziy Osiyoda islom dini tarqalishidan oldingi davrdan to hozirgi kungacha bo‘lgan tarixiy va madaniy jarayonlarni qamrab oladi hamda 28-noyabrgacha davom etadi.
Ekspozitsiyada Qatar va O‘zbekistondagi yetakchi muzey hamda madaniy muassasalar kolleksiyalaridan namunalar namoyish etiladi. Ular orasida Afrosiyobning mashhur devoriy tasviri, «Katta Langar» Qur’oni, Sharqshunoslik instituti qo‘lyozmalari, Buxoro kulolchilik namunalari, XIX–XX asrlarga oid milliy liboslar, zargarlik buyumlari, ipak matolar va an’anaviy hunarmandchilik asarlari bor.
Ko‘rgazma qadimgi mintaqa tarixi, me’moriy meros, islom sivilizatsiyasining intellektual yutuqlari hamda an’anaviy hunarmandchilik rivojiga bag‘ishlangan to‘rtta tematik bo‘limdan iborat. Unda O‘zbekistonning islom olamida fan, madaniyat va san’at rivojining tarixiy markazlaridan biri sifatidagi o‘rniga, shuningdek, Somoniylar va Temuriylar davri merosiga alohida e’tibor qaratiladi.
Tarixiy meros mamlakatning zamonaviy madaniy rivoji bilan uzviy bog‘liq holda namoyish etiladi. Dekorativ-amaliy san’at, to‘qimachilik va zargarlik an’analariga alohida o‘rin beriladi.
Ko‘rgazma doirasidagi ommaviy dastur ma’ruzalar, mahorat darslari, an’anaviy hunarmandchilik namoyishlari, shuningdek, ikat san’ati va ipak ishlab chiqarishga bag‘ishlangan taqdimotlarni o‘z ichiga oladi. 3–16-sentabr kunlari rassom Davlat Toshev rezidentlik dasturi doirasida mahalliy rassomlar va ko‘rgazma tashrif buyuruvchilari uchun Sharq miniatyurasi hamda «Abrū-Bahor» texnikasiga bag‘ishlangan mahorat darslarini o‘tkazadi. Ishtirok etish uchun oldindan ro‘yxatdan o‘tish talab etiladi.
2017-yilda tashkil etilgan O‘zbekiston Madaniyat va san’atni rivojlantirish jamg‘armasi mamlakatning madaniy merosini asrash va xalqaro miqyosda targ‘ib qilish bilan shug‘ullanadi. Jamg‘arma 17 dan ortiq mamlakatda xalqaro loyihalarni amalga oshirgan va 40 dan ortiq xorijiy madaniyat muassasalari bilan hamkorlik qilgan.
Dohadagi Islom san’ati muzeyi 2008-yilda tashkil etilgan. Muzey kolleksiyasi qariyb 1 300 yillik tarixni qamrab oladi va unda qo‘lyozmalar, kulolchilik buyumlari, metall va shisha mahsulotlari, to‘qimachilik namunalari, gilamlar hamda zargarlik buyumlari mavjud.
