2016 yil 7 dekabr kuni O‘zbekiston musulmonlari idorasi Buxoro viloyati vakilligida 2016 yilda bajarilgan ishlar sarhisobi bo‘yicha viloyat imom-xatiblarining yig‘ilishi bo‘lib o‘tdi.
Unda O‘zbekiston musulmonlari idorasi masjidlar bo‘limi mudiri Muhammadnazar Qayumov ishtirok etdi.

Dastlab kun tartibiga qo‘yilgan masalalar yuzasidan Buxoro viloyati bosh imom-xatibi Mansur Nurullayev so‘zga chiqib, 2016 yil davomida viloyatdagi masjid imom-xatiblari tomonidan bajarilgan ishlar, erishilgan yutuqlar yuzasidan yillik hisobotni o‘qib eshittirdi. Shuningdek, u 2017 yilda barcha imom-xatiblarni o‘ziga yuklatilgan vazifalarni sidqidildan bajarishda, ma’naviy-ma’rifiy tadbirlarda faol bo‘lishga chaqirdi.

Tadbirda so‘zga chiqqan O‘zbekiston musulmonlari idorasi Masjidlar bo‘limi mudiri Muhammadnazar Qayumov “8-dekabr – O‘zbekiston Respublikasi Konstitutsiyasi qabul qilinganining 24 yilligi” bayrami bilan ishtirokchilarni samimiy tabriklab, imomlar uchun zaruriy tavsiyalarni berdi.

Tadbir davomida joriy yilda samarali mehnati bilan faollik ko‘rsatgan, yoshlarga ibrat bo‘lgan imom-xatiblarga maqtov yorliqlari va esdalik sovg‘alari topshirildi. Shuningdek, din ravnaqi yo‘lida qilayotgan xizmatlari, ko‘rsatayotgan jonbozliklari hamda 2016 yil 2 noyabr kuni “Mustaqillik va diniy qadriyatlar rivoji” mavzuidagi diniy soha xodimlar ishtirokida o‘tkazilgan Respublika anjumanini yuqori saviyada tashkil etishda qo‘shgan hissasini inobatga olib, Buxoro viloyati vakili M.Nurullayevga O‘zbekiston musulmonlari idorasining tashakkurnomasi taqdim etildi.

Tadbir so‘ngida, Qur’oni karim tilovat qilinib, barcha o‘tganlar, xususan, marhum Birinchi Prezidentimizning ruhlariga bag‘ishlandi.

 Muzaffar JABBOROV,

O‘zbekiston musulmonlari idorasi

Masjidlar bo‘limi mutaxassisi