Bugun O‘zbekiston musulmonlari idorasi raisi, muftiy Usmonxon Alimov hazratlarining Farg‘ona viloyatiga safarlari boshlandi. Muftiy hazratning safari Farg‘ona viloyati Oltiariq tumanidagi “Shoh Tolib” jome masjidiga tashrif qilish bilan boshlandi. Ushbu jome masjidda muftiy hazratlari peshin namozini ado etib, mo‘min-musulmonlarga Ramazon oyi o‘zining xayru barakasi, saxovati, mo‘l-ko‘l ehsonlarini shukuh bilan yurtimiz uzra davom etayotganini bayon qildilar.

Shuningdek, muftiy hazratlari tarovih namozini ado etish uchun Farg‘ona viloyati Qo‘qon shahridagi "Degrizlik" jome masjidiga tashrif buyurdilar. Masjid jamoasini muborak Ramazon oyi bilan samimiy qutlab, ularning haqiga ezgu duolar qildilar. O‘z ma’ruzalarida diyorimizdagi barcha masjidlarda tarovih va xatmi Qur’onlar o‘qilayotgani, namozxonlar masjidlarda qorilarning Qur’on o‘qishlarini maroq bilan eshitayotganlari, keksalar ko‘zlarida minnatdorchilik yoshi balqiganini ko‘rib, Yaratganga shukronalar aytish kerakligini alohida ta’kidladilar.

Muftiy hazratning Farg‘ona viloyatiga qilgan tashriflaridan mo‘min-musulmonlar juda ham mamnun bo‘lib, ta’sirli va mazmunli suhbat uchun o‘z tashakkurlarini bildirishdi.

Eslatib o‘tamiz, ulamolarimizning Andijon viloyatidagi safari davom etmoqda. Bugun O‘zbekiston musulmonlari idorasi rais o‘ribosari Shayx Abdulaziz Mansur Marhamat tumanidagi "Imom Al-Buxoriy",  O‘zbekiston musulmonlari idorasi raisi maslahatchisi Abdulhamid Tursunov Xo‘jaobod tumanidagi "Yetti chinor"  va O‘zbekiston musulmonlari idorasi Masjidlar bo‘limi mudiri Muhammadnazar Qayumov Izboskan tumanidagi "Ahmadali hoji" masjidlarida mo‘min-musulmonlarni  oylar sultoni – Ramazon bilan muborakbod etib, birgalikda tarovih namozlarini odo eishdi.

O‘zbekiston musulmonlari idorasi

Masjidlar bo‘limi