Germaniyaning Gyottingen shahrida bo‘lib o‘tgan Butunjahon nemis tili olimpiadasining final bosqichida hamyurtimiz Rayyona Ibrohimova birinchi o‘rinni qo‘lga kiritdi, deb xabar beradi "Dunyo" AA muxbiri. 

Joriy yilning 15-22 iyul kunlari dunyoning 62 davlatidan 14 yoshdan 17 yoshgacha bo‘lgan 100 dan ortiq o‘quvchi ishtirokida o‘tkazilgan nemis tili bo‘yicha xalqaro musobaqada Andijon shahridagi 4-maktab o‘quvchisi Rayyona Ibrohimova barcha bosqichlardan muvaffaqiyatli o‘tib, tegishli daraja bo‘yicha birinchi o‘rinni qo‘lga kiritdi.

"Biz bilan birga bo‘ling! Bilim olib kelajakni yarating" shiori ostida o‘tkazilgan bellashuvlarda yurtdoshimiz bilan birgalikda Mahek Xon (Bangladesh) va Ana Kotevskalar (Shimoliy Makedoniya) ham tegishli til darajalarda olimpiada g‘oliblari bo‘lishdi.

Xalqaro musobaqada nafaqat o‘quvchining nemis tili bo‘yicha bilimlari, balki madaniyatlararo kompetensiyasi, jamoada ishlay olish hamda ijodkorlik qobiliyatlari baholandi.

Ta’kidlash joizki, Butunjahon nemis tili olimpiadasi (IDO) har ikki yilda Gyote-Institut tomonidan Xalqaro nemis tili o‘qituvchilari assotsiatsiyasi bilan birgalikda tashkil etiladi.

IDO – 2024 Gyottingen shahri oberburgomistri Petra Broystedt homiyligi ostida Gyottingen universiteti Bilimlar muzeyi hamda Bilimlar forumi bilan uzviy hamkorlikda o‘tkazildi.

O‘quvchilarga o‘z mamlakatlaridan eng mahoratli nemis tili o‘qituvchilari hamrohlik qildi. Olimpiada kunlari o‘qituvchilar uchun nemis tilini xorijiy til sifatida o‘qitish sohasidagi eng yangi pedagogik texnologiyalar bo‘yicha malaka oshirish seminarlari tashkil etildi. 

Butunjahon nemis tili olimpiadasi birinchi marotaba 2008 yilda Drezden shahrida o‘tkazilgan. Olimpiada har ikki yilda Germaniyada Gyote-Instituti joylashgan shaharlarda tashkil etiladi. Ushbu bilimlar bellashuviga hozirgacha Berlin, Gamburg, Frankfurt-Mayn va Frayburg shaharlari mezbonlik qilgan. 

O‘zbekiston musulmonlari idorasi
Matbuot xizmati