Diniy idora delegatsiyasi Misrdagi xalqaro anjumanda qatnashmoqda
Shu yil 29-30 iyul kunlari Qohirada "Tezkorlik bilan rivojlanib borayotgan dunyoda fatvo va yuksak axloqni shakllantirish" mavzucidagi xalqaro anjuman bo‘lib o‘tmoqda.
Nufuzli tadbirda Misr muftiysi Shavqi Ibrohim Allam taklifiga binoan O‘zbekiston musulmonlari idorasi raisining birinchi o‘rinbosari Homidjon domla Ishmatbekov va Diniy idora Xalqaro aloqalar bo‘limi mudiri Shavkat Hamdamov ishtirok etmoqda.
Misr Fatvo uyi tashkil etgan anjumanda fatvo, ya’ni din ulamolari tomonidan chiqarilgan shariat hukmi, shaxslar va jamiyatni to‘g‘ri yo‘lga yo‘naltirish va yuksak axloqni shakllantirishda muhim o‘rin tutishi, tezkor rivojlanuvchi dunyoda texnologiyalar va jamiyat qiymatlari o‘zgarib borayotganda fatvolar yangi chaqiriqlarga moslashishi va dinning asosiy tamoyillariga asoslangan bo‘lishi zarurligiga alohida e’tibor qaratiladi.
Xalqaro anjumanda dunyodagi olim va soha mutaxassislari mavzu yuzasidan fikr-mulohaza almashish barobarida o‘z ma’ruzalari bilan qatnashadi.
O‘zbekiston musulmonlari idorasi
Matbuot xizmati
Yaxshilik ulashib, ko‘ngillar shod bo‘lmoqda
Vatanimiz mustaqilligining 35 yillik bayrami arafasida Qoraqalpog‘iston Respublikasi bo‘yicha mehr-oqibat, oqibat va xayr-saxovat marafonlari yangicha sur’at va keng yoyilmoqda. Inson qadrini ulug‘lashni bosh maqsad qilgan ushbu ezgu tashabbuslar yurtimizdagi ijtimoiy himoyaga muhtoj oilalarga, yolg‘iz va boquvchisini yo‘qotgan farzandlarimizga mehr ulashishga qaratilgan.
"Vaqf" xayriya jamoat fondi Qoraqalpog‘iston bo‘limi tomonidan "Imom eshon Muhammad" jome masjidida yolg‘iz va boquvchisini yo‘qotgan farzandlarimiz uchun maktab formasi va o‘quv qurollarini berish tadbiri o‘tkazildi.
Ko‘ngillarga umid, yuraklarga quvonch taratgan tadbirda Qoraqalpog‘iston Respublikasi Vazirlar Kengashi Raisining o‘rinbosari Alisher Allaniyazov, Qoraqalpog‘iston musulmonlari qoziyoti qozisi Bahramaddin domla Razov va "Vaqf" xayriya jamoat fondi raisi A.Jolovshiyevlar ishtirok etib, 35 bolaga maktab formalari va bayram sovg‘alarini tantanali tarzda topshirdi.
Bunday g‘amxo‘rlik tadbiri farzandlarimizning ko‘zlarida quvonch uchqunini yoqib, ko‘ngillarida cheksiz faxr tuyg‘usini uyg‘otdi.
"Inson qadri ulug‘langan, mehr-oqibat ustuvor bo‘lgan yurtda doimo taraqqiyot va baraka bo‘ladi."
Qoraqalpog‘iston musulmonlari qoziyoti
