Payg‘ambar alayhissalom Madinaga kelganlarida, ansoriylarning har biri u zotni mehmon qilish orzusida edi.  Hatto Rasululloh alayhissalomning tuyasi jiloviga osilib olib, u zotni uyiga taklif etishardi. Payg‘ambarimiz alayhissalom jilovni qo‘yib yuborishlarini o‘tinib so‘rar, tuya qayerga cho‘ksa, o‘sha uyga tushajaklarini aytardilar. Nihoyat tuyalari u zotning qarindoshlari Adiy ibn Najjor mahallasiga yetganida Abu Ayyub Xolid ibn Zayid Ansoriyning eshigi oldida to‘xtab cho‘kkaladi (Xolid Muoviya roziyallohu anhu xalifalik davrida Istambulni olish uchun bo‘lgan jang chog‘ida shahid bo‘lib, shahar tashqarisiga dafn etilgan).

Rasululloh alayhissalom tuyalaridan tushdilar va: "Inshoalloh turar joyimiz shu yer bo‘ladi. Ey Rabbim, meni muborak yerga tushirgin, sen hamisha qutlug‘ joyni ato etguvchisan", dedilar. Abu Ayyub Ansoriy roziyallohu anhu Payg‘ambar alayhissalomning narsalarini ichkariga olib kirdi, As’ad ibn Zurora esa tuyaga yemish berish uchun uyiga olib ketdi. Bani Najjor mahallasining qizaloqlari Rasulullohni qo‘shiq aytib kutib olishdi. "Meni yaxshi ko‘rasizlarmi?" deb so‘radilar Sarvari olam. Qizlar "ha" deb javob qaytarishdi. "Xudo haqqi, men ham sizlarni jon-dilimdan yaxshi ko‘raman", dedilar u zoti muborak.

Abu Ayyub roziyallohu anhuning uyi ikki qavat bo‘lib, Rasulullohga ikkinchi qavatni munosib ko‘rdi, biroq u kishi ziyoratchilar bilan ko‘rishib, suhbatlashishning qulayligi uchun pastda turishni ixtiyor etdilar. Mezbon kelim-ketim ko‘payib chang-to‘zon, dam-badam sepilgan suvlardan hovur ko‘tarilib Rasululloh ozor chekishlaridan tashvishlangan edi. Chindan ham kunlarning birida suv solingan xum sinib ketdi. Er-xotin Rasulullohning ustlaridan chakka o‘tmasin deb suvni ko‘rpaga shimdirib olishdi. Shundan keyin qo‘yarda-qo‘ymay Rasulullohni yuqorigi qavatga ko‘chirib chiqishdi. Birinchilardan bo‘lib, ansorlarning kattalaridan Said ibn Uboda, As’ad ibn Zurora, Zayd ibn Sobit roziyallohu anhumning onalari turli-tuman shirin ovqatlar pishirib kelishdi.

Abduvohid O‘ROZOV,

“Pul yemas ota” jome masjidi imom-noibi