Ovchi va ayiq voqeasi
Qadim zamonda bir ovchi bo‘lgan ekan. U bir kuni ayiq bolasin topib olibdi va parvarishlay boshlabdi. Ayiq kundan-kunga o‘sib, unga o‘rgana boshlabdi. Ovchi qayerga borsa, uni o‘zi bilan olib yurar ekan. Odamlar unga ehtiyot bo‘lishni tayinlab, bu qilayotgan ishi xato ekanini aytishibdi. Lekin ovchi ularga: "Bu ayiq menga odamdan ham yaxshi do‘st, u meni har joyda qo‘riqlaydi", deb javob beribdi. Bir kuni ular birga ov qilib yurishganda ovchi charchabdi va bir daraxt soyasida biroz mizg‘ib dam olmoqchi bo‘libdi. Ayiq esa har doimgidek uni qo‘riqlay boshlabdi. Shu payt bir pashsha uchib kelib ovchiga qo‘nibdi. Ayiq uni haydabdi. Pashsha aylanib yana qo‘nibdi. Ayiq yana haydabdi. Bu hol bir necha marotaba takrorlanib, ayiqning jahli chiqibdi. Katta bir toshni olib, ovchiga qo‘nib turgan pashshaga otibdi. Pashsha uchib ketibdi, ovchi esa til tortmay o‘libdi.
Do‘st tanlashda o‘ylab ish qiling. Ota-bobolarimiz "Ahmoq do‘stdan aqlli dushman yaxshi", deb bejiz aytishmagan.
Akbarshoh Rasulov
Banklar va mikromoliya tashkilotlari o‘z faoliyatini islomiy bank faoliyatiga o‘zgartirishi mumkin
Adliya vazirligi Mikromoliya tashkiloti va bank faoliyatini o‘zgartirish tartibi to‘g‘risidagi nizomga o‘zgartirish va qo‘shimchalarni davlat ro‘yxatidan o‘tkazdi (ro‘yxat raqami 3656-1, 01.08.2026 y.), xabar bermoqda huquqiyaxborot Telegram kanali.
Mazkur idoraviy hujjat "O‘zbekiston Respublikasining ayrim qonun hujjatlariga O‘zbekistonda islomiy bank faoliyatini joriy etishga qaratilgan qo‘shimcha va o‘zgartirishlar kiritish to‘g‘risida" 2026 yil 27 martdagi O‘RQ–1126-son Qonunga muvofiq ayrim kredit tashkilotlari faoliyatini o‘zgartirishning quyidagi tartib-taomillarini belgilaydi:
- mikromoliya tashkilotini faqat islomiy bank faoliyatini amalga oshiruvchi mikromoliya bankiga o‘zgartirish;
- faqat islomiy bank faoliyatini amalga oshiruvchi mikromoliya bankini faqat islomiy bank faoliyatini amalga oshiruvchi bankka o‘zgartirish;
- faqat islomiy bank faoliyatini amalga oshiruvchi bankni faqat islomiy bank faoliyatini amalga oshiruvchi mikromoliya bankiga o‘zgartirish;
- faqat islomiy bank faoliyatini amalga oshiruvchi mikromoliya bankini mikromoliya tashkilotiga o‘zgartirish;
- bankni faqat islomiy bank faoliyatini amalga oshiruvchi bankka o‘zgartirish.
Shuningdek, o‘z faoliyatini faqat islomiy bank faoliyatini amalga oshiruvchi bankka o‘zgartirishga faqat islomiy bank faoliyatini amalga oshiruvchi mikromoliya banki haqli.
Mikromoliya bankini davlat ro‘yxatidan o‘tkazish va bank faoliyatiga doir tegishli litsenziya (litsenziyalar) olish uchun nogironligi bo‘lgan shaxslar uchun mikromoliya banki binolarida shaharsozlik normalari va qoidalarida belgilangan talablarga muvofiq qulay shart-sharoitlar yaratilganligi bo‘yicha Qurilish va uy-joy kommunal xo‘jaligi sohasida nazorat qilish inspeksiyasining xulosasi mavjud bo‘lishi kerak.
Tashabbus Fors ko‘rfazi mamlakatlaridan investitsiyalarni jalb qilishga qaratilgan bo‘lib, dastlabki hisob-kitoblarga ko‘ra, ushbu chora-tadbirlarni amalga oshirish iqtisodiyotga depozitlar va to‘g‘ridan to‘g‘ri investitsiyalar ko‘rinishida taxminan 1 milliard dollar jalb qilishi mumkin. Mutaxassislarning prognozlariga ko‘ra, 2035 yilga borib O‘zbekiston ushbu tizim ishga tushirilgandan beri dunyoda islom moliyasining eng tez o‘sishini namoyish etadi.
O‘zbekiston musulmonlari idorasi Matbuot xizmati
