Hasad uchqunlari
Bir mahallada ikki qo‘shni inoq yashashardi. Vaqtlar o‘tib, ular orasidan ola mushuk o‘tdi: “Uyni kim balandroq quradi”, degan raqobat boshlandi. Agar birinchi qo‘shni uyining tomi ikkinchi qo‘shninikidan ozroq baland bo‘lsa, ikkinchisi yoz kelishi bilan tomni ochib, qo‘shnisinikidan hech bo‘lmasa bir qarich baland qilib qayta qurardi. Shu zaylda yillar o‘tdi. Kunlarning birida sodir bo‘lgan zilzila oqibatida har ikki uy qulab, hovlilar qo‘shilib qoldi. Oqibatda, qo‘shnilarga es kirib – uylarini tiklar ekan, bir-biriga yordam berishib, avvalgiday yana inoq yashay boshlashdi. Chunki hasad uchqunlari o‘sha zilzila tufayli yer qa’riga singib, yo‘qolgan edi.
Ha, inson o‘z xatolarini tuzatish, hususan, yuqorida zikr etilgan qo‘shnilar kabi kibr balosidan qutulish uchun bu dunyoda Allohdan ishoratlar bor...
Bayt:
Ko‘p kibrlanma, bo‘lgin sen xokisor,
Kamtarlik-la kamol topgaydir inson.
Akbarshoh RASULOV
Sahoba bo‘lolmagan tobe’in: Abdurahmon ibn Usayla rahimahulloh
Ulug‘ tobe’in Abdulloh ibn Sanobihiy rahimahulloh (asl ismlari Abdurahmon ibn Usayla)ning hayoti bugungi kun kishisi uchun – ayniqsa, vaqtning qadri, go‘zal xotima va maqsad sari intilish borasida ulkan ibrat maktabidir.
Abdurahmon ibn Usayla rahimahulloh Rasululloh sollallohu alayhi vasallamni ko‘rish, u zotdan bevosita hadis eshitish ishtiyoqida Yamandan Madinaga qarab yo‘lga chiqadi. Biroq, Madinaga yetib kelganida Rasululloh sollallohu alayhi vasallamning vafot etganlari haqida xabar topadi. Nabiy alayhissalom besh kun oldin vafot etgan edilar. Abdurahmon ibn Usayla payg‘ambarimizni ko‘ra olmay, sahobalik sharafiga 5 kun kechikkani sababli erisha olmaydi...
Bugungi kunda biz “ertaga qilaman”, “keyinroq boshlayman” deb yillarni boy beryapmiz. Smartfonlar va ijtimoiy tarmoqlar ichida yashayotgan hozirgi avlod uchun ushbu qissa – vaqtni to‘g‘ri taqsimlash va xayrli ishlarni kechiktirmaslik uchun eng katta ogohlantirishdir.
Davron NURMUHAMMAD