Mohi Ramazonning shukuhi yurtimiz ora kezib yurganda, tunlar ham go‘yo kunduzgiday. Hatto bu tarovatni faqatgina shahar yoki markazlarda emas, balki yurtimizning eng chekka go‘shalari misolida ham namoyon bo‘lmoqda. Allohning kalomiga muxlis bo‘lgan yurtdoshlarmiz ila gavjum bo‘lgan masjidlar uzra taralayotgan ziyo ko‘kka quloch ochganday go‘yo. Duoga ko‘tarilgan qo‘llarda esa ajib bir his bor. Chunki bu muborak oyning avvali rahmat, o‘rtasi mag‘firat, oxiri esa do‘zaxdan ozod qilinishdek darajaga burkangan.

Farg‘ona viloyatida ham mohi mahbubning ilk kunidan 160 dan ortiq masjidda 300 dan ziyod hofizi Qur’onlar ishtirokida boshlangan Kalomulloh xatmi kecha-yu kunduz yurtdoshlarimiz ongu shuuriga halovat bag‘ishlayotir.

“Agar kishi Qur’onni kunduzi xatm qilsa, farishtalar kechgacha uning haqqiga salavot aytadilar. Agar u undan (Qur’ondan) tunda forig‘ bo‘lsa, farishtalar tong otguncha salavot aytadilar” (Dorimiy rivoyati).

Ushbu damlarda yoshu qari qo‘lini duoga ochib – Vatani, xalqi, oilasi tinch-omon, jismi va ruhi orom topishini so‘rab Yaratganga iltijo aylamoqda. Iloho, muborak oyda qilayotgan duo-yu iltijolarimizni Alloh ijobat qilsin!

Qo‘shtepa tumani “Muborak” jome masjidi

Quvasoy shahar “Islom” jome masjidi

Rahmatillo Jalilov,

O‘MI Farg‘ona viloyati vakilligi xodimi