Ramazon doimo munosib vaqtda keladi. Uni bizga Robbimiz dunyo xarob qilgan hayotimizni yana bir bor tuzatish, qadamlarimizni muvozanatga solish, uni yangidan O'zi tomon olib boradigan yo'lga yo'llash uchun yuboradi. Muhimi, U bizga bunga qodirligimizni eslatadi.

1. Ramazon bizga har kecha bir pora Qur'on o'qish qiyin emasligini, ammo dunyo bizni egallab olganini o'rgatadi!

2. Ramazon bizga har oy uch kun ro'za tutishni qiyin ish emasligini, ammo biz burch va majburiyatlarimiz qolib Alloh bizga aniq yozib qo'ygan narsalar bilan band ekanimizni o'rgatdi.

3. Ramazon bizga kechalari turib ikki rakat namoz o'qish qiyin ish emasligini, ibodatlar mashaqqat bo'lmasligini, ammo bizning qalbimiz xarob bo'lganini o'rgatdi.

4. Ramazon bizga Alloh uchun bir narsalarni tark qila olishimizni, ularni tark qilishda lazzat borligini, bu lazzatni ularni tark qilmay topib bo'lmasligini, bizning tark qilishdan ojiz emasligimizni, ozgina qo'rqoq ekanligimizni o'rgatdi.

5. Ramazon bizga yilning istagan paytida sadaqa qila olishimizni, faqirlarni qalban his qilishimiz mumkinligini, ularni eslash uchun oshqozonni bo'shatish shart emasligini o'rgatdi.

6. Ramazon bizga bomdod namoziga turish shayton vasvasa qilganidek og'ir ish emasligini, uni muazzin aytganidek "uyqudan yaxshiroq" ekanligini o'rgatdi.

7. Ramazon bizga masjidga qadam bosish lazzat ekanini, saodat faqatgina Alloh bilan birga bo'lishda ekanini o'rgatdi.

8. Ramazon bizga eng iliq makon uyimiz ekanini, oila a'zolarimizning bir joyda iftorda jamlanishi oilaga jon ato qilishini o'rgatdi.

9. Ramazon bizga qo'shniga bir idishda ovqat jo'natish mehr-oqibatni ziyoda qilishini, ulardan bir idishda ovqat qabul qilish esa muhabbat maktubiga mengzalishini o'rgatdi.

10. Ramazon bizga xonadonimiz ayollarimiz sabri ustiga bino qilingani, biz erkaklar kunning oxirida sillamiz qurib dam olayotganimizda ayollarimiz oshxonada tinmasligini, ular haqiqatda bizning ehtiromimizga munosib ekanini o'rgatdi!

Abdulqodir POLVONOV