Bolam, qo‘shniga ozor bermagin!
Saidning oyisi har yakshanba kuni somsa qilar edi. Oyisi har somsa qilganida buvisi: "Bolam, qo‘shniga ozor bermagin" der, oyisi esa: "Xo‘p bo‘ladi, oyijon", deb bir likopcha somsani qo‘shnisinikiga chiqarib berar edi. Bir kuni Said buvisidan: "Buvijon, nega oyim har somsa qilganlarida "Qo‘shnilarga ozor bermang", deysiz?", deb so‘radi. Buvisi esa: "Oying pishirgan somsaning hidi ularning dimog‘iga kiradi, ular ham somsa yegisi kelib, ozorlanishadi. Agar somsadan bersang, yeb ko‘ngillari taskin topadi", dedi. Shunda Said kecha maktabda sinfdoshi Ahror kattakon olmani karsillatib yeganini, boshqa bolalar esa uning olmasiga havas bilan qarashganini eslab, so‘radi: "Kecha Ahror maktabda hammaning oldida olma yedi, demak, u hammaga ozor beribdi-da?!" "Albatta", javob berdi buvisi. "Lekin u olmasini hammaga bo‘lib bersa, o‘ziga hech narsa qolmas edi-da", dedi Said. "Unday bo‘lsa, panaroqqa o‘tib yeyish kerak", dedi buvisi.
Bilingki, atrofdagilarga faqat qo‘l yoki til bilan ozor berishdan tashqari boshqa ko‘pgina ishlar ham borki, ular orqali bexosdan aziyat yetkazib qo‘yish mumkin. Ulardan biri hiddir. Jamoat joylariga boradigan bo‘lsangiz, yuvinib, toza kiyimlar kiyib borishingiz lozim.
Akbarshoh RASULOV
"Xo‘jamulki" mahallasida obodlik va mehr-saxovat
Qumqo‘rg‘on tumanidagi "Xo‘jamulki" mahallasida "Mahallada obodlik va mehr-saxovat oyligi" doirasida keng jamoatchilik va aholi vakillari ishtirokida qizg‘in obodonlashtirish va bunyodkorlik ishlari olib borilmoqda. Bu tashabbus mahalla hayotiga yangicha ruh baxsh etib, hamjihatlik va ezgulik muhitini yanada mustahkamlamoqda.
Azaliy qadriyatlarimizdan biri bo‘lgan hashar an’anasi asosida mahalla ahli bir yoqadan bosh chiqarib, o‘z hududini yanada obod, fayzli va ko‘rkam maskanga aylantirish yo‘lida fidokorona mehnat qilmoqda. Har bir fuqaroning qalbida Vatanga muhabbat, mahallaga ehtirom tuyg‘usi jo‘sh urib, ular bunyodkorlik ishlariga faol hissa qo‘shmoqdalar.
Xususan, mahalla hududidagi muqaddas qadamjolardan biri – "Xo‘jamulki ota" qabristonida keng ko‘lamli tozalash va obodonlashtirish ishlari amalga oshirilmoqda. Hashar ishtirokchilari tomonidan qabriston hududi begona o‘tlar va chiqindilardan puxta tozalanib, qabr ustilari tartibga keltirilmoqda. Shuningdek, ziyoratchilar uchun qulay sharoitlar yaratish borasida zarur ishlar olib borilib, ajdodlar xotirasiga chuqur ehtirom ko‘rsatilmoqda.
Bu kabi ezgu tashabbuslar mahallada obodlik va hamjihatlik muhitini mustahkamlash bilan birga, ajdodlarimiz xotirasiga bo‘lgan hurmatimizni namoyon etadi. Ayni paytda, yosh avlodga milliy qadriyatlarimizni singdirish, ularni Vatanga muhabbat va mehnatsevarlik ruhida tarbiyalashda beqiyos ahamiyatga egadir. Bugungi hashar – kelajak avlod uchun namuna, ertangi kun uchun mustahkam poydevordir.
O‘zbekiston musulmonlari idorasi
Surxondaryo viloyati vakilligi Matbuot xizmati
