Kattalar uchun rivoyat
Butun umr spirtli ichimliklar do‘konining mudiri bo‘lib ishlagan bir kishining yakkayu yagona o‘g‘li bor edi. Yoshlikdan tarbiyasi o‘ziga yarasha bo‘lgani boismi yoxud otasi topgan luqmaning halol emasligi sababmi, bilmadik, erkatoy o‘g‘ilcha maktabni tugatgach, institutga o‘qishga kira olmay, ancha paytgacha bekor tentirab yurdi. Qiladigan ishi – peshingacha uxlash, kechga tomon esa o‘ziga o‘xshagan bir-ikki ulfati bilan tungi klub, diskotekalarda sang‘ish bo‘ldi. Notavon o‘g‘ilni o‘ylayverib, onaizor adoi tamom bo‘ldi, og‘ir kasallikka chalinib vafot etdi. Onaning “yili” o‘tkazilgan kunning ertasiga ota-bola o‘rtasida qattiq janjal chiqdi. Ikkalasi ham zahri qotil – aroq kayfining og‘ushida edi, ota: “Endi sendek o‘g‘lim yo‘q”, deya uni “oq” qilgan bo‘lsa, nonko‘r farzand: “Agar o‘lsangiz, janozangizga kelsam, harom o‘lay”, deb ont ichdi.
Ota-bolaning hayoti shu zaylda davom etdi. Ularga tanish-bilishlar, qo‘ni-qo‘shnilarning pand-nasihati sira kor qilmadi.
Kunlarning birida farzand nogahon, baxtsiz hodisa sabab halok bo‘ldi. Bu paytda ota ham uyida o‘lim bilan olishib, foniy dunyo bilan xayrlashayotgan edi.
Ertasiga odamlar shahar qabristonida ikkita yangi tepalikni ko‘rishdi. Qabrlar oldida bir munkillagan chol o‘tirib: “Aziz zurriyotlarim! Odam alayhissalomdan boshlangan yana bir sulola umri, men sababli barvaqt nihoyasiga yetyapti. Na sen – farzandim, na sen – nabiram aybdor emassizlar. Bularning barchasiga sizlarga to‘g‘ri tarbiya bera olmagan faqatgina men aybdorman, men”, deya ko‘z yosh to‘kar edi....
Akbarshoh RASULOV
Sayyid Yahyo Bokuviy merosiga bag‘ishlangan xalqaro konferensiya bo‘lib o‘tmoqda
Boku shahrida Turkiy davlatlar muftiylari yig‘ilishi doirasida ulug‘ mutafakkir, tasavvuf olimi Sayyid Yahyo Bokuviy merosiga bag‘ishlangan xalqaro konferensiya o‘z ishini boshladi.
Ushbu nufuzli tadbirda Turkiy davlatlar tashkiloti, Butunjahon musulmon donishmandlar kengashi, IRCICA, ICESCO, Al-Azhar ulamolar kengashi vakillari hamda yetuk sharqshunos va islomshunos olimlar ishtirok etmoqda.
Anjumanda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ma’ruza qildilar.
Muftiy hazratlari Sayyid Yahyo Bokuviyning tasavvuf tarixidagi maqomi va uning ta’limoti haqida to‘xtaldilar. Shuningdek, nutqda alloma nafaqat tasavvuf, balki diniy ilmlar, tabiiy va aniq fanlarni egallagan qomusiy olim bo‘lgani, o‘ttizga yaqin asarlari inson nafsini tarbiyalashda muhim qo‘llanma ekani ta’kidlandi.
Shayx Nuriddin Xoliqnazar hazratlari Qur’oni karim va hadisi shariflarga tayangan holda qalb salomatligi va pokligi inson hayotining bosh mezoni ekanini bayon etib, turkiy xalqlarni bog‘lab turgan umumma’naviy ildizlarga alohida urg‘u berdilar:
«Hazrat Ahmad Yassaviy, Bahouddin Naqshband va Sayyid Yahyo Bokuviy kabi buyuk zotlar ilgari surgan nafs tarbiyasi, insonparvarlik va yuksak axloq g‘oyalari bugun ham qardosh xalqlarimizni birlashtirib turuvchi mustahkam ma’naviy ko‘prikdir. Bunday ulug‘ siymolar merosini hamkorlikda o‘rganish xalqlarimizning ma’naviy birligini mustahkamlash va yoshlarimizni sog‘lom e’tiqod ruhida tarbiyalashga xizmat qiladi».
Uch kunlik anjuman davomida O‘zbekiston ilmiy jamoatchiligi ham ma’ruzalar bilan ishtirok etadi.
O‘zbekiston musulmonlari idorasi Matbuot xizmati
