Ramazondan samarali foyda olish uchun nima qilish kerak?
- Qur’oni karimni ko‘p o‘qish. O‘qiganda ham oyatlarning mazmunini tushunishga urinib, ularda ifoda etilgan masalalar yuzasidan keng tafakkur yuritib o‘qish.
- Nafl namozlarini ko‘proq o‘qishni odat qilish.
- “Men kimman?” “Qayerdan keldim va qayoqqa ketyapman?” “Alloh taolo mendan nima istaydi va Uning qoshidagi burchlarim nimalardan iborat?” degan savollar ustida ko‘p fikr yuritish
- O‘tmishdagi yaxshi-yomon amallarni tarozi pallasiga qo‘yish, shuningdek, hozirgi holatga ham boqib kelajak haqida o‘ylash.
- Har tunda yo‘l qo‘ygan xatolar uchun astoydil tavba qilib, shu tunni umrning so‘nggi tuni sifatida tasavvur qilish.
- Imkon qadar ko‘proq zikr qilish.
- Nimadir sabab bo‘lib biror mo‘minni ranjitib qo‘ygan bo‘lsa, undan darhol kechirim so‘rab yarashib olish.
- Janjallashib qolganlarni yarashtirish va g‘amga botganlarga dalda berish.
- Muhtojlarga sadaqa berish, yetimlar va bemorlarning holidan xabar olish, ularga yaxshi munosabatda bo‘lib moddiy-ma’naviy yordam ko‘rsatish.
- Tug‘ishganlar va yaqinlarning holidan xabar olib, ularga yordam berish.
- Namozlarni jamoat bilan o‘qish
- O‘tganlarni xotirlab, ularning yotgan joylarini ziyorat qilish.
Damin JUMAQUL tayyorladi.
"Xo‘jamulki" mahallasida obodlik va mehr-saxovat
Qumqo‘rg‘on tumanidagi "Xo‘jamulki" mahallasida "Mahallada obodlik va mehr-saxovat oyligi" doirasida keng jamoatchilik va aholi vakillari ishtirokida qizg‘in obodonlashtirish va bunyodkorlik ishlari olib borilmoqda. Bu tashabbus mahalla hayotiga yangicha ruh baxsh etib, hamjihatlik va ezgulik muhitini yanada mustahkamlamoqda.
Azaliy qadriyatlarimizdan biri bo‘lgan hashar an’anasi asosida mahalla ahli bir yoqadan bosh chiqarib, o‘z hududini yanada obod, fayzli va ko‘rkam maskanga aylantirish yo‘lida fidokorona mehnat qilmoqda. Har bir fuqaroning qalbida Vatanga muhabbat, mahallaga ehtirom tuyg‘usi jo‘sh urib, ular bunyodkorlik ishlariga faol hissa qo‘shmoqdalar.
Xususan, mahalla hududidagi muqaddas qadamjolardan biri – "Xo‘jamulki ota" qabristonida keng ko‘lamli tozalash va obodonlashtirish ishlari amalga oshirilmoqda. Hashar ishtirokchilari tomonidan qabriston hududi begona o‘tlar va chiqindilardan puxta tozalanib, qabr ustilari tartibga keltirilmoqda. Shuningdek, ziyoratchilar uchun qulay sharoitlar yaratish borasida zarur ishlar olib borilib, ajdodlar xotirasiga chuqur ehtirom ko‘rsatilmoqda.
Bu kabi ezgu tashabbuslar mahallada obodlik va hamjihatlik muhitini mustahkamlash bilan birga, ajdodlarimiz xotirasiga bo‘lgan hurmatimizni namoyon etadi. Ayni paytda, yosh avlodga milliy qadriyatlarimizni singdirish, ularni Vatanga muhabbat va mehnatsevarlik ruhida tarbiyalashda beqiyos ahamiyatga egadir. Bugungi hashar – kelajak avlod uchun namuna, ertangi kun uchun mustahkam poydevordir.
O‘zbekiston musulmonlari idorasi
Surxondaryo viloyati vakilligi Matbuot xizmati
