Zaynab binti Xuzayma
Zaynab roziyallohu anho hijratdan yigirma sakkiz yil oldin (melodiy besh yuz to‘qson oltinchi yili) tug‘ilganlar.
Otalari: Xuzayma ibn Horis ibn Abdulloh ibn A’mr ibn Abdumanof ibn Hiloldir.
Onalari: Hind binti A’vf ibn Zuhayr ibn Hammatoh ibn Jurshdir.
Payg‘ambarimiz sollallohu alayhi vasallam Hafsa binti Umar ibn Xattob roziyallohu anhoga uylanganlaridan so‘ng Zaynab roziyallohu anhoga hijratni uchinchi yili Ramazon oyida uylandilar. Zaynab onamiz mo‘mina, taqvodor, soliha, har qanday og‘ir sharoitlarda sabr qiluvchi ayol edilar.
Rasululloh sollallohu alayhi vasallam bu ayolning sabru matonatini eshitib hamda eri vafot etganidan so‘ng uni o‘z qaramog‘iga oluvchi, uni himoya qilib, ko‘mak beruvchi birorta kishi qolmaganidan xabardor bo‘lib, unga ulug‘ marhamat ko‘rsatdilar. Ayolning chin musulmonligi, Islom yo‘lidagi harakati, sabr-matonati va din yo‘lida unga yetgan musibatlari evaziga Zaynab roziyallohu anhoga yaxshilik iroda etdilar va unga sovchi bo‘ldilar. Shu tariqa homiysi va qarovchisidan ayrilgan beva ayolning musibatlarini yengillatish maqsadida uni o‘z qaramog‘lariga oldilar. Zaynab roziyallohu anho Rasululloh sollallohu alayhi vasallam bilan bir yilgina umr kechirdilar.
Hijratning to‘rtinchi (melodiy olti yuz yigirma oltinchi) yili Madinai munavvarada vafot etib, Baqe’ qabiristoniga dafn qilindilar.
Manbalar asosida
Tojiddinov Abdussomad
Abdulbosit o‘g‘li tayyorladi
Shayx hazratlarining kitoblari Masjidi Nabaviyda
Fazilatli shayx Muhammad Sodiq Muhammad Yusuf hazratlari qoldirgan boy ilmiy merosi nafaqat O‘zbekistonda, balki dunyoning turli nuqtalarida, xususan, Islom olamining tabarruk maskani bo‘lmish Masjidi Nabaviy kutubxonasida ham saqlanib kelyapti.
2017 yilda shayx hazratlarining bir qator kitoblari ilk bor Masjidi Nabaviy kutubxonasiga taqdim etilgan edi. Shundan buyon ziyoratga borgan hamyurtlarimiz ushbu kutubxonadan hazratning asarlarini o‘z ona tilimizda mutolaa qilish imkoniyatiga ega bo‘lib kelishyapti.
Masjidi Nabaviy kutubxonasi masjidning 10-eshigi yonida joylashgan. Kutubxonada 170 000 dan ortiq kitob saqlanadi. Asosiy adabiyotlar arab tilida bo‘lsada, 20 dan ortiq xorijiy tillardagi diniy manbalar ham jamlangan. Kutubxonadan bir vaqtning o‘zida 300 dan ortiq kitobxon foydalanishi mumkin.
Kutubxonada xorijiy tillardagi adabiyotlar uchun alohida xona ajratilgan. U yerda ingliz, rus, fransuz kabi jahon tillari qatorida o‘zbek tili bo‘limi ham bor. Ushbu bo‘limda shayx Muhammad Sodiq Muhammad Yusuf hazratlarining qalamlariga mansub 50 dan ortiq asar bor. Jumladan:
– «Hadis va Hayot» silsilasi;
– «Tafsiri Hilol»;
– «Kifoya»;
– «Ruhiy tarbiya»;
– «Zikr ahlidan so‘rang»;
– «Odoblar xazinasi»;
– «Xislatli hikmatlar sharhi»;
– «Baxtiyor oila» va boshqalar.
@islomuz
