Rasululloh yig‘lagan onlar!
Rasululloh sollallohu alayhi vasallam insoniyat ichida Alloh taolodan eng ko‘p qo‘rqqan va Unga nisbatan eng taqvodor zot edilar. Zero ul hazrat Alloh taoloning Azamati va Qudratini barchadan ko‘ra yaxshiroq tanigan zot bo‘ganlar. Shuning uchun ham oldingiyu keyingi gunohlari kechirilishiga qaramay, goh Robb taolodan qo‘rqib gohida esa ummatlari uchun rahmat va shavqatdan yig‘laganlar. Rasuli akram sollallohu alayhi vasallamning muborak ko‘zlaridan taqvo, mehr va tashnalik yoshlari oqishiga sabab bo‘lgan holatlarga siz ham guvoh bo‘ling.
Ummat uchun kuyinib yig‘laganlari
Abdulloh ibn Mas’ud roziyallohu anhudan rivoyat qilinadi: “Menga Nabiy sollallohu alayhi vasallam “Menga qiro’at qilib ber!”, dedilar. Men esa: “Sizga nozil bo‘la turib, men o‘qib beraymi?”, dedim. U zot “Ha”, dedilar. Men Niso surasidan o‘qiy boshladim va “Har bir ummatdan bir guvoh keltirib, seni ularning hammasiga guvoh etib keltirgan chog‘imizda hol qandoq bo‘lur?!”, oyatiga yetganimda, “Endi kifoya qiladi!”, dedilar. U zotga qarasam, yig‘layotgan ekanlar!”
Abdulloh ibn Amr ibn Os roziyallohu anhudan rivoyat qilinadi: “Nabiy sollallohu alayhi vasallam Alloh taoloning Ibrohim alayhissalom haqidagi “Ey Robbim, albatta u(sanam)lar odamlardan ko‘pini adashtirdilar. Bas, kim menga ergashsa, u mendandir.” oyatini va Iso alayhissalom “Agar ularni azoblaydigan bo‘lsang, bas, albatta, ular Sening bandalaring. Agar ularni mag‘firat qiladigan bo‘lsang, bas, albatta, Sening O‘zing g‘olib va Hikmatli Zotdirsan.”, degan so‘zi haqidagi oyatini tilovat qildilar va ikki qo‘llarini ko‘tardilab: “Yo Alloh! Ummatim, ummatim!”, dedilar va yig‘ladilar!” Shunda Alloh azza va jalla aytdi: “Ey Jabroil! Muhammadga bor, holbuki Robbing biluvchiroqdir, undan, seni nima yig‘latdi, deb so‘ra”, deb amr qildi. Bas, Jabroil alayhissalom u zotning oldigi kelib so‘radi va Alloh taologa u zotning aytgan gaplari xabarini berdi. Holbuki, U bilivchiroqdir. Alloh taolo esa: “Ey Jabroil! Muhammadga bor va unga, albatta seni ummating borasida rozi qilurmiz”- deb ayt, dedi”.
Abu Dovudning boshqa bir rivoyatida bu voqea kusuf namozida bo‘lgani va u zot sajdalarining oxirida “uff, uff” deb puflab, ketidan shunday duo qilganlari rivoyat qilinadi: “Ey Robbim! Men ular orasida ekanman, ularni azoblamaslikka va’da bermabmiding?! Ey Robbim! Istig‘for aytib tursalar, ularni azoblamaslikka va’da bermabmiding?!”.
Ummatlarini sog‘inib yig‘laganlari
Kunlarning birida Rasululloh sollallohu alayhi vasallam yig‘ladilar. Buni ko‘rgan sahobalar: “Yo Rasululloh! Sizni nima yig‘latdi?”, deb so‘rashdi. U zot esa: “Birodarlarimni sog‘indim!”, deb javob berdilar. Sahobalar: “Bizlar birodarlaringiz emasmizmi, yo Rasululloh?”, deyishdi. Shunda ul Mahbub alayhis salom: “Yo‘q. Sizlar as'hoblarimsiz. Birodarlarim mendan keyin keladilar, meni ko‘rmasdan turib menga iymon keltiradilar!”, dedilar.
Farzandlari Ibrohim alayhissalom uchun yig‘laganlari
Anas ibn Molik roziyallohu aytadilar: “Biz Rasululloh sollallohu alayhi vasallam bilan birga Abu Sayfning oldiga bordik u Ibrohim alayhissalomning enagasi edi. Rasululloh sollallohu alayhi vasallam Ibrohimni qo‘llariga oldilar va uni o‘pib, hidladilar. So‘ng biz uning oldiga kirdik. Ibrohim jon berayotgan edi. Rasululloh yig‘lay boshladilar. Shunda Abdurrahmon ibn Avf: “Yo Rasululloh, yig‘layapsizmi?!”, deb so‘radi. Rasululloh sollallohu alayhi vasallam: “Bu rahmatdir ey ibn Avf”, dedilar va yana: “Albatta ko‘zlar yosh to‘kadi, qalb mahzun bo‘ladi lekin biz faqatgina Robbimiz rozi bo‘ladigan gaplarni aytamiz! Biz sening firoqingdan mahzunmiz, ey Ibrohim!”, dedilar.
Ayollari Xadicha roziyallohu anho uchun yig‘laganlari
Rasululloh sollallohu alayhi vasallam marhamat qildilar: “Insonlar menga kufr keltirganda, Xadicha menga iymon keltirdi. Isonlar meni yolg‘onchiga chiqarganda, u meni tasdiqladi. Insonlar meni mahrum qilganida, u meni moliga sherik qildi. Alloh taolo undan menga farzandlar berdi, boshqalaridan esa, yo‘q!” Imom Ahmad rivoyati.
Abu Hurayra roziyallohu anhudan rivoyat qilinadi: “Jabroil alayhissalom Nabiy alayhissalotu vassalomning oldiga kelib: “Yo Rasululloh! Bu Xadicha. Oldingizga kelayapti. Uning qo‘lida idish bor. Uning ichida zirovar yoki taom yoki suv yoki ichimlik bor. Agar u oldingizga kelsa, unga Robbisidan salom yo‘llang va yana tillodan bo‘lgan unda shovqin va mashaqqat bo‘lmagan Jannat bashoratini bering!”, dedilar.
Onamizning kasallari og‘irlashdi. Tun uzoq va ko‘zyosh bilan o‘tdi. Sahar vaqti yaqinlashganda u zotning ko‘zlari ochildi va Rasululloh sollallohu alayhi vasallamga hamda qizlariga uzoq tikildilar. Bu tikilish bilan onamiz o‘z suyuklilaridan uzoq va ortga qaytmas rihlatlari uchun ozuqa oldilar. So‘ng, o‘zlari uchun va’da qilingan, abadiy ne’matlar bilan burkangan o‘rinlarini ko‘rib, rozilik bilan tabassum qilgan holda ko‘zlarini yumdilar. Shu tariqa, Alloh taoloning yo‘lida, Uning diyni rivoji uchun tinimsiz harakat qilgan bu tana taskin topdi. Rasululloh sollallohu alayhi vasallamning ko‘zlaridan yosh quyildi! Bu holatdan butun hovlini yig‘i ovozi tutdi! Tongda pok tobut uzra pokiza jasadni ko‘tarib borishardi. Ushbu pokiza jasadni qabr yoniga qo‘ydilar. Rasululloh sollallohu alayhi vasallam qabr ichiga tushib muborak qo‘llari bilan uni tekisladilar so‘ng pokiza tanani olib, unga so‘nggi bor mahzunlik va o‘kinch yoshlari quyilib turgan ko‘zlari bilan boqdilar va sekin qabrga qo‘ydilar!
Zayd ibn Horisa roziyallohu anhuning vafotiga yig‘laganlari
Abdulloh ibn Mas’ud roziyallohu anhudan rivoyat qilinadi: “Zayd qatl qilinganda Usoma ibn Zayd Nabiy alayhissalomdan uzilib qoldi. U keyinroq Nabiy alayhissalomning oldilariga keldi. Keldi-yu yig‘lab yubordi. Uni ko‘rib Nabiy alayhissalom ham yig‘ladilar va: “Ey Usoma! Bizdan uzilib qolib, keyin kelib bizni mahzun qilyapsan!”, dedilar. Ertasi kuni u Nabiy alayhissalomning oldiga yana keldi. Shunda U zot: “Men seni kechagidan ham boshqacharoq holda ko‘ryapman?!”, dedilar. Usoma u zotga yaqinroq kelib yana yig‘lab yubordi. Bundan Rasululloh sollallohu alayhi vasallam ham yig‘ladilar!”
Usmon ibn Maz’un roziyallohu anhuga yig‘laganlari
Usmon ibn Maz’un Rasululloh sollallohu alayhi vasalmaga emikdosh ini edirlar. U kishi johiliyat davrida ham o‘zlari uchun xamrni harom qilgandilar. Islomga o‘n to‘rtinchi bo‘lib kirdilar. Habashistonga qilingan hijratda musulmonlarga amirlik qilganlar. Badrda ishtirok etganlar.
Usmon Ibn Maz’un Badr jangidan keyin ko‘p yashamadilar. Sha’bon oyiga kelib u zotning dardlari og‘irlashdi.
Ummul mu’minin Oisha roziyallohu anho aytadilar: “Usmon ibn Maz’un jonsiz yotganida Rasululloh sollallohu alayhi vasallam uni o‘pdilar va yig‘ladilar. U zotning muborak ko‘zyoshlari Usmonning yanoqlariga oqardi!”
Ibn Abbos roziyallohu anhu aytadilar: “Rasululloh sollallohu alayhi vasallamning qizlaridan biri vafot etganda ul zot: “Yaxshi salafimiz – Usmon ibn Maz’unga borib qo‘shilgin!”, dedilar”.
U Madinada vafot etgan birinchi muhojirlardan va eng avval Baqi’ga dafn qilingan zot edi. Yana Rasululloh sollallohu alayhi vasallam u kishi haqida: “Alloh seni Rahmatiga olsin, ey Usmon! Sen dunyodan hech nima olmading, dunyo ham sendan hech nima ololmadi!”, dedilar.
Sa’ad ibn Uboda roziyallohu anhu kasal bo‘lganda yig‘laganlari
Abdulloh ibn Umar roziyallohu anhu aytadilar: “Sa’ad ibn Ubodaning kasali og‘irlashib qoldi. Nabiy sollallohu alayhi vasallam uni ko‘rgani keldilar. U zot bilan Abdurrahmon ibn Avf, Sa’ad ibn Abu Vaqqos va Abdulloh ibn Mas’ud ham kelishdi. Rasululloh Sa’adning oldiga kirganlarida uni oila a’zolari qurshab olgan holda ko‘rdilar va hayajon bilan: “U vafot etdimi?!”, deb so‘radilar. Oilasi: “Yo‘q, yo Rasululloh!”, deyishdi. Shunda Ul zot alayhissalotu vassalom yig‘ladilar! Nabiy alayhissalomning yig‘laganlarini ko‘rib, qavm ham yig‘ladi. So‘ng, Ul xazrat qavmga qarata: “Eshitmaganmisiz, Alloh taolo ko‘z yoshi uchun yoki qalb mahzunligi uchun azoblamaydi! Lekin mana buning uchun Azoblaydi – deb tillariga ishora qildilar – yoki mahrum qiladi. Albatta mayyit ahlinig unga “aytib” yig‘lashidan azoblanadi!”, dedilar.
Mus’ab ibn Umayr roziyallohu anhuni ko‘rib yig‘laganlari
Barro aytadilar: “Bizning oldimizga birinchi kelganlar Mus’ab ibn Umayr va ibn Ummu Maktum edi. Ular bizga Qur’on o‘qib berardilar”.
Mazkur sahobani Nabiy alayhissalom birinchi Aqaba bay’ati ishtirokchilari bilan birga Qur’on o‘qib, uni o‘rgatish uchun Madinaga jo‘natgandilar. U zot Makkada yashagan vaqtlarida boy badavlat bo‘lib yashaganlar. Madinaga hijratlaridan so‘ng faqirlikda kun kechirdilar.
Muhammad ibn Ka’ab sahobalarning biridan quyidagicha rivoyat qiladilar: “Masjidda o‘tirganimizda Mus’ab ibn Umayr kirib keldi. Uning egnida bir muncha yamog‘ solingan ko‘ylagi bor edi. Uning ilgari qanday boyliklar ichida yashagani-yu hozir esa qay holatga tushib qolganini ko‘rib, Rasululloh sollallohu alayhi vasallam yig‘lab yubordilar!”
Hamza roziyallohu anhu uchun yig‘laganlari
Uhud g‘azotidan keyin Rasululloh sollallohu alayhi vasallam jang maydoniga tushdilar. Jangda shahid bo‘lgan musulmonlarni dafn qilish harakati boshlangandi. Shu orada ro‘paralaridan amakilari Hamza ibn Abdulmuttolibning jonsiz jasadi chiqib qoldi. Uning burni va ikki qulog‘i kesib olingan, jigari sug‘urib olingan hatto bir cheti tishlangan va yana tanasiga nayza sanchilgan edi. Rasululloh sollallohu alayhi vasallam qattiq yig‘ladilar. U zotning bu yig‘lashlaridan as'hoblar ham yig‘lashdi!
Abdulloh ibn Mas’ud roziyallohu anhu aytadilar: “Biz Rasululloh sollallohu alayhi vasallamning Hamza uchun yig‘laganlaridan ko‘ra qattiqrog‘ yig‘laganlarini hech ham ko‘rmaganmiz! Uni qibla tomonga qo‘ydilar so‘ng janoza o‘qidilar. Yig‘ilari kuchayib hatto hungragan ovozlari eshitildi. U kundagi shahidlarning ko‘rinishi juda dahshatli edi!”
(Uhud jangidan keyin mushriklarning ayollari ko‘plab shahidlarning quloq, burun va boshqa a’zolarini kesib olishgandi.)
Mo‘ta jangi kuni yig‘laganlari
Mo‘ta jangi musulmonlar uchun juda og‘ir jang edi. Rasululloh sollallohu alayhi vasallamnink ko‘rsatmalari bilan uch ming kishilik qo‘shin Rumlik nasarolarning ikki yuz ming kishilik qo‘shiniga qarshi kurashishi kerak edi. Aslida, Rumliklarning o‘zlari Rasululloh sollallohu alayhi vasallam taraflaridan ular uchun elchi qilib yuborilgan sahobiy Xoris ibn Umayrni qatl qilishdi va musulmonlarga qarshi jang uchun o‘z qo‘shilarini yig‘ishda davom etishdi. Rasululloh sollallohu alayhi vasallam musulmon lashkarlarga Zayd ibn Horisa roziyallohu anhuni amir etib tayinladilar. Agar Zaydga biror gap bo‘lsa, musulmonlarga Ja’far ibn Abu Tolib, agar unga ham biror gap bo‘lsa, Abdulloh ibn Ravoha boshchilik qilishini aytdilar. Shu tariqa musulmonlar yo‘lga chiqdi. Rum askarlariga peshvoz chiqib, shiddatli jang boshlashdi. Bu orada Nabiy sollallohu alayhi vasallam Madinada qolgan kishilarga ushbu jangning holatidan xabar berib turdilar.
Anas ibn Molik roziyallohu anhudan rivoyat qilinadi: “Nabiy sollallohu alayhi vasallam Zayd, Ja’far va ibn Ravohaning xabari kelishidan avval odamlarga ularning o‘lganligini bildirdilar. U zot: “Bayroqni Zayd oldi. U musibatga uchradi. So‘ngra bayroqni Ja’far oldi. U ham musibatga uchradi. Endi bayroqni ibn ravoha oldi. Bas, u ham musibatga uchradi”, der va ko‘zlaridan duv-duv yosh to‘kilar edi!
“Nihoyat bayroqni Allohning qilichlaridan bir qilich oldi va ularga fathu nusrat keldi”, dedilar.
Alloh taolo Ul muhtaramga salovat va salomlarimizni yetkazsin!
Internet ma’lumotlari asosida
“Mulla Abdug‘affor hoji” jome masjidi imom xatibi
Ikrom Karimov tayyorladi
“DIN VA DAVLAT RAVNAQIGA MUNOSIB HISSA QO‘SHYAPMIZ”
Xoja Buxoriy o‘rta-maxsus diniy ta’lim muassasasi direktori, pedagogika fanlari bo‘yicha falsafa doktori O‘tkir domla G‘UZAROV bilan suhbat
– Assalomu alaykum, muhtaram ustoz. Avvalambor, Sizni pedagogika fanlari bo‘yicha falsafa doktori ilmiy darajasiga ega bo‘lganingiz bilan muborakbod etamiz. Ilmiy darajangiz bundan ham yuksalaversin. Suhbatimizni bugungi kunda Siz rahbarlik qilayotgan ta’lim muassasasi haqidagi ma’lumotlardan boshlasak...
– Va alaykum assalom va rohmatulloh. Qutlov va tilagingiz uchun tashakkur. Ta’lim muassasasiga 1992 yilda asos solingan. Madrasaga XIV asrda yashab ijod etgan mashhur tasavvuf allomasi Said Ahmad Vali Kulohdo‘z Xoja Buxoriy nomi berilgan. U zot Bahouddin Naqshbandning zamondoshi sifatida e’tirof etiladi. Naqshbandiya tariqatining ma’naviy-axloqiy g‘oyalarini Qashqadaryo vohasi, xususan Kitob shahri va uning atrofida keng targ‘ib qilgan ulug‘ mutafakkirlardan sanaladi.
Muassasada bugungi kunda jami 34 nafar oliy ma’lumotli, malakali pedagog-o‘qituvchi 105 nafar talabaga diniy va dunyoviy fanlardan puxta bilim berib kelmoqda. Ta’lim jarayonida zamonaviy pedagogik yondashuvlar, samarali o‘qitish usullari hamda amaliy mashg‘ulotlardan keng foydalanilib, talabalarning nazariy bilimlarini mustahkamlash va ularni amaliyotda qo‘llash ko‘nikmalarini shakllantirishga alohida e’tibor qaratilmoqda.
Shuningdek, pedagog-o‘qituvchilar tomonidan talabalarning ma’naviy-axloqiy tarbiyasi, mustaqil fikrlashi, ilmiy salohiyati va dunyoqarashini rivojlantirishga qaratilgan qo‘shimcha mashg‘ulotlar hamda ma’rifiy tadbirlar muntazam tashkil etib kelinmoqda. Bu esa ta’lim muassasasida sifatli ta’lim berish bilan bir qatorda, har tomonlama yetuk, bilimli va zamonaviy talablarga javob beradigan mutaxassislarni tayyorlash uchun munosib ta’lim muhitini shakllantirishga xizmat qilmoqda.
– Ushbu ilm maskani qanday mutaxassislarni tayyorlab bermoqda?
– Ta’lim muassasasi dinimiz ravnaqi, mustaqil O‘zbekistonning taraqqiyoti va yuksalishi yo‘lida munosib xizmat qiladigan, yuksak ma’naviyat va axloqiy fazilatlarga ega, milliy va umuminsoniy qadriyatlarni chuqur anglagan, sof islom dini ta’limotini mukammal o‘zlashtirgan, diniy-ma’rifiy bilimlarni hayotga to‘g‘ri tatbiq eta oladigan yuqori malakali o‘rta maxsus ma’lumotli islomshunos, imom-xatiblarni tayyorlaydi.
Bitiruvchilar masjidlarda imom-xatib, diniy ta’lim muassasalarida o‘qituvchi, ma’naviy-ma’rifiy sohada faoliyat yurituvchi mutaxassis sifatida xizmat qilish uchun zarur nazariy bilim va kasbiy malakaga ega bo‘lib chiqadi.
– Diniy va dunyoviy fanlar uyg‘unligini ta’minlash uchun o‘quv jarayoni qanday tashkil etilgan?
– Ta’lim dasturlarida Qur’on, hadis, fiqh, aqida kabi diniy fanlar bilan bir qatorda tarix, ingliz tili, falsafa asoslari, psixologiya, jismoniy madaniyat va sport hamda boshqa dunyoviy fanlarga ham o‘rin ajratilgan. Darslar zamonaviy pedagogik usullar, axborot texnologiyalari va interfaol usullardan foydalangan holda olib borilmoqda.
– Talabalarning xorijiy tillarni mukammal o‘rganishlari hamda mutolaa madaniyatini yuksaltirishlari uchun qanday sharoit va imkoniyatlar yaratilgan?
– Xorijiy tillarni o‘rganishga bo‘lgan qiziqishni oshirish maqsadida haftaning muayyan kunlarida til kunlari tashkil etilgan. Xususan, seshanba kuni ingliz tili kuni, chorshanba kuni esa arab tili kuni o‘tkazilib, talabalarning til o‘rganishga doir bilimlarini mustahkamlash, muloqot ko‘nikmalarini rivojlantirish va amaliy mashg‘ulotlar orqali bilimlarini oshirishga alohida e’tibor qaratilgan.
Shuningdek, talabalarning bo‘sh vaqtlarini mazmunli tashkil etish va til o‘rganish samaradorligini oshirish maqsadida qo‘shimcha to‘garaklar faoliyati yo‘lga qo‘yilgan. Darslarga sohasining yetuk va malakali mutaxassislari jalb etilgan. Bu esa talabalarning nafaqat tillarni mukammal o‘zlashtirishi, balki dunyoqarashining kengayishiga xizmat qilmoqda.
– Mudarrislarning kasbiy mahoratini oshirish, saboqlarning talabalarga yanada samarali yetib borishi uchun aynan qanday metodik usullar joriy etilgan?
– Muassasada zamonaviy pedagogik texnologiyalardan foydalanish yo‘lga qo‘yilgan. Xususan, axborot-kommunikatsiya texnologiyalaridan foydalangan holda onlayn platformalardan Google Forms xizmatlari va interfaol ilovalar (Kahoot, QuizBot, topqir.uz) dars jarayoniga tatbiq etilgan. Dars jarayonida smart doska, markerli doska, magnitli doska imkoniyatlaridan foydalaniladi. Zamonaviy pedagogik texnologiyalarning “bahs-munozara”, “aqliy hujum”, “guruhli ish”, “taqdimot”, “keys-tahlil”, “savol-javob” kabi usullari qo‘llaniladi.
– Talabalarning darsdan tashqari vaqtlarini mazmunli tashkil etish, ularning ilmiy va ijodiy qobiliyatlarini yuzaga chiqarish borasidagi ishlarni ham aytib o‘tsangiz...
– Ta’lim muassasasida “yosh ilmiy tadqiqotchi” guruhi shakllantirilgan bo‘lib, ular ilmiy maqolalar yozish, internet saytlarida audio, video chiqishlar qilib, yosh kitobxon tanlovlarida faol qatnashadi.
Xatmul kutub an’anasi bo‘lib, hozirga qadar talabalar “Munabbihot”, “Ta’lim mutaallim”, “Fiqhul muyassar” (1- 2 kitobi), “Fiqhul akbar sharhi” va “Taysiru mustalahul hadis” asarlarini xatm qilishdi...
– Ta’lim muassasasi binolari, talabalar turar joyi va moddiy-texnik imkoniyatlar qay darajada?
– Bino va inshootlarimizning tashqi va ichki qismlari muntazam texnik ko‘rikdan o‘tkazilib, joriy ta’mirlash ishlari amalga oshirib boriladi.
Muassasa zamonaviy texnik vositalar bilan bosqichma-bosqich jihozlanib kelinmoqda. Xususan, ish jarayoni va dars mashg‘ulotlari uchun 42 ta kompyuter jamlanmasi 20 ta interaktiv smart doska va boshqa zarur jihoz va qurilmalar bilan to‘liq ta’minlangan. Ta’lim muassasasi internet tarmog‘iga optik tola orqali bog‘langan.
Asosiy o‘quv binosida 25 ta o‘quv xonasi mavjud bo‘lib, Qur’oni karim va tajvid o‘quv kurslari alohida o‘quv binosi bilan ta’minlangan. Yaqinda talabalar uchun 240 o‘rinli yangi o‘quv binosi foydalanishga topshirildi.
– Talabalaringizning respublika miqyosidagi turli ilmiy, diniy va sport musobaqalaridagi ishtiroki hamda erishayotgan natijalari haqida ham to‘xtalib o‘tsangiz?
– Ta’lim muassasamiz talabalari respublika miqyosida o‘tkaziladigan ilmiy, diniy-ma’rifiy va sport musobaqalarida muntazam ishtirok etib, yuqori natijalarga erishib kelmoqda. Jumladan, 2023 yilda O‘zbekiston musulmonlari idorasi tasarrufidagi diniy ta’lim muassasalari talabalari o‘rtasida o‘tkazilgan “Jaholatga qarshi ma’rifat” intellektual bellashuvida jamoamiz “Eng faol targ‘ibotchi jamoa” nominatsiyasi bo‘yicha 1-o‘rinni qo‘lga kiritgan.
Sport yo‘nalishida ham talabalarimiz shaxmat, kurash, stol tennisi va tosh ko‘tarish kabi sport turlari bo‘yicha “Barkamol avlod” Respublika bosqichlarida bir necha bor sovrindor bo‘lishdi. Xususan, 2022 yilda o‘tkazilgan “Barkamol avlod” sport o‘yinlari final musobaqasida jamoamiz umumjamoa hisobida 1-o‘rinni qo‘lga kiritgan bo‘lsa, 2026-yil milliy kurash bo‘yicha 3-o‘rinni egalladi.
Ilmiy yo‘nalishda esa talabalarimiz Yagona olimpiada Respublika bosqichida muntazam ravishda muvaffaqiyatli ishtirok etib, turli yillarda bir nechta 1-, 2- va 3-o‘rinlarni qo‘lga kiritgan. Bundan tashqari, 2022-2023 o‘quv yilida “Esselar tanlovi” Respublika bosqichida 1-o‘rin hamda “Eng yosh kitobxon” tanlovida ham 1-o‘rin sohibi bo‘lishdi. Yagona olimpiada musobaqasida 2026 yil 3-o‘rinni qo‘lga kiritdi.
– Bitiruvchilarning keyingi faoliyati qanday kechmoqda. Ya’ni, bitiruvchilar hozirgi kunda jamiyat hayotida, diniy-ma’rifiy sohalarda qanday o‘rin tutmoqda?
– Ta’lim muassasasi bitiruvchilari bugungi kunda mamlakatimizdagi diniy-ma’rifiy sohaning turli yo‘nalishlarida samarali faoliyat yuritib, jamiyat hayotida munosib o‘rin tutib kelmoqda. Ular O‘zbekiston musulmonlari idorasi, Din ishlari bo‘yicha qo‘mita, mahalliy hokimiyat tizimlarida xizmat qilmoqda.
Jumladan, masjidlarda imom-xatib va imom noibi lavozimlarida, diniy ta’lim muassasalarida o‘qituvchi sifatida, ilmiy-tadqiqot markazlari va diniy-ma’rifiy muassasalarda ilmiy xodim sifatida, Fatvo markazida yetakchi mutaxassis sifatida xizmat qilib kelayotganlar, davlat va jamoat tashkilotlarida ham faoliyat yuritayotganlar bor.
Qisqa qilib aytganda, ta’lim muassasamizdan yetishib chiqqan kadrlar yurtimizning turli joylarida, turli jabhalarda dinimiz va davlatimiz ravnaqiga o‘z hissalarini qo‘shib kelmoqda.
O‘MI Matbuot va media bo‘limi mutaxassisi
Abdulatif ABDULLAYEV suhbatlashdi.
