O‘z joniga qasd qilgan ilon
Kech tushganda duradgor ustaxonani yopib uyga ketdi. Kechasi ustaxonaga ilon kirdi. Qorni och ilon yegulik topish ilinjida u yoqdan bu yoqqa o‘rmalab yura boshladi. Qorong‘u xonada u to‘satdan boltaga urilib ketdi. Alam olish niyatida u boltaga o‘ralib olib uni chaqishni boshladi, lekin uning hujumi boltaga mutlaqo zarar yetkazmadi, aksincha ilonning og‘zi jarohatlanib qon oqishni boshladi. Ilon dushmaniga mahkam chirmashib olib, uni bo‘g‘moqchi bo‘ldi. Keyingi kuni duradgor ustaxona eshigini ochganda u yerda boltaning tig‘i ustida qonga belanib, cho‘zilib yotgan ilonga ko‘zi tushdi.
Ilon kimningdir aybi bilan halok bo‘lmadi, o‘zining jahli va adovati tufayli vafot etdi.
Qissadan hissa, ko‘pincha biz jahlimiz chiqqan paytda atrofimizdagilarni nohaq azoblab, diliga ozor berib qo‘yamiz. Vaqt o‘tgach, hammadan ham ko‘ra o‘zimizga ko‘proq ziyon yetkazganimizni anglaymiz.
Xalqaro aloqalar bo‘limi
Mohira Zufarova
Farg‘onada yosh imom-xatiblar bilan ma’rifiy muloqot o‘tkazildi
“Yangi O‘zbekiston yoshlari — 2030” strategiyasi ijrosini ta’minlash maqsadida Farg‘ona viloyatida faoliyat yuritayotgan yosh imom-xatib va imom-noiblar ishtirokida “Yoshlar bilan bir kun” loyihasi doirasida uchrashuv tashkil etildi.
Tadbirda Farg‘ona viloyati bosh imom-xatibi Ubaydulloh domla Abdullayev ishtirok etib, yosh diniy soha xodimlari bilan samimiy muloqot o‘tkazdi.
Suhbat davomida mamlakatimizda yoshlarga yaratilayotgan keng imkoniyatlar va ulardan samarali foydalanish masalalariga alohida to‘xtalib o‘tildi. Shuningdek, yosh imomlarga quyidagi yo‘nalishlarda muhim tavsiyalar berildi:
-
Aholi va jamoatchilik bilan muloqot madaniyatini yuksaltirish;
-
Ta’sirchan va mazmunli ma’ruzalar tayyorlash hamda voizlik odobiga rioya qilish;
-
Masjidlar faoliyatini zamon talablari darajasida to‘g‘ri tashkil etish.
Muloqotda yosh diniy soha vakillarining jamiyatda tutgan o‘rni, ayniqsa, yosh avlodni vatanparvarlik, sof ma’rifat va ezgulik ruhida tarbiyalashdagi mas’uliyati yuqori ekani ta’kidlandi.
Ochiq va samimiy ruhda o‘tgan uchrashuvda ishtirokchilar o‘zlarini qiziqtirgan savollarga batafsil javob oldilar.
Tadbir yakunida yosh mutaxassislar viloyat vakilligi va soha mutasaddilarining ish jarayoni bilan yaqindan tanishdilar.
O‘zbekiston musulmonlari idorasi
Farg‘ona viloyati vakilligi
Matbuot xizmati
