Musofir namozni Qasr qilib o‘qimasa nima bo‘ladi
Savol: Safarda to‘rt rakatli farz namozlari ikki rakat o‘qilishini bilamiz. Manzilga mashinada tez yetib olish mumkin bo‘lgani bois bu namozlarni to‘liq o‘qisa bo‘ladimi? Shu haqda ma’lumot bersangiz.
(Andijon viloyati, Jalolobod tumani).
Javob: Anas ibn Molik roziyallohu anhu: “Rasululloh sollallohu alayhi vasallam bilan Madinada peshinni to‘rt, asrni Zulhulayfada ikki rakat o‘qidim”, deganlar (Imom Muslim rivoyati). Ushbu rivoyatda Payg‘ambarimiz sollallohu alayhi vasallam safarni qasd qilgan bo‘lsalar ham, Madinadan ketishga ulgurmaganlari uchun peshinni to‘rt rakat qilganlar va shahardan chiqib Zulhulayfa degan joyda asrni qasr qilganlar.
Musofir kishi to‘rt rakatli farz namozlarni qasr, ya’ni, ikki rakat qilib o‘qishi hanafiy mazhabida vojib, uni to‘rt rakat o‘qisa, gunohkor bo‘ladi (“Muxtasari Viqoya”). Chunki to‘rt rakatli farz namozlarning ikki rakati musofirga farzdir (“Hidoya”, “Fatovoi Hindiya”). Bu degani, agar uni to‘liq o‘qib birinchi qa’dada adashib o‘tirmasa, oxirgi qa’dada o‘tirmagani uchun namozi buziladi, deganidir. Musofirning belgilangan masofani tez yo sekin bosib o‘tishiga qaralmaydi va tezyurar ulovlardagi kishi ham qasr qilib o‘qiydi.
Musofir o‘z yurtining uylaridan o‘rtacha piyoda yurishda uch kunu uch kechalik (kamida 90 kilometr) masofani qasd qilib, shahri yoki qishlog‘ining chetidagi uylardan ajragan odamdir. Shaharga tutashgan qishloq bo‘lsa, o‘shandan o‘tishi bilan uning musofirligi boshlanadi (“Al-Mavsu’atul fiqhiya”).
“So‘ragan edingiz” kitobidan
Rossiyadagi minglab vatandoshlar bilan ma’rifiy uchrashuvlar o‘tkazildi
Yurtimiz diniy soha vakillarining xorijda, xususan, Rossiya Federatsiyasida mehnat qilayotgan vatandoshlarimiz bilan uchrashuvlari, ularning ijtimoiy-ma’naviy hayotidan xabar olish va diniy ehtiyojlarini qondirish borasidagi xayrli ishlari tizimli ravishda davom ettirilmoqda.
Safar dasturi doirasida Leningrad viloyati Kingisepp tumanida joylashgan "RENCONS Heavy Industries" kompaniyasida faoliyat yuritayotgan mingga yaqin vatandosh ishchi-xodimlar bilan birgalikda muborak juma namozi ado etildi. Namozdan so‘ng hamyurtlarimiz bilan samimiy suhbat qurilib, ularga musofirchilik odobi, halol mehnat va Vatan sog‘inchi haqida go‘zal mav’izalar qilindi.
Shuningdek, ishchi guruhning Kaliningrad shahriga tashrifi ham sermazmun uchrashuvlarga boy bo‘ldi. Jumladan:
-
Shahardagi mahalliy «Nur» musulmonlar diniy tashkilotida peshin namozidan so‘ng vatandoshlar bilan uchrashuv tashkil etildi;
-
Muhtasham «Ehson» jome masjidida shom namozi ado etilib, yig‘ilgan hamyurtlarimiz ishtirokida navbatdagi ma’rifiy suhbat o‘tkazildi. Unda musofir yurtda iymon-e’tiqod va milliy qadriyatlarni asrash, yot g‘oyalardan yiroq bo‘lish zarurligi alohida ta’kidlandi.
Shu bilan birga, Sankt-Peterburg shahrida turli sohalarda mehnat qilayotgan vatandoshlarimiz bilan ham bir nechta manzillarda yuzma-yuz uchrashuvlar uyushtirildi. Uchrashuvlar davomida hamyurtlarimizni qiziqtirgan shar’iy savollarga batafsil javoblar berilib, ularning haqqiga, yurtimiz tinchligi va osoyishtaligini so‘rab xayrli duolar qilindi.
Bu kabi jonli uchrashuvlar vatandoshlarimizga ulkan ma’naviy quvvat baxsh etmoqda.
O‘zbekiston musulmonlari idorasi
Matbuot xizmati
