Chumoli o‘giti
Bir o‘rmonga o‘t ketib yong‘in bo‘libdi. Jonivorlarning bir qismi kuchlari yetgan narsa bilan suv tashib, o‘tni o‘chirmoqchi bo‘lishibdi. Ikkinchi qismi esa bundan hech narsa chiqmaydi deb, chetroqqa chiqib tomosha qilib turibdi. Bir chumoli o‘tni o‘chirish uchun hovuchida suv olib ketayotgan ekan. Buni ko‘rgan qarg‘a uning ustidan kulib debdi: “Mana shu suving bilan olovni o‘chiraman, deb o‘ylayapsanmi?” Chumoli unga javob beribdi: “Bilaman, bu suv bilan o‘tni o‘chirib bo‘lmaydi. Lekin men bu harakatim bilan kim tomonda turganimni bilaman”.
Ey farzand, bilginki, to‘qilgan matoda har bir ipning o‘z o‘rni bor. Matoning qaysi yeridan ip chirigan bo‘lsa, mato shu yerdan boshlab yirtiladi. Hayot zanjirida ham xuddi shunday: har bir odamning o‘z o‘rni va vazifasi bor. Muhimi – zanjirning uzilishiga sen sababchi bo‘lib qolmasligingdir.
Akbarshoh RASULOV tayyorladi.
Imom-xatiblar o‘rtasida bilimlar bellashuvi o‘tkazildi
Mustaqilligimizning muqaddas 35 yilligi arafasida Toshkent viloyatida imom-xatiblari va imom noiblari o‘rtasida "ZAKOVAT" intellektual musobaqasi bo‘lib o‘tdi.
Viloyatning turli hududlaridan tashrif buyurgan 6 ta jamoa tarkibidagi soha vakillari o‘zlarining teran bilimi, mulohazakorligi va mantiqiy fikrlash qobiliyatini sinovdan o‘tkazdilar. Har bir savol nafaqat intellektual bilim, balki boy tariximiz, diniy-ma’rifiy qadriyatlarimiz va xalqimizning ma’naviy merosini yorqin aks ettirdi.
Murosasiz va qizg‘in kechgan bahs yakuniga ko‘ra g‘oliblar aniqlandi:
G‘olib jamoalar:
1-o‘rin — "Bilimdonlar" jamoasi
2-o‘rin — "Ziyolilar" jamoasi
3-o‘rin — "Faollar" jamoasi
Diniy soha vakillarining bu kabi sog‘lom raqobat va intellektual bellashuvlarda faol ishtirok etishi jamiyatda ma’rifat nurini yanada kengroq yoyilashiga xizmat qiladi.
G‘olib va ishtirokchilarni chin qalbdan tabriklaymiz!
Ilm-ma’rifat yo‘lidagi xayrli ishlariga Alloh taolo baraka bersin, mas’uliyatli faoliyatlarida kuch-g‘ayrat yor bo‘lsin!
Toshkent viloyati vakilligi
Matbuot xizmati
