O'zbekiston musulmonlari idorasi vakili – Toshkent viloyati «Abu Bakr Siddiq» masjidi imom-xatibi Nurali Mavlanovning Rossiya hududlariga amaliy safari doirasida Sankt-Peterburg va Leningrad viloyatida yashayotgan hamda ta'lim olayotgan vatandoshlar bilan uchrashuvlari tashkil etildi, deb xabar bermoqda «Dunyo» AA muxbiri.
Tadbirlar davomida Nurali domla so'ngi yillarda yurtimizda yangi davlat va jamiyat qurish bo'yicha amalga oshirilayotgan tarixiy ishlar, diniy sohada amalga oshirilayotgan islohotlar, xususan fuqarolarning o'z diniy amallarini emin-erkin bajarishlari uchun yaratilayotgan sharoitlar, qurilayotgan masjidlar, ta'lim dargohlari haqida so'zlab berdi.
Tadbirda Sankt-Peterburg va Leningrad viloyatidagi vatandosh tashkilotlar rahbar va faollari so'zga chiqib, ushbu uchrashuvni tashkil etgan Bosh konsullikka minnatdorlik bildirdilar va mamlakatimiz tomonidan xorijdagi vatandoshlarga qaratilayotgan katta e'tiborni e'tirof etdilar.
Talabalar bilan uchrashuvda esa O'zbekiston Konstitutsiyasiga o'zgartirishlar kiritish va yangilanayotgan Konstitutsiya bo'yicha bo'lajak umumxalq referendumi va xorijda istiqomat qilib kelayotgan yurtdoshlarimizning ovoz berishi uchun tashkil etilgan uchastkalar to'g'risida ma'lumot berildi.
Uchrashuv yakunida talabalarga o'qishdan tashqari bo'sh vaqtlarida Bosh konsulxonaga tashrif buyurgan holda, diplomatik vakolatxona ish faoliyati bilan tanishishlari va bevosita fuqarolar bilan ishlash bo'yicha o'z bilim hamda malakalarini oshirishlari mumkinligi ma'lum qilindi.

O'zbekiston musulmonlari idorasi Matbuot xizmati