O‘zbekiston musulmonlari idorasining hamda Vazirlar Mahkamasi huzuridagi Din ishlari bo‘yicha qo‘mita bilan hamkorlikda Xadichai Kubro ayol-qizlar o‘rta maxsus Islom bilim yurtida “Biz yoshlar –yot g‘oyalarga qarshimiz” shoiri ostida intellektual bellashuv bo‘lib o‘tdi.

O‘zbekiston musulmonlari idorasi raisi o‘rinbosari Shayx Abdulaziz Mansur hazratlari tadbirni ochib, ishtirokchilarni tabrikladilar va bellashuvda muvaffaqiyat tiladilar.

Diniy ta’lim muassasalari talabalarining diniy ekstremizm, “ommaviy madaniyat”, buzg‘unchilik, ahloqsizlik kabi yot g‘oyalariga qarshi mafkuraviy immunitetini kuchaytirish, bilim va ko‘nikmasini, Qur’on, aqida va fiqhiy masalalardagi bilimlarini yanada oshirish va mustahkamlash va mustaqil fikrlarini bayon etish qobiliyatini rivojlantirish, yoshlarning mamlakatimizda kechayotgan ijtimoiy-siyosiy, madaniy-ma’rifiy jarayonlardagi faol ishtirokini ta’minlash, iqtidorli talabalarni rag‘batlantirish, milliy-diniy urf-odat, an’ana va qadriyatlar asosida tarbiyalash ushbu musobaqani o‘tkazishdan ko‘zlangan asosiy maqsadni tashkil etadi.

Unda O‘MI tasarrufidagi Toshkent  islom instituti va 9 ta o‘rta- maxsus Islom bilim yurti jamoalari quyidagi shartlar asosida bellashdilar:

a) Jamoalar o‘z bilim yurti va ishtirokchilarini tanishtirish; (Mazkur shart uchun 5 daqiqa ajratildi);

b) Mavzu bo‘yicha savol-javoblar. Mazkur shartda har bir jamoaga ikkitadan savol berildi (O‘ylash uchun har bir savolga 1 daqiqa vaqt berildi va kelishgan holda jamoadan bir ishtirokchi javob berdi);

v) Mavzuga oid ommaviy nashrlarda e’lon qilingan maqolalar. Bu shartda o‘quv yili davomida bilim yurti talabalari tomonidan nashr etilgan maqolalar soni jamlanib, har bir maqola 2 balldan baholandi.

g) Sardorlar bellashuvi. Mazkur shartda guruh sardoriga 10 tadan tezkor savollar berildi va har bir to‘g‘ri javob 2 balldan baholandi.

Musobaqa natijalariga ko‘ra:

1-o‘rin: “Muhammad al-Beruniy” O‘MIBYU – 97,2 ball;

2-o‘rin: “Hidoya” O‘MIBYU – 63,6 ball;

3-o‘rin: “Faxriddin ar-Roziy” O‘MIBYU – 60,8 ball.

G‘oliblar quyidagi mukofotlar bilan taqdirlandilar:

1-o‘rin O‘zbekiston musulmonlari idorasining birinchi darajali diplomi va zamonaviy muzlatgich;

2-o‘rin O‘zbekiston musulmonlari idorasining ikkinchi darajali diplomi va zamonaviy kir yuvish mashinasi;

3-o‘rin O‘zbekiston musulmonlari idorasining uchinchi darajali diplomi va 40 hajmdagi televizor.

Bundan tashqari, barcha ishtirokchilar kitoblar to‘plami bilan taqdirlandilar.

Intellektual bellashuv yakunida O‘MI rahbariyatiga, Din ishlari bo‘yicha qo‘mitaga va bellashuvni o‘tkazishda yuqori saviyadagi tayyorgarlik uchun Xadichai Kubro ayol-qizlar o‘rta maxsus islom bilim yurtining fidoiy ustoz va murabbiylariga chuqur minnatdorchilik izhor etildi. 

Ta’lim va kadrlar tayyorlash bo‘limi