Payg‘ambarimiz alayhissalom Halima onamizning tarbiyasida yurgan vaqtlarida inson aqliga sig‘maydigan g‘oyat g‘aroyib hodisa yuz beradi. Rasulullohning ko‘kraklari yorilib, qora nuqta – shayton vasvasasi olib tashlanadi. Bu voqeadan qo‘rqib ketgan Halima onamiz u kishini onalariga topshirib, bo‘lib o‘tgan voqeani bunday bayon etadi:

“Muhammad bolalar bilan uyimizning orqasida o‘ynab yurgan edi, to‘satdan o‘g‘lim yugurib kirib, qurayshlik ukamni oq kiyimli ikki kishi ushlab olib yerga yotqizishdi, keyin qornini yorib, bir narsa bilan ichini titkilashyapti, dedi. Otasi ikkalamiz chiqib qarasak, uning rangida rang yo‘q. Bag‘rimizga bosib: "Nima bo‘ldi, o‘g‘lim?" deb so‘radik. U: "Oq kiyimli ikki kishi keldi-da, biri meni ko‘rsatib: "Shumi?" dedi. Unisi bosh irg‘ab tasdiqladi. Keyin ikkovlashib yerga yotqizdi. Ko‘kragimni yorib, titkilay-titkilay bir nimani olib tashlashdi. Nimani olib tashlashganini bilmayman",  dedi.

Shu kundan e’tiboran Payg‘ambarimiz alayhissalom insonni yo‘ldan ozdiradigan shaytoniy hoyu-havaslardan xalos bo‘lgan edilar.

Abduvohid O‘ROZOV,

“Pul yemas ota” jome masjidi imom-noibi